2020 වසරේ දී ශ්‍රී ලංකා ආර්ථිකය සියයට 1.7කින් පමණ පහළ යනු ඇතැයි ශ්‍රී ලංකා මහ බැංකුව පුරෝකථනය කරයි. ශ්‍රී ලංකා මහ බැංකුව විසින් “මෑතකාලීන ආර්ථික ප්‍රවණතා: 2020 සුවිශේෂ සිදුවීම් සහ 2021 අපේක්ෂා” ප්‍රකාශනය එළිදක්වමින් මේ බව කියා සිටී. එම වාර්තාවේ වැඩිදුරටත් මෙසේ සඳහන් වේ.

ශ්‍රී ලංකා ආර්ථිකය 2020 වසරේ දී කොවිඩ්-19 වසංගතය හේතුවෙන් දේශීය හා ගෝලීය වශයෙන් මතු වූ අභියෝග මධ්‍යයේ, 2019 වසරේ දී වාර්තා කළ සියයට 2.3ක වර්ධනයට සාපේක්ෂව, සියයට 1.7කින් පමණ පහළ යනු ඇතැයි පුරෝකථනය කර ඇත.

නිරතුරුව යාවත්කාලීන තොරතරුවල ප්‍රවණතාවලට අනුව, ආර්ථිකය වසරෙහි පළමු භාගයේ වාර්තා කළ පසුබෑමෙන් මිදී වසරෙහි දෙවන භාගයේ දී යහපත් වර්ධනයක් පෙන්නුම් කරමින් යථා තත්ත්වයට පත් වනු ඇතැයි අපේක්ෂා කෙරේ. දානට ප්‍රකාශිත නිල සංඛ්‍යාලේඛනවලට අනුව, ශ්‍රී ලංකා ආර්ථිකය 2019 වසරේ පළමු කාර්තුවේ දී වාර්තා කළ සියයට 3.7ක වර්ධනයට සාපේක්ෂව 2020 පළමු කාර්තුවේ දී සියයට 1.6කින් පහළ යන ලදී.

සමස්ත ආර්ථිකයේ මෙම පසුබෑම කෙරෙහි කර්මාන්ත කටයුතුවල ඇති වූ පසුබෑම බොහෝ දුරට හේතු වී ඇත. තවද, සහල්, ධාන්‍ය වර්ග, එළවළු සහ පලතුරු වගාවන් හි වර්ධනයක් වාර්තා කළ ද, තේ හා පොල් වගාවන් සහ ධීවර කටයුතුවල වාර්තා වූ පසුබෑම කෘෂිකාර්මික කටයුතු ද පහත වැටීමට හේතු විය. කෙසේ වුවද, මූල්‍ය සේවා, තොග හා සිල්ලර වෙළෙඳාම සහ වෙනත් පුද්ගලික සේවාවන් හි දක්නට ලැබුණු සැලකිය යුුතු වර්ධනය හේතුවෙන් සේවා කටයුතුවල ඇති වූ වර්ධනය, සමස්ත ආර්ථිකයේ පසුබෑම අඩුකිරීමට දායක විය.

කොවිඩ්-19 වසංගතයේ අහිතකර බලපෑම් හේතුවෙන් ප්‍රධාන ආර්ථික කටයුතු තුනම වසරේ දෙවන කාර්තුවේ දී පහත වැටෙනු ඇතැයි අපේක්ෂා කෙරේ. කෙසේ වෙතත්, කොවිඩ්-19 වසංගතය පාලනය කිරීම මෙන්ම ආර්ථික වර්ධනයට හිතකර මුදල් හා රාජ්‍ය මූල්‍ය ප්‍රතිපත්ති ස්ථාවරය සහ මහ මැතිවරණයෙන් පසුව ඉහළ නැංවුන ප්‍රතිපත්ති නිශ්චිතතාව හේතුවෙන් වසරේ දෙවන භාගයේ දී ආර්ථිකය යහපත වර්ධනයක් අත්පත් කර ගනු ඇතැයි අපේක්ෂා කෙරේ.

තවද, පොලී අනුපාතික අඩු මට්ටමක පැවතීම සහ ස්ථාවර දේශපාලන වාතාවරණය තුළ ව්‍යාපාරික විශ්වාසය වැඩිදියුණු වීම හේතුවෙන්, ආර්ථිකයෙහි පරිභෝජන හා ආයෝජන ඉල්ලුම ද ඉහළ යනු ඇතැයි අපේක්ෂා කෙරේ.

එසේ වුවද, ප්‍රධාන වෙළෙඳ හවුල්කාර ආර්තිකයන් යථා තත්ත්වයට පත්වීමට ගතවන කාලය පිළිබඳ අවිනිශ්චිත බව සහ 2020 ඔක්තෝබර් මස නිරීක්ෂණය කළ පරිදි රට තුළ කොවිඩ්-19 වසංගතය නැවත පැතිරීමට ඇති හැකියාව යන දේශීය සහ විදේශීය අංශයන්ගෙන් ඇති අභියෝග හේතුවෙන් ආර්ථික වර්ධනය කෙරෙහි අහිතකර බලපෑමක් ඇතිවිය හැකිය.