ඕස්ට්‍රේලියාවේ නව රජය විසින් එරට වසර හතරක් රැඳවුම් භාරයේ සිටි මුරුගප්පන් පවුලට වීසා බලපත්‍ර ලබාදීමට කටයුතු කර ඇතැයි වාර්තා වේ. ඔවුන්ට බිලෝලා හි තාවකාලිකව ජීවත් වීමට සහ වැඩ කිරීමට ඉඩ ලබා දී ඇත.
සරණාගතභාවය සඳහා වූ ඉල්ලීම ප්‍රතික්ෂේප වීමෙන් පසු මෙම ශ්‍රී ලාංකික දෙමළ පවුල 2018 සිට සංක්‍රමණික රැඳවුම් භාරයේ සිටියේය.
මෙම සිද්ධිය මුරුගන් ජීවත්වූ බිලෝලා ගම්මානයේ මහජන කැළඹීමක් ඇති කළ අතර ඔවුන්ට නැවත පැමිණීමට අවසර දෙන ලෙස ඉල්ලමින් ප්‍රදේශවාසීහු උද්ඝෝෂනය කළහ.
මතභේදාත්මක ප්‍රතිපත්ති යටතේ, ඕස්ට්‍රේලියාවට මුරුගප්පන් වැනි සරණාගතයින් දින නියමයක් නොමැතිව රඳවා තබා ගත හැකි අතර, ඔවුන්ගේ සරණාගත හිමිකම් තක්සේරු කරන අතරම ඔවුන් පිටුවහල් කිරීමට පියවර ගනී.
නමුත් පසුගිය සෙනසුරාදා මැතිවරණයකින් ජයග්‍රහණය කළ අගමැති ඇන්තනි ඇල්බනීස් පැවසුවේ තම රජය මුරුගප්පන්වරුන් සඳහා විශේෂයක් කරන බවයි.
“අපි මිනිසුන්ට නරක ලෙස නොසැලකිය යුතු බව කීමට තරම් ශක්තිමත් සමාජයක් අපට අවශ්‍යයි, මෙතරම් කාලයක් විශාල වියදමක් දරමින් මෙම පවුල රඳවාගෙන සිටියේ කෙසේද යන්න මට තේරුම්ගත නොහැකි ය.” ඔහු සිකුරාදා පැවසීය.
නමුත් පවුලේ ආධාරකරුවන් රජයෙන් ඉල්ලා ඇත්තේ තාවකාලික වීසා වෙනුවට ඕස්ට්‍රේලියාවේ ස්ථිර පදිංචිය ලබා දීමට ඔහුගේ බලතල භාවිතා කරන ලෙසයි.
“ඔවුන් බිලෝ වෙත යන ගමන ඔවුන්ගේ ජීවිතයේ දිගු, වේදනාකාරී පරිච්ඡේදයක අවසානය සනිටුහන් කරයි, ජීවිත කාලය පුරාම සුවය ලැබීමේ හා ප්‍රකෘතිමත් වීමේ ආරම්භය සනිටුහන් කරයි,” පවුලේ මිතුරිය ඇන්ජෙලා ෆ්‍රෙඩ්රික්ස් සිකුරාදා ට්වීට් කළේය.
නමුත් ඕස්ට්‍රේලියාවේ ස්ථීරභාවය ලැබෙන තුරු මේ පවුල කිසිදා ආරක්ෂිත නොවනු ඇත.
ප්‍රියා නඩරාජා සහ නඩේසලිංගම් මුරුගප්පන් දශකයකට පමණ පෙර ඔස්ට්‍රේලියාවට වෙන වෙනම බෝට්ටුවලින් පැමිණ සරණාගතභාවය සඳහා ඉල්ලීම් කර ඇත. ඔවුන්ගේ දෙමළ වාර්ගිකත්වය නිසා ශ්‍රී ලංකාවේ හිංසා පීඩාවලට බියෙන් සිටින බව ඔවුහු පවසා තිබිණ.
ඔවුන් බිලෝලා හි තාවකාලිකව පදිංචි වී සිටි අතරතුර මුණගැසී, විවාහ වී ගැහැණු ළමයින් දෙදෙනෙකු ද ලැබූහ. දැරියන්, කෝපිකා (07) සහ තර්නිකා(04) වෙයි.
නමුත් පවුලට ඕස්ට්‍රේලියාවේ සිටීමට නීත්‍යානුකූල අයිතියක් නොමැති බවට තීරණය කිරීමෙන් පසු රජය 2018 දී ඔවුන් රඳවා තබා ගත්තේය.
බිලෝලා හි ප්‍රදේශවාසීන් මුරුගන් පවුලේ නිදහස සඳහා සටන් කළ අතර, ජාතික සහයෝගය සහ මන්ත්‍රීවරුන්ගේ සහාය දිනා ගත් ව්‍යාපාරයක් ආරම්භ කළහ.
සරණාගතභාවය සඳහා වූ ඉල්ලීම නැවත තක්සේරු කිරීම සඳහා පවුල දිගු නීතිමය අරගලයක් ද ගෙන ගියේය.
පවුල පිටුවහල් කිරීමට ගත් උත්සාහ දෙකකින් පසු, 2019 දී උසාවි වාරණ නියෝගයක් මගින් ඔවුන්ගේ නඩුව විසඳන තුරු ඔවුන් රටින් ඉවත් කළ නොහැකි බව තීන්දු කළේය. මේ වනවිට ඔවුන් දින 1,500 කට වැඩි කාලයක් සංක්‍රමණ රැඳවුම් භාරයේ ගත කර ඇත. එයින් වැඩි ප්‍රමාණයක් ඔවුන් ගතකළේ ඕස්ට්‍රේලියාවවේ සරණාගතයින් රඳවා තබන ක්‍රිස්මස් දූපතේ ය.
පසුගිය වසරේ, තර්නිකාට හදිසි වෛද්‍ය ප්‍රතිකාර අවශ්‍ය වූ පසු ඔවුන් එහි සිට පර්ත් හි ප්‍රජා රැඳවුම් මධ්‍යස්ථානය වෙත ගෙන යන ලදී.
දිගු කලක් රඳවා තබා ගැනීම හේතුවෙන් ඔවුන්ට සැලකිය යුතු හානියක් සිදුවී ඇති බව මින්පෙර පවසා තිබිණ. ප්‍රියා පැවසුවේ වසර ගණනාවක් රැඳවුම් භාරයේ සිටීම නිසා ඇයට මානසික අවපීඩනයසහ දුර්වලබව ඇති වූ බවයි.
මේ අතර, පවුල රඳවා තබන විට යන්තම් මාස නවයක් වූ තර්නිකා – දුර්වල පෝෂණය හේතුවෙන් දිරාපත් වූ දත් ඉවත් කිරීමට 2019 දී සැත්කමක් කිරීමට සිදුවිණ. තවත් අසනීපයක් නිසා ඇය පසුගිය වසරේ ද සති දෙකක් රෝහලේ ගත කළාය.
සරණාගතයින් සම්බන්ධයෙන් ඕස්ට්‍රේලියාව සිය දැඩි ප්‍රතිපත්ති සම්බන්දව තර්ක කරන නමුත් මිනිස් ජාවාරම් සහ මුහුදේදී සිදුවන මරණ වළක්වන නමුත් එක්සත් ජාතීන් එහි ප්‍රවේශය අමානුෂික බව විවේචනය කරයි.
