අනවසර ඉදිකිරීම් සම්බන්ධයෙන් නව පනතක් ගෙන එමට ඉදිරියේදී කටයුතු කරන බව පාර්ලිමේන්තු මන්ත්‍රී වසන්ත යාපා බණ්ඩාර මහතා පවසයි.
ඔහු ඒ බව පැවසුවේ අද(29) මහනුවර පැවති මාධ්‍ය හමුවක් අමතමිනි.
මහනුවර, බූවැලිකඩ ප්‍රදේශයේ පස් මහල් නිවසක් කඩාවැටී එකම පවුලේ තිදෙනෙකුට මිය යාමේ සිද්ධිය සම්බන්ධයෙන් මාධ්‍යවේදීන් නැගු ප්‍රශ්නවලට පිළිතුරු දෙමින් ඒ මහතා මේ බව පැවසීය.
අනවසර ඉදිකිරීම සිදුකර දඩ මුදල් ගෙවා එයින් බේරීයාමට නොහැකි වන පරිදි නව පනතට කරුණු ඇතුළත් කරන බවද මන්ත්‍රීවරයා එහිදී පැවසීය.
මේ අතර, ඉකුත් 20දා මහනුවර බූවැලිකඩ සංඝමිත්තා මාවතේ කඩාවැටුණු පස්මහල් නිවසේ හිමිකරු වන අනුර ලෙව්කේ ව අපරාධ චෝදනා යටතේ මහනුවර පොලීසියේ අපරාධ විමර්ශන අංශය විසින් අද (29) අත්අඩංගුවට ගනු ලැබීය.
ඔහු දොඩම්වල නාථ දේවාලයේ හිටපු බස්නායක නිළමේවරයා වේ.
නොසැලිකිලිමත් ඉදිකිරීම් ක්‍රියාවකින් තිදෙනෙකුට මරණය සිදුකිරීම සහ නිවාස කිහිපයකට අලාභහානි සිදුකිරීම යන චෝදනා යටතේ පොලීසිය සැකකරුට එරෙහිව නඩු පවරා ඇත.
තට්ටු තුනක් පමණක් ඉදිකිරීම සඳහා අනුමැතිය ලබාදී තිබියදී නිවසේ හිමිකරු එම සැළසුම්වලට පිටින් යමින් මහල් පහක ගොඩනැගිල්ලක් ඉදිකර තිබෙන බවත් එහි අත්තිවාරම මහල් පහක බර දරා ගැනීමට නොහැකි මට්ටමේ එකක් බව පරීක්ෂණ මගින් හෙළිවූ බවත් මහනුවර ජ්‍යෙෂ්ඨ පොලිස් අධිකාරී සුදත් මාසිංහ මහතා සදහන් කළේය.
මෙම සැකකරුට එරෙහිව නඩු පැවරීමට පෙර පොලීසිය මහනුවර මහනගර සභාව, නාගරික සංවර්ධන අධිකාරිය, ජාතික ගොඩනැගිලි පර්යේෂණ ආයතනය, භූ විද්‍යා හා පතල් කාර්යාංශය ඇතුළු ආයතන ගණනාවකින් ගොඩනැල්ල සම්බන්ධ වාර්තා ලබාගෙන තිබිණි.
පස් මහල් ගොඩනැගිල් කඩා වැටීමෙන් අඹුසැමි යුවළක් හා ඔවුන්ගේ දින 49 ක් වයසැති දරුවා මරණයට පත්වූහ.
