අරුගම්බේ බෝක්ක වෙරළ තීරයට මියගිය තල්මසුන් කිහිප දෙනකුගේ සිරුරු ගොඩගසා ඇතැයි සමුද්‍ර ක්ෂීරපායීන් පිළිබඳ පර්යේෂිකාවක වන ආශා ඩි වෝස් මහත්මිය පවසයි.
මෙලස මියගොස් ඇත්තේ පිග්මි තල්මසුන් හෝ පයිලට් නමින් හඳුන්වන තල්මසුන් විශේෂයේ සත්ත්වයන් බව ද ඇය පවසයි. පසුගිය ඉරිදා (04) දා සිට මේ දක්වා දිනපතා වරින් වර තල්මස් සිරුරු 11 ක් පමණ අරුගම්බේ වෙරළට ගොඩගසා තිබූ බව ප්‍රදේශවාසීහු පවසති.
එම සිරුරු අරුගම්බේ බොක්කෙහි දකුණු දෙසට ආසන්නව සහ බොක්ක මැද කොටසේ පිහිටි පාලම අසළ තිබී ඇත. සාමාන්‍ය නොගැඹුරු මුහුදේ තනියම හෝ 10 දෙනකුගෙන් පමණ සමන්විත කුඩා කණ්ඩායම් වශයෙන් සැරි සරන මේ තල්මසුන්ගේ මරණයට නිශ්චිත හේතුවක් සොයාගත නොහැකි බව ද ඩි වෝස් මහත්මිය පවසා තිබේ.
මෙම තල්මසුන් රංචුවක් ධීවර දැල්වලට පැටලීමෙන් පසු ඉවත දමා ඇතැයි ද සැකයක් මතුවී තිබේ. කෙසේ වුව ද මෙම සතුන්ගේ මරණයට නිශ්චිත හේතුවක් සොයාගැනීමට නම් එම සිරුරු සම්බන්ධයෙන් පශ්චාත් මරණ පරීක්ෂණයක් පැවැත්විය යුතු බව ද පර්යේෂකයෝ කියති.
