දකුණු ඉන්දියාවේ කේරළ ප්රාන්තයේ, භාරතීය ජනතා පක්ෂයේ (BJP) ප්රාදේශීය නායකයෙකු ඝාතනය කිරීමේ චෝදනාවට වරදකරුවන් වූ පුද්ගලයන් 15 දෙනෙකුට එරට අධිකරණයක් මරණ දඬුවම නියම කර තිබේ.
රංජිත් ශ්රීනිවාසන් 2021 වසරේදී ඔහුගේ පවුලේ සාමාජිකයන් ඉදිරිපිට ඝාතනය කරන ලදී.
වරදකරුවන් 15 දෙනා 2022 දී තහනම් කරන ලද ආන්දෝලනාත්මක මුස්ලිම් කණ්ඩායමක් වන Popular Front of India (PFI) සමඟ සබඳතා ඇති අය බව පොලිසිය පවසයි.
වරදකරුවන්ට මෙම දඬුවමට එරෙහිව ඉහළ උසාවියක් තුළ අභියාචනයක් ඉදිරිපත් කළ හැකිය.
කේරළයේ ඇලප්පුසා දිස්ත්රික්කයේ අධිකරණයක් විසින් මෙම පුද්ගලයින් වරදකරුවන් බවට පත් කර ඇත.
අඟහරුවාදා, මරණීය දණ්ඩනය නියම කිරීමෙන් පසු, ශ්රීනිවාසන්ගේ බිරිඳ ලීෂා පැවසුවේ සැමියාගේ අහිමි වීම දරාගත නොහැකි නමුත්, තීන්දුව සහනයක් වූ බවයි.
ශ්රීනිවාසන් 2021 දෙසැම්බර් 19 වන දින ඇලප්පුසා හි ඔහුගේ නිවසේදී ඔහුගේ මව, බිරිඳ සහ දියණිය ඉදිරිපිට කපා කොටා ඝාතනය කරන ලදී.
අපරාධකරුවන් 15 දෙනාගෙන් 8 දෙනෙකු ඝාතනයට සෘජුවම සම්බන්ධ බවත් තවත් පිරිසක් නිවසින් පිටත ආයුධ අතැතිව මුරකර සිටි බවත් පොලිසිය විමර්ශනයේදී සොයා ගෙන ඇත.
සමහර පිරිමින් PFI හි සාමාජිකයින් වූ අතර අනෙක් අය එහි දේශපාලන ඒකකය වන ඉන්දීය සමාජ ප්රජාතන්ත්රවාදී පක්ෂයට (SDPI) අයත් වූහ. 2022 දී භාරතීය ජනතා පක්ෂය ප්රමුඛ ෆෙඩරල් ආන්ඩුව ත්රස්තවාදී කණ්ඩායම් සමඟ සම්බන්ධ බවට චෝදනා කරමින් PFI වසර පහකට තහනම් කළේය.
ශ්රීනිවාසන්ගේ ඝාතනය සිදුවූයේ ඇලප්පුසා හි එස්ඩීපීඅයි නායකයෙකු වූ කේ එස් ෂාන් ඝාතනය කර පැය කිහිපයකට පසුවය. ශ්රීනිවාසන් සහ ෂාන්ගේ පිට පිට ඝාතනය කේරළ ජනතාව කම්පනයට පත් කරමින් ජාතික සිරස්තල බවට පත්වී තිබුණි.
