පොදු ව්‍යාපාර පිළිබඳ පාර්ලිමේන්තු කාරක සභාව හෙවත් කෝප් කමිටුවට නව සභාපතිවරයකු පත් කිරීම සම්බන්ධව එහි සාමාජිකයින් කිහිප දෙනෙකු අද සිය ඉල්ලා අස්වීම භාර දී ඇතැයි වාර්තා වේ.
විපක්ෂයේ පාර්ලිමේන්තු මන්ත්‍රීවරුන් වන ශානකියන් රසමානික්කම් (ටීඑන්ඒ), හේෂා විතානගේ (සජබ) සහ එස් එම් මරික්කාර් (සජබ) කෝප් කමිටුවෙන් ඉවත් වූ නවතම සාමාජිකයන් බවට පත්ව ඇත.
ශ්‍රී ලංකා පොදුජන පෙරමුණේ (SLPP) පාර්ලිමේන්තු මන්ත්‍රී චරිත හේරත් ද කෝප් කමිටුවෙන් ඉවත් වීමට තීරණය කළ බව අද පෙරවරු වේ වාර්තා විය. “මම කෝප් කමිටුවෙන් (පොදු ව්‍යාපාර පිළිබඳ කාරක සභාව) ඉල්ලා අස්වීමට තීරණය කර ඇති අතර මගේ තීරණය අද පාර්ලිමේන්තුවේ කථානායකවරයාට නිල වශයෙන් දන්වා ඇත,” ඔහු ට්විටර් නිවේදනයක් නිකුත් කරමින් කියා සිටියේය.
මීට පෙර ශ්‍රී ලංකා නිදහස් පක්ෂ පාර්ලිමේන්තු මන්ත්‍රී දයාසිරි ජයසේකර කෝප් කමිටුවෙන් ඉල්ලා අස්වූයේ චෝදනා කිහිපයක් එල්ල වී ඇති සභාපතිවරයෙකු සමඟ කටයුතු කළ නොහැකි බව පවසමිනි.
“ශ්‍රී ලංකා පොදුජන පෙරමුණ (SLPP) අරගලයෙන් ඉගෙන ගෙන ජනතාවට ගරු කිරීමට අපොහොසත් වීම කනගාටුවට කරුණකි. දූෂණයෙන් වළකින ලෙස රාජ්‍ය නිලධාරීන්ට උපදෙස් දීමට නම් පාර්ලිමේන්තුවේ ඇති කාරක සභා ද දූෂණයෙන් තොර විය යුතුය” යනුවෙන් ඔහු ට්විටර් නිවේදනයක් නිකුත් කරමින් වැඩිදුරටත් පැවසීය.
සමගි ජන බලවේගයේ (SJB) පාර්ලිමේන්තු මන්ත්‍රී ඉරාන් වික්‍රමරත්න ඊයේ කෝප් කමිටුවෙන් ඉවත් වීමට තීරණය කළ පළමු සාමාජිකයා බවට පත්වීමෙන් පසුව මෙම ඉල්ලා අස්වීම් සිදු විය.
“රජයට මූල්‍යමය කොටස් හිමිවන රාජ්‍ය සංස්ථා සහ අනෙකුත් අර්ධ රාජ්‍ය ආයතනවල මුල්‍ය විනය පිළිපැදීම සහතික කිරීම සඳහා කෝප් කමිටුව පිහිටුවා ඇත. ආණ්ඩු පක්ෂ මන්ත්‍රීවරයෙකු එහි සභාපතිවරයා ලෙස පත්කිරීමෙන් ආණ්ඩුවේ විධායක හස්තය පාලනය කිරීමේ අරමුණු ඉටුකර ගැනීමට කමිටුව අපොහොසත් වන බව ඔහු නිවේදනයක් නිකුත් කරමින් කියා සිටියේය.
