පකිස්තානයේ හිටපු අගමැති ඉම්රාන් ඛාන් අත්අඩංගුවට ගැනීමෙන් පසු රටපුරා ඇතිවූ විරෝධතා හේතුවෙන් පුද්ගලයින් අට දෙනෙකු මිය ගොස් ඇත. විරෝධතාකරුවන් 1,400 කට ආසන්න පිරිසක් අත්අඩංගුවට ගෙන ඇතැයි පොලිසිය පවසයි.
මෙම ගැටුම්වලින් පොලිස් නිලධාරීන් 145 කට වැඩි පිරිසක් තුවාල ලබා ඇතැයි ද පොලිසිය පවසයි.
ප්‍රචණ්ඩත්වය මැඩපැවැත්වීම සඳහා හමුදාව කැඳවා ඇති අතර රාජ්‍ය දේපළවලට තවත් ප්‍රහාර එල්ල කිරීමට එරෙහිව විරෝධතාකරුවන්ට අනතුරු අඟවා තිබේ.
හිටපු අගමැතිවරයා රඳවා සිටින පොලිස් ගෙස්ට් හවුස්හි දැඩි ආරක්‍ෂාවක් පනවා තිබේ. මෙම ස්ථානය අධිකරණ ශාලාවක් ලෙසද ක්‍රියාත්මක වෙයි.
ඛාන් මහතාට එරෙහිව මැතිවරණ කොමිසම විසින් ඉදිරිපත් කරන ලද නඩුවේදී ඔහුගේ අගමැති ධුර කාලය තුළ රජයට ලැබුණු ත්‍යාග නීති විරෝධී ලෙස අලෙවි කළ බවට චෝදනා එල්ල විය.
එම චෝදනා ප්‍රතික්ෂේප කරන ඔහු පවසන්නේ තමන් සියලු නීතිමය අවශ්‍යතා ඉටු කළ බවයි.
ඛාන් මහතාගේ පාකිස්තාන් ටෙහ්රීක්-ඊ-ඉන්සාෆ් (පීටීඅයි) පක්ෂය කියා සිටියේ ඔහුට නීති උපදේශකයින් සඳහා ප්‍රවේශයක් නොමැති බවත්, ඔහු අත්අඩංගුවට ගැනීමේ නීත්‍යානුකූලභාවය පක්ෂය අධිකරණයේදී අභියෝගයට ලක් කරන බවත්ය.
පකිස්ථානයේ දූෂණ විරෝධී ආයතනයේ ක්‍රියාව රට පුරා ප්‍රචණ්ඩ විරෝධතාවලට තුඩු දී තිබේ. අගනුවරට සහ රටේ වඩාත්ම ජනාකීර්ණ පළාත වන පන්ජාබ් වෙත හමුදාව යවා ඇත.
කයිබර් පක්තුන්ක්වා පළාතේ බලධාරීන් ද ආරක්ෂාව සඳහා භට පිරිස් යොදවන ලෙස ඉල්ලා තිබේ.
“අපි ආවේ සාමකාමී උද්ඝෝෂණයක් කරන්න, නමුත් මේ පොලිසිය අපිට ෂෙල් වෙඩි ප්‍රහාර එල්ල කරනවා,” ගල් හා පොල්ලක් අතැතිව ශල්‍ය වෙස් මුහුණක් පැළඳ සිටි එක් අයෙක් පැවසීය.
“අපි මැරෙන තුරු හෝ ඔවුන් ඉම්රාන් නිදහස් කරන තුරු මෙම විරෝධතාව දිගටම කරගෙන යන්නෙමු. නැතිනම් අපි මුළු රටම වසා දමමු.” විරෝධතාකරුවෝ පැවසූහ.
ඛාන් මහතා අගමැති ධුරයට පත්වී වසර හතරක් ගතවීමටත් පෙර පසුගිය අප්‍රේල් මාසයේදී බලයෙන් පහ කෙරිණි.
නොවැම්බරයේදී වසිරාබාද් නගරයේ ජනතාව අතර මැතිවරණ ප්‍රචාරක කටයුතුවල යෙදී සිටියදී ඔහුගේ කකුලට වෙඩි වැදී ඇත.
ප්‍රහාරය එල්ල කළේ ජ්‍යෙෂ්ඨ බුද්ධි නිලධාරියෙකු බවට ඔහු චෝදනා කර ඇත – එය හමුදාව විසින් තරයේ ප්‍රතික්ෂේප කරන ලදී. ඔහු අත්අඩංගුවට ගැනීමට දිනකට පෙර, එම චෝදනාව නැවත කිරීමට එරෙහිව ඛාන් මහතාට හමුදාව අනතුරු අඟවා තිබුණි.
ඛාන් මහතාගේ පාර්ශවය පවසන්නේ ඔහුට අධිකරණ නඩු 100කට වැඩි ප්‍රමාණයකට මුහුණ දීමට සිදුවී ඇති බවයි.
ඔහුගේ ආධාරකරුවන් තර්ක කරන්නේ වත්මන් රජයට ඔක්තෝම්බර් මාසයේදී පැවැත්වීමට නියමිත මහ මැතිවරණයට ඔහුට තරඟ කිරීම තහනම් කිරීමට අවශ්‍ය බවයි.
ඛාන් මහතාගේ පීටීඅයි රජයේ මානව හිමිකම් පිළිබඳ හිටපු අමාත්‍ය ආචාර්ය ශිරීන් මසාරි බීබීසීයට පැවසුවේ ඛාන් මහතා රඳවාගෙන සිටින ආකාරය රාජ්‍ය පැහැර ගැනීමකට සමාන බවයි.
“හමුදාව පවා මේ ආකාරයෙන් උසාවියේ පරිශුද්ධභාවය අපයෝජනය කරනු ඇතැයි අපි අපේක්ෂා නොකරමු,” ඇය පැවසීය. කෙසේවුවද මහාධිකරණය මෙම අත්අඩංගුවට ගැනීම නීත්‍යානුකූල බව ප්‍රකාශයට පත් කළේය.
අන්තර්ජාල සේවා රට පුරා දැඩි ලෙස සීමා කර ඇති අතර අභ්‍යන්තර කටයුතු අමාත්‍යාංශයේ උපදෙස් මත සේවා අත්හිටුවා ඇති බව පකිස්ථාන විදුලි සංදේශ බලධාරීහු පවසති.
පාසල් ද වසා දමා ඇති අතර සමහර මහාමාර්ග අවහිර කර ඇත.
බොහෝ විශ්ලේෂකයින් විශ්වාස කරන්නේ ඛාන් මහතාගේ 2018 මැතිවරණ ජයග්‍රහණය සිදුවූයේ හමුදාවේ සහාය ඇතිව බවයි. එහෙත් වැඩෙන ආර්ථික අර්බුදයක් මධ්‍යයේ, ඔහු න්‍යෂ්ටික සන්නද්ධ පකිස්ථානයේ තිරය පිටුපස සිටින තීරණාත්මක ක්‍රීඩකයා වන බලගතු මිලිටරියට පක්ෂපාත නොවූ බවයි.
විපක්ෂයේ සිට ඔහු හමුදාවේ වඩාත්ම වාචික විවේචකයෙකු බවට පත්ව ඇත.
