කිරි බී වැඩෙන සත්ත්ව විශේෂයක් වූ මිනිස් සත්ත්වයාගේ ළදරුවන් පෝෂණය කිරීම සඳහා විකසනය වූ ස්ථන ග්‍රන්ථි සහිත කාන්තාවන්ගේ පියයුරු තරම් සාහිත්‍ය කරුවන්ගේ වර්ණනාවන්ට ලක්වූ වෙනත් ශරීර අවයවයක් නොමැති තරම්ය. නමුත් වර්තමානයේ කාන්තාවන් වැඩි දෙ‍නෙකුට ඉක්මණින්ම අහිමි වන්නේ ද පියයුරුය.
එයට හේතුවක් වී ඇත්තේ කාන්තාවන් විශාල පිරිසක් පියයුරු පිළිකාවලට ගොදුරුවීමයි. කාන්තාවන් අතර සුලබව දැකිය හැකි පියයුරු පිළිකාවල ප්‍රතිඵලයක් වන්නේ ඔවුන්ගේ පියයුරු ඉවත් කර ජීවිතය බේරාගැනීමට කටයුතු කිරීමිය. මෙය කාන්වාන්ට මුහුණ දීමට සිදුවන ඉතා කණගාටුදායක තත්ත්වයකි.
පියයුරක් හෝ පියයුරු දෙකම හෝ නොමැතිව සමාජයට මුහුණ දීමට බොහෝ කාන්තාවන් අකමැති වෙති. විශේෂයෙන් ම තරුණ වියේ දී ම පිළිකා හේතුවෙන් පියයුරු ඉවත්කිරීමට සිදුවීම ඇතැම් කාන්තාවන්ට පිළිකාව සුව වුව ද ජීවිත කාලය ම මානසික පීඩනයකට ලක්ව දිවිගෙවීමට සිදුවන කරුණක් බවට පත්ව තිබේ.
එවැනි ගැටලුකාරී තත්ත්වයන්ට මුහුණ දීමට සිදුවන කාන්තාවන් වෙනුවෙන් ගාල්ල කරාපිටිය ශික්ෂණ රෝහලේ ප්ලාස්ටික් ශල්‍ය වෛද්‍ය ඒකකය පියයුරු නැවත සැකසීමේ ප්ලාස්ටික් සැත්කම් ආරම්භ කර තිබේ.
ප්ලාස්ටික් සැත්කමක් සිදුකරන්නේ අඩු වී තිබෙන හෝ නැතිවී යන පටක හා අවයව යළි සකස් කිරීම සඳහාය. හදිසි අනතුරු හේතුවෙන් අහිමිවන අවයව, පිළිකා හේතුවෙන් ඉවත්කිරීමට සිදුවන අවයව, පිලිස්සීමෙන් විකෘතිවන සිරුරු කොටස්, ශල්‍යකර්ම හේතුවෙන් ඉවත්කරන සිරුරු කොටස් හා උපතින්ම විකෘති වී පිහිටා ඇති සිරුරු කොටස් යළි සැකසීම ප්ලාස්ටික් සැත්කම්වල දී සිදුකරනු ලබයි.
යම් කාන්තාවකගේ පියයුරු ඉවත් කිරීමට සිදුවුවහොත් ඊට පිළියම් ලෙස සිදුකරනු ලැබුවේ ඒ සඳහා සිලිකන් ආදේශක යොදා පියයුරු සැකමයි. නමුත් එය එතරම් සාර්ථක කාර්යයක් වූයේ නැත. එමෙන්ම උදරයේ හා පපුවේ පිටපස මාංශ පේෂි කොටසක් යොදාගනිමින් ද පියයුරු සැකසීම සිදුකෙරිණි. එවැනි සැත්කමකට භාජනය වන කාන්තාවන්ට හර්නියා වැනි අතුරු ආබාධ ඇතිවීම බහුලවීම හේතුවෙන් එලෙස පියයුරු සැකසීම ද එතරම් සාර්ථක ක්‍රමයක් ලෙස පිළිගැණුනේ නැත.
කරාපිටිය ශික්ෂණ රෝහලේ ප්ලාස්ටික් ශල්‍ය වෛද්‍ය ඒකකය පසුගිය දා පියයුරක් ඉවත්කළ තරුණියකට නව පියයුරක් සැකසීමේ සැතකමක් සාර්ථකව සිදුකළේ මෙරට කාන්තාවන් සැමට සුබ ආරංචියක් ගෙන එමිනි.
මේ සැත්කමට භාජනය වූයේ 37 හැවිරිදි වියේ පසුවන ගුරුවරියකි. ඇගේ දකුණු පියයුරෙහි ඇති වූ පිළිකාවක් හේතුවෙන් කරාපිටිය රෝහලේ දී එම පියයුර සම්පූර්ණයෙන් ම ඉවත්කිරීමට නියමිතව තිබිණි. පිළිකා ශල්‍ය වෛද්‍ය ජයමාල් ආරියරත්න මහතා එම සැත්කම කිරීමට කටයුතු සූදානම් කළ අතර ඔහුගේ දැනුම්දීම මත ප්ලාස්ටික් ශල්‍ය වෛද්‍ය සතිස් විජේමාන්න මහතා ඇයට නව පියයුරක් සැකසීමේ කාර්යය භාරගෙන තිබිණි. ඒ සම්බන්ධයෙන් ප්ලාස්ටික් ශල්‍ය වෛද්‍ය සතිස් විජේමාන්න මහතා මෙසේ කීවේය.
” කාන්තාවකගේ පියයුරක් ඉවත් කරනවා කියන්නේ ඇයට ඉතාමත් කණගාටුදායක තත්ත්වයක්. සමාජයට මුහුණ දීමට පවා එවැනි කාන්තාවන් මැළිකමක් දක්වනවා. ඒ සඳහා පිළියමක් ලෙස අපි තීරණය කළා මේ නව සැත්කම සිදුකරන්න. පිළිකාව පියයුරෙන් ඔබ්බට පැතිරී නැතිනම් ඉවත්කරන පියයුර වෙනුවට නව පියයුරක් බද්ධ කිරීමේ හැකියාවක් තිබෙනවා. මෙවැනි සැත්කමක් කරාපිටිය රෝහලේ සිදුකළ පළමු අවස්ථාව. අප මේ සඳහා සූදානමින් සිටිය දී මේ තරුණ කාන්තාව ඒ සඳහා ඇගේ කැමැත්තෙන්ම ඉදිරිපත් වුණා. අපි මෙහි දී සිදුකළේ ඇගේ පියවුර ඉවත් කළ වහාම උදරයෙන් පිටත සම සමඟ ලබාගත් මේද තට්ටුවක් බද්ධ කර නව පියයුරක් සැකසීම. මේ සැත්කම ඉතා සංකීර්ණයි. ඒ වගේම ප්‍රවේශමෙන් කළ යුතුයි. ඉවත්කළ පියයුර හා සමාන ආකාරයෙන් සැකසිය යුතු වෙනවා. දැන් එම සැත්කම සාර්ථක වී තිබෙනාව. ඉදිරියේ දී මෙවැනි සැත්කම් කරාපිටිය ශික්ෂණ රෝහලේ සිදුකිරීමට හැකියාව තිබෙනවා. එය කාන්තාවන්ට සුබදායී පණිවිඩයක්.”
වෛද්‍යවරු පවසන්නේ මෙලෙන නව පියයුරක් සකසන්නේ නම් එය එම සැත්කමට භාජානය වන කාන්තාවගේ ම පටක යොදා සැකසීම වඩාත් සුදුසු බවයි. එහි දී ලෝකයේ වඩාත්ම පිළිගන්නා ක්‍රමය වන්නේ උදරයේ සම සහිතව මේද පටක කොටසකින් පියයරු සැකසීමේ සැත්කමයි. කරාපිටියේ දී සිදුකර ඇත්තේ එවැනි සැත්කමකි. මේ ආකාරයේ සැත්කමක් කළ නොහැකිනම් පමණක් උදරයේ සහ පපුවේ ඇතුළත පටක යොදාගෙන පියයුරු සැකසීමේ පෙර පැවැති ක්‍රමය හා සිලිකන් යොදා පියයුරක් සැකසීමේ සැත්කම් ක්‍රමය භාවිතා වේ. මේ අනුව මෙරට කාන්තාවන්ට ලෝකයේ හොඳම පියයුරු සැකසීමේ සැත්කම් ක්‍රමය කරාපිටියේ දී සිදුකර ගැනීමේ පහසුකම උදාවී ඇත.
නිර්වින්දන විශේෂඥ වෛද්‍ය කේෂරී ද සිල්වා මහත්මිය මෙම තරුණ කාන්තාව නිර්වින්දනය කිරීමෙන් පසු ඇගේ දකුණු පියයුර ඉවත්කිරීමේ සැත්කම විශේෂඥ ශල්‍ය වෛද්‍ය ජයමාල් ආරියරත්න මහතාගේ මෙහෙයවීමෙන් සිදුකෙරිණි. ඉන් අනතුරුව පියයුරු බද්ධ කිරීමේ සැත්කම ආරම්භ කෙරිණි. මාසයක පමණ කාලයක සිට සිදුකරන ලද පූර්ව සැළැස්මට අනුව ඇගේ උදරයේ පිටත සම ද සහිතව මේද තට්ටුවෙන් ප්‍රමාණවත් තරම් කොටසක් ප්ලාස්ටික ශල්‍ය වෛද්‍ය සතිස් විජේමාන්න මහතා ඇතුළු වෛද්‍ය කණ්ඩායම විසින් ඉවත් කෙරිණි. ඉන් අනතුරුව එම කොටස් ඇගේ ඉවත් කළ දකුණු පියයුර තිබූ ස්ථානයේ නව පියයුරක් ලෙස සකස් කෙරිණි. උදරයේ මේද කොටස් ඉවත්කළ ස්ථානය ද මසා දැමිණි. මේ සැත්කම සඳහා පැය 10ක පමණ කාලයක් ගතවූ බව වෛද්‍යවරු කියති.
පැය 12ට වැඩි කාලයක් නිර්වින්දනය වී සිටි තරුණිය සිහිලැබූ පසු වාට්ටුවට ගෙන ආවාය. ඇය ක්‍රමයෙන් පූර්ණ සුවය ලැබූ අතර ඇගේ උදරයේ දක්නට ලැබුණේ සිසේරියන් සැත්කමක දී සිදුකරන කැපුමක් වැනි තුවාලයක් පමණි. පියයුර සැකසීමේ දී යොදා තිබූ මැහුම් තුවාල ද ඉක්මණින්ම වියලී ගිය අතර දින හතකට පසු ඇය සම්පූර්ණ සුවය ලබා රෝහලින් පිටව ගියාය.
සැත්කම සිදුකළ විශේෂඥ විජේමාන්න මහතා පවසන්නේ නිර්මාණය කළ පියයුර ද ඇගේ පෙර තිබූ පියයුර ප්‍රමාණයටම සැකසූ බවයි. නමුත් කාන්තාවකගේ පියයුර ඉතා දැඩි සංවේදී ප්‍රදේශයක් වුව ද අලුතෙන් සකසන ලද පියයුරට ඇත්තේ සාමාන්‍ය ස්පර්ශ දැනීමක් පමණක් බවත් ඔහු පවසයි.
මේ සැත්කම සඳහා විශේෂඥ ප්ලාස්ටික් ශල්‍ය වෛද්‍ය සතිස් විජේමාන්න, වෛද්‍ය තුෂාර රාජකරුණා, වෛද්‍ය තරිඳු වි‍ජේරත්න, වෛද්‍ය සුපුන් මධුරංග, වෛද්‍ය කසුන් සේනානායක, වෛද්‍ය අමන්දා දන්තනාරායන, වෛද්‍ය සිවරාජ් අගිලන් යන මහත්ම මහත්මීහු දායක වූහ. එමෙන්ම ඒ සහ බී ශල්‍යාගාර භාර ප්‍රධාන හෙද නිලධාරී ජී.කේ.ගුණපාල මහතා ද දැක්වූ දායකත්වය අතිමහත්ය.
Diep free flap Brest reconstructions නමින් හඳුන්වන මෙම සැත්කම් ශ්‍රී ලංකාවේ සිදුකිරීම පියයුරු පිළිකා හේතුවෙන් පීඩාවිදින කාන්තාවන්ට සුබදායී පණිවිඩයක් වනු ඇත.
