වායු දූෂණය තව දුරටත් දරුණු අතට හැරීම හේතුවෙන් ඉන්දියාවේ දිල්ලි අගනුවර බලධාරීන් විසින් සියලුම පාසල් සහ විශ්වවිද්‍යාල දින නියමයක් නොමැතිව වසා දමා ඇත.
නොවැම්බර් 21 දක්වා ඉදිකිරීම් කටයුතු ද තහනම් කර ඇති නමුත් ප්‍රවාහන හා ආරක්ෂක සම්බන්ධ ව්‍යාපෘති සඳහා පමණක් අවසර දී තිබේ.
නගරයේ ඇති ගල් අඟුරු බලාගාර 11න් ක්‍රියාත්මක වීමට අවසර දී ඇත්තේ පහකට පමණි.
දීවාලි උත්සවය පැවති දා සිට විෂ සහිත මීදුමකින් දිල්ලිය වැසී ගියේය.
නගරයේ වායු ගෝලයේ මේ වනවිට පවතින, පෙනහළු වලට හානි කළ හැකි මට්ටමේ අහිතකර අංශු ප්‍රතිශතය, ලෝක සෞඛ්‍ය සංවිධානයේ (WHO) ආරක්ෂිත අගයන්ට වඩා බෙහෙවින් වැඩි ය. නගරයේ ප්‍රදේශ කිහිපයක අඟහරුවාදා 400ට ආසන්න හෝ ඊට වැඩි අගයන් වාර්තා වූ අතර එය “දරුණු” ලෙස වර්ගීකරණය කර ඇත.
වායු තත්ත්ව දර්ශකය හෝ AQI අගය 0-50 අතර අගයක් “හොඳ” ලෙස සලකනු ලබන අතර, 51-100 අතර “සතුටුදායක” වේ.
වායු දූෂණය හේතුවෙන් සමහර පාසල් පසුගිය සතියේ සිට වසා දමා තිබූ අතර දිල්ලි රජය පැවසුවේ වාතයේ ගුණාත්මකභාවය වැඩි දියුණු කිරීම සඳහා වාහන නගරයට ඇතුළු වීම පාලනය කිරීමට අගුලු දැමීමක් ගැන කල්පනා කරන බවයි. සේවකයින්ගෙන් 50% කට නිවසේ සිට වැඩ කිරීමට ඉඩ දෙන ලෙස පුද්ගලික කාර්යාලවලට උපදෙස් දී තිබේ.
මෙම වසරේ, පරිසර දූෂණය කෙතරම් දරුණු වී තිබේද යත්, එය ඉන්දියාවේ ශ්‍රේෂ්ඨාධිකරණයේ දැඩි අනතුරු ඇඟවීමක් කිරීමට හේතු වූ අතර, ගැටලුව විසඳීම සඳහා “හදිසි” පියවර ගන්නා ලෙස ප්‍රාන්ත සහ ෆෙඩරල් ආන්ඩුවලට උපදෙස් දුන්නේය.
