නාර්ගානෝ – කරබාක් කළාපයේ සටන් නවත්වන ලෙස රුසියානු ජනපති ව්ලද්මීර් පුටින් ආර්මේනියාවෙන් හා අසර්බයිජානයෙන් ඉල්ලා ඇත. පුටින් මහතා එහිදී වැඩිදුරටත් සඳහන් කර ඇත්තේ ගැටුම් ඇතිවීම ඛේදවාචකයක් බවයි.ජාත්‍යන්තර නීතියට අනුව අසර්බයිජානයට අයත් වුවත් වාර්ගික ආමේනියානුවන් විසින් පාලනය කරනු ලබන කඳුකර ප්‍රදේශයේ ක්‍රියාකාරකම් සම්බන්දව මොස්කව් පාලනය දැඩි අවධානයෙන් සිටින බව ද පුටින් පවසයි.”මේ ගැටුම නුදුරු අනාගතයේදී අවසන් වනු ඇතැයි අපි බලාපොරොත්තු වෙමු.” යැයි එම රූපවාහිනී සාකච්ඡාවේදී පුටින් පැවසීය. ගැටුම පිළිබඳව ආර්මේනියානු අගමැති නිකොල් පෂිනියන් සමග නිරන්තර සබඳතා පවත්වන බවද පුටින් තවදුරටත් පැවසීය.රුසියාව, ඇමරිකාව සහ ප්‍රංශය ගැටුමට මැදිහත් වීමට සූදානම්ව සිටින නමුත් ඔවුන්ගේ සටන් විරාම ඉල්ලීම් වලට සටන් කරන පාර්ශවයන් එකඟ වී නොමැත.රුසියාවේ විදේශ බුද්ධි අංශ ප්‍රධනියා අඟහරුවාදා අනතුරු ඇඟවූයේ ඉස්ලාමීය සටන්කාමීන්ට රුසියාවට ඇතුළු වීමට ඉඩ සැලසෙන ස්ථානයක් බවට කලාපය පත්වෙනු ඇති බවටයි.රුසියාව සහ ආර්මේනියාව ආරක්ෂක ගිවිසුමකින් බැඳී සිටින නමුත් එය නාර්ගෝනෝ – කරබාක් කළාපය සඳහා අදාල නොවේ. රුසියානු හමුදා සහ යුධ ගුවන්යානා ද ආර්මේනියාවේ ස්ථානගතකර තිබේ.
