තායිලන්තයේ මැතිවරණයෙන් ජයග්‍රහණය කළ ප්‍රතිසංස්කරණවාදී තරුණ නායක පිටා ලිම්ජාරොඑන්රාත්ට අගමැති වීමට තරම් පාර්ලිමේන්තුවේ ඡන්ද ප්‍රමාණයක් ලබා ගැනීමට නොහැකි වී තිබේ.
දශකයකට ආසන්න කාලයක් පැවති ගතානුගතික හමුදා පාලනය ඡන්දදායකයින් ප්‍රතික්ෂේප කිරීමත් සමඟ පිටා ලිම්ජාරොඑන්රාත් මැයි මාසයේදී පැවති මැතිවරණයෙන් ජයග්‍රහණය කළේය.
ඔහුට පහළ මන්ත්‍රී මණ්ඩලයේ බහුතරයක් ඇති නමුත් ප්‍රමාණවත් තරම් සෙනෙට් සභිකයින් දිනා ගැනීමට නොහැකි විය. සෙනෙට් සභිකයන් 249 දෙනාම කලින් පැවති හමුදා ආන්ඩුවක් විසින් පත් කරන ලදී.
පිටා මහතා අවසන් මොහොතේ නෛතික අභියෝගවලට ද මුහුණ දෙයි, එය තවමත් ඔහුව නුසුදුස්සකු කළ හැකිය. මැතිවරණ නීති කඩ කිරීමේ චෝදනාව ඔහු ප්‍රතික්ෂේප කරයි.
“මම එය පිළිගන්නවා, නමුත් මම අත්හරින්නේ නැහැ,” ඔහු වාර්තාකරුවන්ට පැවසීය. “මම යටත් නොවන අතර වැඩි සහයෝගයක් ලබා ගැනීමට මෙම කාලය භාවිතා කරමි.”
සෙනෙට් සභිකයින් 13 දෙනෙකු හැර අන් සියල්ලෝම පිටාගේ මූව් ෆෝවර්ඩ් පක්ෂයට විරුද්ධ විය. ඔහුට පක්ෂව ඡන්දයක් ලැබුණු සෑම අවස්ථාවකම පාර්ලිමේන්තුවෙන් පිටත රැස්ව සිටි පිරිසෙන් ප්‍රීති ඝෝෂා නැඟිණි – ඔවුන් විරුද්ධ වූ විට කෙඳිරිගාමින් හා විහිළු කළහ.
42 හැවිරිදි හාවඩ් උපාධිධාරී සහ හිටපු තාක්‍ෂණ විධායක නිලධාරියකු වූ පිටා ලිම්ජාරොඑන්රාත්ට ජයග්‍රහණය කිරීම සඳහා අවශ්‍ය වූයේ පාර්ලිමේන්තු සභා දෙකේ මන්ත්‍රීවරුන් 749 න් අඩකට වඩා වැඩි පිරිසකගේ ඡන්දයයි. ඒ අනුව ඔහුට අවශ්‍ය ඡන්ද ප්‍රමාණය වූ 375 ට වඩා 51 ක් අඩුවෙන් ඡන්ද 324 ක් ලබා ගැනීමට හැකි විය.
නීතිරීතිවලට අනුව, අගමැතිවරයෙකු තෝරා පත් කර ගන්නා තෙක් පාර්ලිමේන්තුව ඡන්දය ප්රකාශ කරයි – ලබන සතියේ තවත් ඡන්දයක් පැවැත්වීමට නියමිතය. නමුත් පිට මහතා එම අඩු ඡන්ද සංඛ්‍යාව දිනා ගන්නේ කෙසේද යන්න පැහැදිලි නැත.
එය තායිලන්තයේ මෑත වසරවල නිතර දක්නට ලැබුණු දේශපාලන කැළඹීම යළිත් ඇවිලීමේ අවදානම මතු කරයි – මිලියන ගණනක් තායිලන්ත වැසියන් තම රට සඳහා නව ආරම්භයක් සඳහා වූ බලාපොරොත්තු සුන් වී ඇති බව පෙනේ.
