සර්වෝදය ව්‍යාපාරයේ නිර්මාතෘ ආචාර්ය ඒ.ටී ආරියරත්න කොළඹ පෞද්ගලික රෝහලකදී අද (16) සවස අභාවප්‍රාප්ත වූයේ ය.
ගාල්ල උණවටුන ප්‍රදේශයේදී 1931 නොවැම්බර් මස 05 වැනිදා උපත ලැබූ ඒ.ටී.ආරියරත්න උණවටුන මහා විද්‍යාලයෙන්ද ද්විතීක අධ්‍යාපනය ගාල්ල මහින්ද විද්‍යාලයෙන් ද ලබා ඇති අතර විද්‍යෝදය විශ්වවිද්‍යාලයෙන් උසස් අධ්‍යාපනය ලබා ඇත.
මියයනවිට 92 වැනි විය පසුකර සිටි ආරියරත්න, ශ්‍රී ලංකා දේශපාලනයේ සහ ප්‍රජා සංවර්ධනයේ අඛණ්ඩ ක්‍රියාකාරිකයකු ලෙස ප්‍රසිද්ධියට පත්ව සිටියේය.
කොළඹ නාලන්දා විද්‍යාලයේ හිටපු ගුරුවරයකු ද වන හෙතෙම කලක් මානව හිමිකම් කොමිෂන් සභාවේ කොමසාරිස්වරයකු ලෙසද කටයුතු කළේය.
සර්වෝදය නිර්මාතෘවරයා වූ ඒ.ටී.ආරියරත්න එය වසර 63කටත් වැඩි කාලයක් මෙරට විශාලතම රාජ්‍ය නොවන ව්‍යාපාරය ලෙස පවත්වානෙ යාමට සමත්වූයේය.
ආචාර්ය ආරියරත්නයන් ජාතිය සහ ජනතාව වෙනුවෙන් කළ කැපවීම වෙනුවෙන් ජාතික හා ජාත්‍යන්තර සම්මාන රාශියක්ද දිනාගත්තේය.
ඔහු ඉහළම ජාතික සම්මානය වන ශ්‍රී ලංකාභිමාන්‍ය සම්මානය ජනාධිපතිවරයා අතින් 2007 වර්ෂයේ දී ද , ප්‍රජා නායකත්වය සඳහා රැමන් මැග්සේසේ සම්මානය (පිලිපීනය) 1969 වර්ෂයේදී ද සාමය හා මානව යහපැවැත්ම සඳහා ඔහුගේ දායකත්වය වෙනුවෙන් බෝඩොයින් රාජ්‍ය සම්මානය (බෙල්ජියම) 1982 වර්ෂයේදීද නිවානෝ සාම ත්‍යාගය (ජපානය) 1992 වර්ෂයේදීද සහ මහත්මා ගාන්ධි සාම ත්‍යාගය (ඉන්දියාව) 1996 වර්ෂයේදීද මෙසේ දිනාගෙන ඇත.
ඔහුගේ අවසන් කටයුතු පසුව දැනුම් දෙනු ලැබේ.
