මෙරට මුහුදු සීමාවේදී අවිධිමත් ලෙස තෙල් මුදාහැර සමුද්‍ර දූෂණය සිදු කිරීම නිසා ‘එම්ටී ග්ලෝබල් ක්‍රෙස්ට්’ නෞකාවෙන් රුපියල් කෝටි එක හමාරක (මිලියන 15ක) දඩ මුදලක් සමුද්‍රීය පරිසර ආරක්ෂණ අධිකාරිය මඟින් අය කරගෙන තිබේ.
මේ නෞකාව සිදු කළ සමුද්‍ර දූෂණය චන්ද්‍රිකා තාක්ෂණය ඔස්සේ හඳුනාගෙන ඇති අතර, චන්ද්‍රිකා තාක්ෂණය ඔස්සේ තහවුරු කරගැනීමෙන් පසු දඩයක් අය කරගත් පළමු අවස්ථාව මෙය වේ.
පසුගිය ජනවාරි 26 දින මැලේසියාවේ කේලෑං වරායේ සිට එක්සත් අරාබි එමිර් රාජ්‍යය දක්වා ගමන් කරමින් තිබූ මේ නෞකාව විසින් මෙම අවිධිමත් තෙල් බැහැර කිරීම ශ්‍රී ලංකා සමුද්‍ර කලාපයේදී සිදු කර ඇත. මේ බව චන්ද්‍රිකා තාක්ෂණය ඔස්සේ තහවුරු කරගැනීමෙන් පසු ප්‍රංශයේ CLS ආයතනයේ විශ්ලේෂකයන් පිරිසක් සමුද්‍රීය පරිසර ආරක්ෂණ අධිකාරියේ නිලධාරීන්ට දැනුම් දී තිබේ. මේ චන්ද්‍රිකා ඡායාරූප නිරීක්ෂණය කිරීමේදී කි.මී. 11.25ක දිගින් යුත් තෙල් පැල්ලමක් බවට තහවුරු කරගනු ලැබූ අතර, ඒ තෙල් පැල්ලම දළ වශයෙන් වර්ග කි.මී. 1ක් පමණ ප්‍රදේශයක පැතිර විහිදුණු තෙල් තට්ටුවක් බවට නිරීක්ෂණය වී ඇත.
ඒ අනුව වහා ක්‍රියාත්මක වූ සමුද්‍රීය පරිසර ආරක්ෂණ අධිකාරියේ නිලධාරීන් පෙබරවාරි 6 දින නෞකාව වෙත ගොස් ඒ පිළිබඳ විමර්ශනය කිරීමට පියවර ගෙන තිබිණි.
ඒ වන විට අදාළ නෞකාව කොළඔ වරායේ සිට නාවික සැතපුම් 11ක් පමණ දුරින් නැංගුරම් ලා තිබුණු අතර, නෞකාව විසින් අවිධිමත් ලෙස තෙල් බැහැර කිරීමක් සිදු කර ඇති බව තහවුරු කරගැනීමෙන් පසුව අධිකාරියේ නිලධාරීන් එම නෞකාවට රැඳවුම් නියෝගයක් නිකුත් කළේය.
2008 අංක 35 දරන සමුද්‍ර දූෂණ වැළැක්වීමේ පනතේ 26 වගන්තියට අනුව සමුද්‍රීය පරිසර ආරක්ෂණ අධිකාරිය විසින් ‘ග්ලෝබල් ක්‍රෙස්ට්’ නෞකාවට නියම කරන ලද්දේ, රුපියල් මිලියන 15ක දඩ මුදලක් හා එම නෞකාව පරීක්ෂා කිරීමට වැය වූ මුදල ගෙවන ලෙසයි. පසුගිය පෙබරවාරි 9 දින අදාළ දඩ මුදල සහ අධිකාරිය විසින් දරනු ලැබූ වියදම් ‘ග්ලෝබල් ක්‍රෙස්ට්’ නෞකාව විසින් පියවීමෙන් පසු ඒ නෞකාව රැඳවුම් නියෝගයෙන් නිදහස් කිරීමට පියවර ගන්නා ලදි.
මේ චන්ද්‍රිකා විශ්ලේෂණ ඡායාරූප CLS (Collected Localization satellite) ආයතනය මඟින් සපයන අතර, සමුද්‍රීය පරිසර ආරක්ෂණ අධිකාරිය හා CLS ආයතනය සමඟ අත්සන් කරන ලද ගිවිසුම අනුව වසරක කාලයක් සඳහා මේ චන්ද්‍රිකා විශ්ලේෂණ ඡායාරූප සපයනු ලබයි. මෙවැනි දිගු කාලීන ව්‍යාපෘතියක අවශ්‍යතාවද මෙමඟින් පිළිබිඹු වන බව සමුද්‍රීය පරිසර ආරක්ෂණ අධිකාරියේ සභාපති නීතිඥ අසේල බී. රැකව මහතා පවසයි.
