අද(17) දකුණු තායිලන්තයේ ස්ථාන 17 ක පිපිරීම් සහ ලැව්ගිනි ඇති වූ බව බලධාරීහු පැවසූහ.
බෝම්බ ප්‍රහාර සහ ගිනි තැබීම් මධ්‍යම රාත්‍රියෙන් පසුව සිදු වූ අතර, පොලිස් සහ හමුදා ප්‍රකාශයන්ට අනුව, පළාත් තුනක් පුරා වෙළඳසැල් සහ ඉන්ධන පිරවුම්හලක් ඉලක්ක කර මෙම ප්‍රහාර එල්ලවී තිබේ. එහිදී අවම වශයෙන් හත් දෙනෙකුට සුළු තුවාල සිදු විය.
ප්‍රහාරවල වගකීම මෙතෙක් කිසිවකු භාරගෙන නැත.
තායිලන්තයේ දකුණේ, මැලේසියාව සමඟ මායිම දිගේ පිහිටි ප්‍රදේශ වල, දශක ගණනාවක් තිස්සේ කැරැලිකාර කණ්ඩායම් විසින් මෙවැනි ප්‍රචණ්ඩ ක්‍රියා සිදුකරයි. ප්‍රධාන වශයෙන් මුස්ලිම්වරුන් වෙසෙන පට්ටානි, යාල, නාරතිවත් සහ සොන්ග්ක්ලා හි ප්‍රදේශ සඳහා නිදහස අපේක්ෂා කරන මොවුන් සමග තායිලන්ත රජය සටන් මෙහෙයවයි.
ප්‍රචණ්ඩත්වය නිරීක්‍ෂණය කරන ඩීප් සවුත් වොච් කණ්ඩායමට අනුව 2004 සිට ඇතිවූ ගැටුම් වලින් පුද්ගලයන් 7,300 කට වැඩි පිරිසක් මිය ගොස් ඇත.
2013 දී ආරම්භ වූ සාම සාකච්ඡා නැවත නැවතත් කඩාකප්පල් කිරීම් වලට මුහුණ දී තිබේ.
වසංගතය හේතුවෙන් වසර දෙකක විරාමයකින් පසු තායි රජය මේ වසර මුලදී ප්‍රධාන කැරලිකාර කණ්ඩායම වන බරිසන් රිවොලූසි නැෂනල් සමඟ සාකච්ඡා නැවත ආරම්භ කිරීමෙන් පසුව මෙම ප්‍රහාර එල්ල විය.
නවතම සාකච්ඡා වටයෙන් පසෙකට වී සිටි පටානි යුනයිටඩ් ලිබරේෂන් ඹ්ගනයිසේෂන් (PULO), එම සංවාදය ඇතුළත් නොවන බව පවසමින් ශුද්ධ වූ මුස්ලිම් රාමසාන් මාසය තුළ බෝම්බ ප්‍රහාර එල්ල කළේය. රජය සියලු කණ්ඩායම් සමඟ සාකච්ඡා කිරීමට සූදානම් බව පවසා තිබේ.
සංවිධානයේ නායක කස්තුරි මඛෝටා රොයිටර් පුවත් සේවයට පැවසුවේ බදාදා ප්‍රහාරයන්ට “PULO කණ්ඩායමේ කිසිදු සම්බන්ධයක් නැත” යනුවෙනි.
