ඉන්දීය ක්රිකට් නායක විරාත් කෝලිගේ මාස 10ක් වයසැති දියණියට අතවර කරන බවට අන්තර්ජාලය ඔස්සේ තර්ජනය කළ පුද්ගලයෙකු අත්අඩංගුවට ගෙන ඇතැයි ඉන්දීය මාධ්ය වාර්තා වේ.
ඔහු බදාදා දකුණු හයිද්රාබාද් නගරයේ දී අත්අඩංගුවට ගෙන ඇත.
ලෝක කුසලාන ටී – 20 තරඟාවලියේ තරග පරාජයට පත්වීමෙන් පසුව ඉන්දීය කණ්ඩායමට අන්තර්ජාලය ඔස්සේ එල්ල කරන තර්ජන රැල්ලකට මුහුණ දීමට සිදුව තිබේ.
ඉන්දියාව තම පරම ප්රතිවාදී පාකිස්තානය හමුවේ පරාජයට පත්වීමෙන් පසුව මෙවැනි ක්රියා වැඩි වී ඇතැයි ඉන්දීය මාධ්ය පවසයි.
එය ලෝක කුසලාන තරගාවලියක දී ඉන්දියාව පාකිස්තානය හමුවේ පරාජය වූ පළමු අවස්ථාව විය.
පාකිස්තානයට එරෙහි තරගය අවසන් වූ විගස, ඉන්දීය ක්රිකට් කණ්ඩායමේ එකම මුස්ලිම් ජාතිකයා වන මොහොමඩ් ෂාමි අන්තර්ජාලය හරහා දැඩි ලෙස අපයෝජනයට ලක් විය. සමහර සමාජ මාධ්ය භාවිතා කරන්නන් ඔහු හිතාමතාම පාකිස්තානු කණ්ඩායමට ලකුණු ලබා දුන් බවට චෝදනා කරමින් ඔහුට ද්රෝහියෙකු ලෙස නම් කළේය.
ෂාමිට එල්ල වූ නොනවතින ප්රහාර වලට එරෙහිව කතා කිරීමෙන් පසුව කෝලිට ද ප්රහාරයක් එල්ල විය.
කෝපයට පත් බොහෝ රසිකයින් කෝලීට සහ ඔහුගේ බිරිඳ බොලිවුඩ් නිළි අනුෂ්කා ෂර්මා වෙත කෝපාවිෂ්ඨ පණිවිඩ යොමු කළහ. ඉන්දීය කණ්ඩායමේ බලාපොරොත්තු සුන් කරවන ක්රීඩා කිරීම සම්බන්ධයෙන් ඇතැම් රසික රසිකාවියන් ඇයට ද දොස් පවරා තිබිණ.
පොලිසිය පැවසුවේ අත්අඩංගුවට ගැනීම කෝලි සහ ෂර්මාට එරෙහිව අපහාසාත්මක ප්රකාශ කළ බව කියන ට්විටර් ගිණුම් කිහිපයක් සම්බන්ධයෙන් මුම්බායි නගරයේ සිදු කෙරෙන විමර්ශනයක කොටසක් බවයි.
නිර්නාමික ගිණුමකින් පළ කරන ලද දියණියට අතවර කිරීමේ තර්ජනයට එරෙහිව කෝලිගේ කළමනාකරු පොලිස් පැමිණිල්ලක් ගොනු කර තිබුණි. කුඩා දැරියට එල්ල වූ තර්ජනය සම්බන්ධයෙන් දිල්ලි කාන්තා කොමිසම දිල්ලි පොලිසියට නොතීසි ද යවා තිබුණි.
ප්රාදේශීය මාධ්ය වාර්තා කරන පරිදි අත්අඩංගුවට ගත් 23 හැවිරිදි පුද්ගලයා හයිද්රාබාද් හි ජීවත් වන ඉංජිනේරුවෙකි. ඔහු විසින් සිදුකළ බව කියන අතවර තර්ජනයේ පිටපත් සමාජ මාධ්යවල ප්රචලිත වීමෙන් පසුව, ඔහු පාකිස්තානයේ පදිංචිකරුවෙකු ලෙස පෙනී සිටීම සඳහා ට්විටර් හි ඔහුගේ නම වෙනස් කර ඇති බව ද වාර්තා වේ. ඉන්දියානු කරුණු පිරික්සුම් වෙබ් අඩවියක් පසුව ඔහු ඉන්දියානුවෙකු ලෙස හඳුනාගෙන ඇත.