ගාල්ල කොටුව මත සාමකාමී උද්ඝෝෂණයක යෙදී සිටිය දී ආයුධ රැගත් යුද හමුදා සෙබළු පැමිණ එම විරෝධතාකරුවන් බලහත්කාරයෙන් විසුරුවා හැරීමට එරෙහිව අද (01) ශ්රේෂ්ඨාධිකරණයට මූලික අයිතිවාසිකම් පෙත්සමක් ගොනුකරනු ලැබීය.
මෙම පෙත්සම ගොනුකරන ලද්දේ හිටපු පාර්ලිමේන්තු මන්ත්රී අජිත් කුමාර සහ නිතිඥ අමරදිවාකර ලියානරච්චි යන දෙදෙනා විසිනි.
මූලිික අයිතිවාසිකම් කඩවීම හේතුවෙන් රුපියල් ලක්ෂ 50ක වන්දියක් ඉල්ලා මෙම පෙත්සම ගොනුකර ඇත.
මෙහි වගඋත්තරකරුවන් ලෙස ගාලුකොටුව ගැමුණු හේවා බලඇණිය භාර අණදෙන නිලධාරී ලුතිනන් කර්නල් අසේල විජයරත්න ඇතුළු පිරිසක් නම් කරනු ලැබ ඇත.
ඊයේ (30) ගාල්ල කොටුව මත පැවති උද්ඝෝෂණයට පැමිණි සන්නද්ධ යුධ හමුදා සාමාජිකයින් පිරිසක් එම රැළියේ සිටි උද්ඝෝෂණකරුවන් බලහත්කාරයෙන් විසුරුවා හැර ඇති බවත් එමගින් ඔවුන්ගේ මූලික අයිතිවාසිකම් උල්ලංඝනය වී ඇති බවත් පෙත්සම්කරුවෝ කියති.