1882 දී ලන්ඩනයේ දී උපත ලබා 1956 දී මියගිය Alan Alexander Milne අතිශය ජනප්‍රිය “විනි ද පූ” ළමා පොත් පෙළේ රචකයායි. ඔහුගේ බොහෝ නිර්මාණ නාට්‍ය වන අතර ඔහු සහකාර සංස්කාරකවරයකු ලෙස කටයුතු කළ පන්චි සඟරාවේ ඔහුගේ නිර්මාණ පළවිය. ඔහුගේ කෘති තුළ දැකිය හැකි විශේෂිත ලක්ෂණය උපහාසයයි.
මෙය Alan Alexander Milne කෙටිකතාවකි. අනුවාදය ජගත්.ජේ.එදිරිසිං විසිනි.
කුරුල්ලන් ගැන මා දන්නා උලව්වක් නැත. එනමුදු එක්තරා දවසක මම කුරුලු විද්‍යාඥයෙකු බවට පත් කරනු ලැබුවෙමි. එය සිදු වූයේ මෙසේය.
එක්තරා දවසක හැම්ප්ෂයර්හි දී අපට වුකෝ කුරුල්ලාගේ නාදය ඇසුනි. (පසුවදා උදෑසන පුවත්පත් වල පළ වූයේ වොන්ෂයර් හි වුකෝ කුරුල්ලාගේ නාදය ඇසුන බවයි. සමහර විට ඌ වෙන එකෙක් වෙන්නැති. හැබැයි කොහෙත්ම අපේ කුරුල්ලා තරම් ඉහළ මට්ටමේ එකෙක් නම් වෙන්නට ඉඩක් නැත)
“ඇහුනද වුකෝ නාදය ?” මට එපාවන කෙක්ම නිවහනේ සිටි සැමදෙනාම සෑම කෙනෙකුගෙන් ම ඇසුවහ.
බොහෝ වතාවක් “ඇහුණා” යි උත්තර දීමෙන් මා කොයිතරම් වෙහෙසට පත්ව සිටියා ද කිවහොත් මේ සංවාදය තවත් රසවත් කිරීම පවා මට එපා විය.
ඒක් මට තවම පුම්බපු පිපිට් කුරුල්ලකුගෙ සද්දෙ නම් ඇහුණ නැහැ – මේ අවුරුද්දේ ඌ මේ කරම් පමා වීම නම් පුදුමයි. දහවන චකාවටක් “ඇහුණා” යි කියන්නට සිදුවීමෙන් පසුව මම බොහෝ සැහැල්ලුවෙන් කීවෙමි.
“පුම්බපු පිපිටි ? ඌත් කැලෑ පිපිට් වගේම කුරුල්ලෙක්ද ?” නිවැසිව කාන්තාව ඇසුවාය. ඈ මා හිතා හිටියාට වඩා කුරුල්ලන් ගැන දන්නා හැඩයි.
“අපොයි නැහැ” මම විගසින් කීවෙමි.
“මොකක්ද ? මේ හරියටම වෙනස ?”
“වෙනස නේද…? මෙහෙමයි. එකෙක් පුම්බපු එකෙක්. අනෙකා. ම්.. අනෙකා නිකම්ම කැලෑවේ ඉන්න එකෙක්.”
“ඕ. මට තේරුණා. ඇත්තටම උන් දෙගොල්ලන් ගෙම බිත්තරවල පුල්ලි තියෙනවා.” මම විශ්වාසය ඉහළ නංවා ගනිමින් කීවෙමි.
“මම හැම තිස්සෙම හිතන්නේ කුරුල්ලන් ගැන මෙයිට වඩා දැන හිටියා නම් හොඳයි කියලයි.” ඈ ස්තුති පූර්වකව කීවා.
දැන් ඔයාට පුළුවන් අපට උන් ගැන ටිකක් කියා දෙන්න”
“කරල හමාරයි.. කරුමක්කාර කුරුල්ලෙක් කළ දෙයක්.”
“ඇත්ත වශයෙන්ම.” ලන්ඩනයේ සිට කුරුල්ලන් ගැන ලියැවුණ පොතක් ගෙන්වාගන්නට කොයි තරම් කාලයක් ගත වේදැයි කල්පනා කරන අතරවාරයේ මම කීවෙමි.
ඒ වැඩය මා හිතූ තරම් අපහසු වූයේ නැත. අපි ගෘහෝද්‍යානයට වී සවස තේ පානය කරමින් සිටියෙමු. හදිසියේ මොකදෝ වර්ගයක කුරුල්ලෙක් කෑගැසුවේය.
“ආ…..” නිවැසි කාන්තාව කීවාය.
“මොකෙක්ද ? ඇහුනද….. ? ඒ මොකෙක් ද ?”
මම හිස හරවා ඇහුම් කන් දුන්නෙමි. කුරුල්ලා නැවත කෑ ගැසුවේය.
ඒ ලෙසර් බන්ටින් කුරුල්ලෙක්” මම විශ්වාසයෙන් කීවෙමි. “ලෙසර් බන්ටින්… ?” අවංක උනන්දු පෙනුමක් ඇති තරුණිය කෑගැසුවාය.
“මම කොහොම හරි ඒ නම මතක කියා ගන්න ඕනෙ”
“මොන පිස්සුද ?” මම සිතුවෙමි. කු
රුල්ලා නැවත කෑගැසුවේය. මේ වතාවේදී ආරක්ෂාකාරී ප්‍රහාරයක් එල්ල කරන්නට මම පරිස්සම් වූයෙමි.
“සමහර විට ඒකා සුදු බෙල්ල තියෙන සාඩිනියන් කුරුල්ලා වෙන්න බැරිත් නැහැ” මම කීවෙමි.
“බිත්තර දාන කාලෙට මේ ජාති දෙකටම තියෙන්නෙ එක වගේ නාදයක්. නමුත් ඇත්ත වශයෙන්ම උන් දෙගොල්ලන්ගෙම බිත්තර වල පුල්ලි තියෙනවා.” මම පහසුවෙන් එක් කළෙමි.
මුළු සවස් යාමය මේ ආකාරය ගත්තේය. මෙය කොයිතරම් පහසු කාර්යයක් දැයි ඔබටම වැටහෙනවා ඇති.
කෙසේ වුවද වඩාත් අවාසනාවන්ත සිදු වීම වූයේ පසුදා සවස් කාලයේදී ය. නියම කුරුලු විශේෂඥයෙක් සවස තේ පානයට ආවේ ය.
ඔහුගේ පැමිණීම කණ වැකුණ වහාම කුරුලු විශේෂඥයා නිරු – පද්‍රිතව පිටත් කර හරින තෙක් සකළ ලෝකවාසි සියලුම කුරුල්ලන් නිහඬ කර දෙන්නැයි මම දෙවියන්ගෙන් ඉල්ලා යාඥා කළෙමි. උන්වහන්සේ මගේ යාඥාවට කන් දුන්නේ නැත.
අපේ පිහාටුකාරයා තුරු අතර සිට සිය නාදය නැගුවේය.
“අන්ත නිවැසි කාන්තාව කීවාය. ඇහුනද අර ? කුරුල්ලා ආයෙමත් කෑ ගහනවා.. ඈ මා දෙසට හැරුණාය. මොකක්ද ඌට කීව නම ?”
විශේෂඥයා පළමුව කථා කරතැයි මම බලාපොරොත්තු වූයෙමි. එසේ වූවා නම් ඊයේ මා කියු කාරණා මේ පිරිස වරදවා වටහාගෙන ඇතැයි කියා ගැලවෙන්නට මට ඉඩ තිබුණි. එහෙත් අවාසනාවට ඒ මොහොතේ කුරුලු විශේෂඥයා බරපතල සැන්ඩ්විච් පෙත්තක් මහත් ඕනෑ කමින් ගිලදමමින් සිටියේය.
සියල්ල කෙසේ හෝ මතක තබාගන්නෙ මැයි පොරොන්දු වූ අවංක පෙනුමැති තරුණිය වැරදීමකින් හෝ යමක් කියතැයි බලාපොරොත්තුවෙන් මම ඇය දෙස බලා සිටියෙමි. මගේ ම අවාසනාව. ඇයද නිශ්ශබ්දය. අර කාලකණ්ණි කුරුල්ලා හැරෙන්නට අන් සියල්ලන්ම නිශ්ශබ්දය.
ප්‍රශ්නයක් නැහැ. නැවත වතා වක් මගේ දෛවය උරගා බලන්නට මම උත්සාහ කරන්නෙමි.
“ඒකා බ්ලැක්මන්ස් වෝබ්ලර්” ස්ථිර හඬින් කීවෙමි.
“අන්න හරි” නිවැසි කාන්තාව කීවාය.
“බ්ලැක්මන්ස් වෝබ්ලර් මට ඒක අමතක වෙන්නෙ නැහැ.” උනන්දු තරුණිය කීවාය. සැන්ඩ්විචය සමග හරඹය හමාර කර සිටි කුරුලු විශේෂඥයා මා දෙසට කෝප සහගත බැල්මක් ? හෙළුවේය.
“විකාර. ඔහු කීවේය. ඌ චිෆ් චැෆ්” අනෙක් සියල්ලෝ නින්දා සහගත බැල්මක් මදෙස හෙළුවෝය.
චිෆ් චැෆ්ට සොමර්සෙට්හි අපේ පළාතේ කියන නම බ්ලැක්මන්ස් වෝබ්ලර් තමයි යනුවෙන් කියන්නට මා සූදානම් වන මොහොතේ ම කුරුලු විශේෂඥයා නැවත කතා කළේය.
“ඌ චිෆ් චැෆ් ම තමයි” ඔහු අපේ නිවැසි කාන්තාවට කීවේ නොඉවසිය හැකි දැනුමක් ප්‍රදර්ශනය කරමිනි.
මෙය ඉවසා සිටින්නට නොහැකිය.
“මමත් මුලින් ම උගෙ සද්දෙ අහසු වෙලාවෙ හිතුව එහෙම” ඔහුට ආචාර සම්පන්න සිනහවක් පාමින් මම කීවෙමි.
දැන් නින්දා සහගත බැල්මක් හෙලීමේ කුරුලු විශේෂඥයාගේ වාරයයි.
“ඒ සද්ද දෙකම එක වගේම ද?” මගේ නිවැසි කාන්තාව වඩා උන්නදුවකින් ඇසුවාය.
“සත්තකින්ම. ඔය මහා විශේෂඥයොත් බ්ලැක්මස් වෝබ්ලර් ගෙ සද්දෙ බොහෝ විට විෆ් වැෆ් ගෙ සද්දෙත් එක්ක පටලවා ගන්නවා.” මම කුරුලු විශේෂඥයා වෙත හැරුණෙමි.
“තවත් සැන්ඩ්විච් එකක් කමුද? ඇත්ත වශයෙන්ම බිත්තර දාන කාලෙදි උන් දෙගොල්ලන්ගෙම සද්ද එක වගේ. නමුත් උන් දෙගොල් ලන්ගේම බිත්තර වල පුල්ලි තියෙනවා නමුත්….”
“මට විශ්වාසයයි…” කුරුලු විශේෂඥයා කී නමුදු ඔහු සසල වී සිටින බවක් පැහැදිළිවම පෙණිනි. විෆ් වැෆ් ගෙ සද්දෙ ඇහෙනකොට මට අඳුනන්න පුළුවන් වෙන්න ඕනෙ”
“හහ්… නමුත් ඔබ බ්ලැක්මන්ස් වෝබ්ලර් දන්නෙ නැහැනේ.? මේ පැත්තෙදි උගේ සද්දෙ අහන්න කෙනෙකුට ලේසියෙන් ඉඩක් ලැබෙන්නෙ නැහැ. නමුත් ඇල්ජියර්ස් පැත්තේ”
හරියටම මේ මොහොතේදිම කුරුල්ලා චිෆ් චැෆ් නාදය නැගූ වේය.
“අන්න… මම ජයග්‍රාහී ලෙස කීවෙමි. අහන්න.” මම ඇඟිල්ලක් එසැවූයෙමි.
“දැන් ඔබට තේරෙනවද වෙනස ? ස්ථිර වශ යෙන්ම බ්ලැක්මන්ස් වෝබ්ලර් තමයි.”
සියල්ලෝම කුරුලු විශේෂඥයා දෙස බැලුවහ. ලන්ඩනයේ සිට කුරුල්ලන් ගැන ලියැවුණ පොතක් ගෙන්වා ගන්නට කොයිතරම් කාලයක් වැය වේදැයි ඔහු සිතමින් සිටි බව මට විශ්වාසය. කෙසේ නමුත් අද හවස් වන විට නම් අලුත් පොතක් ගෙන්වා ගන්නට හැකියාවක් නැති බව ඔහුට වැටහෙනවා ඇති. කෙසේ හෝ මගේ මතය ප්‍රතික්ෂේප කරන්නට ඔහුට ධෛර්යයක් නොතිබුණ බව නම් සැබෑය.
“සමහර විට ඔබ හරි ඇති…..” ඔහු අකැමැත්තෙන් මෙන් කීවේය.
තවත් කුරුල්ලෙක් චිෆ් චැෆ් ගෑවේය. ත්‍යාගශීලි වීම නුවණට හුරුය. අන්න.. ඌ නම් චිෆ් චැෆ් කුරුල්ලෙක් මම කීවෙමි.
උගේ හඬත් කලින් කුරුල්ලාගේ හඬට ම සමාන බව උනන්දු සහගත තරුණිය (මෝඩ හරකි) කීවත් සැවොම මා පසසන්නට වෙහෙසෙමින් සිටි බැවින් කිසිවකු ඇය කෙරෙහි සැලකිල්ලක් දැක්වූ බවක් නොපෙණුනි.
සත්තකින්ම මා යළි කිසිදා මේ කුරුලු විශේෂඥයා මුණ නොගැසෙන්නට වග බලාගත යුතුය. මන්ද නිසැකවම ඔහු සිය පොත් සියල්ල පෙරලා බලන විට බ්ලැක් මන්ස් වෝබ්ලර් නමින් හැඳින්වෙන සත්ත්වයකු මේ මිහිපිට නැති බව නිසැකවම දැනගනු ඇති බැවිනි. නමුත් ඔබට නිසි සමාජයක් මුණ ගැසේ නම් එහිදී ඔබට වැරදි මිනිසුන් හමු වීමේ වාසනාව තිබුණේ නම් කුරුලු විශේෂඥයෙකු (හෝ වෙන ඕනෑම දෙයක් සම්බන්ධ විශේෂඥයෙකු) වීම ඉතා පහසු කාර්යයක් බව දැන් ඔබට වැටහිය යුතුය.
