අප්‍රිකාවෙන් හමුවූ අතිශය දරුණු ඔමික්‍රෝන් කොරෝනා විකෘති ප්‍රභේදය යුරෝපයෙන් ද වාර්තා වී තිබේ.
ඕමික්‍රෝන් ආසාදිත පළමු යුරෝපීය රෝගියා ලෙස හඳුනාගෙන ඇත්තේ බෙල්ජියමේ කාන්තාවකි. ඇය දකුණු අප්‍රිකාවේ සංචාරය නොකළ අයකු වීම ද විශේෂත්වයි. නමුත් ඇය තුර්කියේ සහ ඊජිප්තුවේ සංචාරය කර පැමිණ තිබිණි.
මීට අමතරව ජර්මනියේ සහ චෙක් ජනරජයේ ද වාර්තා වූ කොරෝනා ආසාදිතයන් කිහිප දෙනකු ඔමික්‍රෝන් ප්‍රභේදය ආසාදනය වූ අය යැයි සෞඛ්‍ය බලධාරීන් සැකකරයි. එම ආසාදිතයන්ගේ ද ජාන අනුක්‍රමික වාර්තා ලබාගැනීමට යොමුකර ඇත.
දකුණු අප්‍රිකාවේ සිට නෙදර්ලන්තය බලා පැමිණි ගගුවන් මගීන් 600 දෙනකුගෙන් 61 දෙනකු කොරෝනා ආසාදිත බවට හඳුනාගෙන ඇති අතර ඔවුන් ද ඔමික්‍රෝන් ප්‍රභේදය ආසාදනය වූ අය බවට සැකයක් පවතී. මේ වනවිට ඔවුන් දැඩි ආරක්ෂිත නිරෝධායන ක්‍රියාවලියකට යොමුකර ඇති අතර ඔවුන්ගේ ද ජාන විශ්ලේෂණ පරීක්ෂණ සිදුකිරීමට කටයුතු කර තිබේ.
දැඩි විකෘතිභාවයකින් යුත් මෙම ඔමික්‍රෝන් කොවිඩ් ප්‍රභේදය ඩෙල්ටා ප්‍රභේදයට සාපේක්ෂව එන්නත් ප්‍රතිශක්තිකරණය මගහැරීමේ සම්භාවිතාව සීයයට 40කින් වැඩි යැයි පර්යේෂකයෝ කියති.
