රුසියාවේ මොස්කව් අසල ප්‍රසංග ශාලාවකට ප්‍රහාර එල්ල කළ බවට සැක කෙරෙන තුවක්කුකරුවන් හතර දෙනාම අත්අඩංගුවට ගත් බවත්, ප්‍රහාරය පිටුපස සිටි අය සොයා නිසි දඬුවම් ලබාදෙන බවත් ජනාධිපති ව්ලැඩිමීර් පුටින් පවසා තිබේ.
ප්‍රහාරයෙන් මියගිය සංඛ්‍යාව මේවනවිට 133 දක්වා ඉහලගොස් ඇත. රෝහල්ගතව ප්‍රථිකාර ලබව සංඛ්‍යාව 107ක් බව රුසියානු රෝහල් ආරංචිමාර්ග පවසයි.
සටන්කාමී ඉස්ලාමීය කන්ඩායමක් වන ISIS සංවිධානය ප්‍රහාරයේ වගකීම භාරගත් නමුත්, රුසියානු බලධාරීන්ගේ සාකය යුක්රේනය දෙසට එල්ල වී තිබේ.
රූපවාහිනියේ පෙනී සිටිමින් පුටින් පැවසුවේ තුවක්කුකරුවන් හතර දෙනා ඇතුළුව පුද්ගලයින් 11 දෙනෙකු අත්අඩංගුවට ගෙන ඇති බවයි.
“ඔවුන් සැඟවීමට උත්සාහ කර යුක්රේනය දෙසට ගමන් කළ අතර, මූලික දත්ත වලට අනුව, රාජ්ය දේශසීමාව තරණය කිරීම සඳහා යුක්රේන පැත්තෙන් කවුළුවක් සූදානම් කර ඇත,” ඔහු පැවසීය.
“මෙම අපරාධය කළ සියලුම අපරාධකරුවන්, සංවිධායකයින් සහ මෙම අපරාධයට අණ දුන් සියලු දෙනාට, ඔවුන් කවුරුන් වුවද, ඔවුන්ට මඟ පෙන්වන්නා කවුරුන් වුවද, සාධාරණ හා නොවැළැක්විය හැකි දඬුවම් ලැබෙනු ඇත. රුසියාවේ අපගේ ජනතාවට එරෙහිව මෙම කුරිරු ක්‍රියාව සූදානම් කළ සියලු දෙනා හඳුනාගෙන දඬුවම් කරන්නෙමු.”පුටින් පැවසීය.
රුසියාවේ FSB ආරක්ෂක සේවය පැවසුවේ තුවක්කුකරුවන් යුක්රේනය සමග සබඳතා පැවැත්වූ බවත් දේශසීමා ආසන්නයේදී ඔවුන් අල්ලා ගත් බවත්ය. ඔවුන් මොස්කව් වෙත ගෙන එන බවත් එහි සඳහන් විය.
යුක්රේන ජනාධිපති සෙලෙන්ස්කි පැවසුවේ, වරද වෙනතකට යොමු කිරීමට උත්සාහ කිරීම පුටින්ට සහ “අනෙකුත් නිලධාරීන්ට” සාමාන්‍ය දෙයක් බවයි.
යුක්රේන හමුදා බුද්ධි ප්‍රකාශක පැවසුවේ, “ඇත්ත වශයෙන්ම යුක්රේනය මෙම ත්‍රස්ත ප්‍රහාරයට සම්බන්ධ වූයේ නැහැ. යුක්රේනය රුසියානු ආක්‍රමණිකයන්ගෙන් ස්වෛරීභාවය ආරක්ෂා කරමින්, ස්වකීය භූමි ප්‍රදේශය නිදහස් කර ගනිමින් සටන් වදිමින් සිටින්නේ සිවිල් වැසියන් සමඟ නොව ආක්‍රමණික හමුදාව සහ හමුදා ඉලක්ක සමඟයි.”
