පොලිස්පති දේශබන්දු තෙන්නකෝන්ට පොලිස්පති කාර්යාලයේ රාජකාරී කිරීම වළක්වාලමින් නියෝගයක් නිකුත්කරන්න යැයි ඉල්ලා හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර ඊයේ (18) ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනුකළාය.
ඇය විසින් එම පෙත්සමේ වගඋත්තරකරුවන් ලෙස ජනාධිපති ලේකම් සමන් ඒකනායක, කතානායක මහින්ද යාපා අබේවර්ධන, ආණ්ඩුක්‍රම ව්‍යවස්ථා සභාවේ සාමාජිකයන් සහ නීතිපතිවරයා නම්කර ඇත.
2022 මැයි 09 වන දින ගාලු මුවදොරදී සාමකාමී විරෝධතාකරුවන්ට පහරදීමේ සිද්ධියට අදාළව කොටුව මහේස්ත්‍රාත් අධිකරණය හමුවේ ඇති නඩුවේ දී පොලිස්පති දේශබන්දු තෙන්නකෝන් සැකකරුවකු ලෙස නම් කිරීමට නීතිපතිවරයා විසින් දැනුම් දී ඇති බව පෙත්සම්කාරිය සඳහන් කර තිබේ.
දේශබන්දු තෙන්නකෝන් හිටපු හමුදා සෙබළෙකුගේ මූලික අයිතිවාසිකම් කඩ කළ බවට ශ්‍රේෂ්ඨාධිකරණ තීරණය කර ඇති බවද ඇය පෙන්වා දී තිබේ.
මෙම පත්කිරීම නීතියේ ආධිපත්‍යයට ඍජු ප්‍රහාරයක් එල්ල කරන බවත්, එහි ප්‍රතිඵලයක් ලෙස ආණ්ඩුක්‍රම ව්‍යවස්ථාවේ 12(1) වගන්තිය මගින් සහතික කර ඇති පෙත්සම්කාරියට සහ රටේ පුරවැසියන්ගේ අයිතිවාසිකම් ප්‍රතික්ෂේප කිරීමක් සහ විශේෂයෙන්ම 41(වගන්තියේ) පැහැදිලි ව්‍යවස්ථාමය ප්‍රතිපාදන නොසළකා හැරීමක් සිදුවන බවත් පෙත්සම්කාරිය වැඩිදුරටත් කියා සිටියි.
