දකුණු ඉන්දියාවේ තමිල්නාඩු ප්‍රදේශයේ කෝවිලක ආගමික පෙරහරක් අතරතුර සිදුවූ විදුලි සැර වැදීමකින් 11දෙනකු මියගොස් 15 දෙනකු තුවාල ලබා තිබේ.
තන්ජාවුර් දිස්ත්‍රික්කයේ දී කෝවිලේ රථය අධි සම්ප්‍රේෂණ සජීවී කම්බියක් හා ගැටීමෙන් අනතුර සිදුව ඇති බව පොලිසිය පවසයි.
මියගිය අය අතර කුඩා දරුවන් දෙදෙනකු ද සිටිති. තුවාල ලැබූවන්ගෙන් සමහරකුගේ තත්ත්වය බරපතල බැවින් මරණ සංඛ්‍යාව ඉහළ යා හැකි බව බලධාරීහු පවසති.
සිද්ධිය සම්බන්ධයෙන් පොලිසිය පරීක්ෂණ ආරම්භ කර ඇත.
ඇසින් දුටු සාක්ෂිකරුවන් පැවසුවේ, පාරේ වතුර වළක් නොතිබුනේ නම්, අනතුර මීට වඩා වැඩි විය හැකි බවයි – රථය අසලින් ගමන් ගත් බැතිමතුන් 50 ක් පමණ වතුර වල මගහැර යෑමට, විදුලි සැර වැදීමට තත්පර කිහිපයකට පෙර පැත්තකට වී ඇත. රථය සම්පූර්ණයෙන්ම විනාශ වී ඇත.
පොලිස් නිලධාරීන් පැවසුවේ පෙරහැර මාර්ගයේ පිහිටි අධි වෝල්ටීයතා රැහැණ සාමාන්‍යයෙන් අක්‍රිය කරන බවයි. නමුත් මෙවර විදුලි රැහැන් ස්පර්ශ කිරීමට තරම් උසට අශ්ව රථය නොතිබූ නිසා සැපයුම කපා හැරියේ නැත.
“නමුත් එහි සැරසිලි හේතුවෙන් උස වැඩි වී ඇති අතර එය සජීවී වයරය සමඟ ස්පර්ශවී තිබේ.”
තමිල්නාඩු මහ ඇමති එම්.කේ. ස්ටාලින් අනතුර සිදුවූ ස්ථානය නැරඹීමට සහ විපතට පත් වූවන්ගේ පවුල්වල සාමාජිකයින් හමුවීමට තන්ජාවුර් වෙත යමින් සිටියි. ඔහුගේ කාර්යාලය අනතුරින් මියගිය අයගේ පවුල් සඳහා රුපියල් 500,000ක ($ 6,542) මූල්‍ය ආධාර ප්‍රකාශයට පත් කර ඇත.
අග්‍රාමාත්‍ය නරේන්ද්‍ර මෝදි ට්විටර් පණිවුඩයක් නිකුත් කරමින් කියා සිටියේ අනතුර සම්බන්ධයෙන් තමා දැඩි වේදනාවට පත් වූ බවයි. “මෙම ශෝකජනක පැයේදී මගේ සිතුවිලි වියෝ වූ පවුල් සමඟයි” යනුවෙන් ඔහු සටහන් කර තිබිණි. මියගිය අයගේ පවුල්වලට රුපියල් 200,000ක ($ 2,608) ආධාර ලබා දෙන බවට ද හෙතෙම පොරොන්දු විය.
