වෙළඳපොලේ දැනට පවතින කීරි සම්බා සහල් හිඟයට තමන් වගකිව යුතු නැති බව මහා පරිමාණ සහල් සැපයුම්කරුවෙකු වන ඩඩ්ලි සිරිසේන මහතා පැවසීය.

මාධ්‍ය අමතමින් සිරිසේන මහතා පැවසුවේ නාඩු සහල් කිලෝවකට රුපියල් 270 සිට රුපියල් 170 දක්වා පහත වැටී ඇති බවයි. කෙසේ වෙතත්, කීරි සම්බා සහල් කිලෝවකට රුපියල් 260 කට ලබා ගත නොහැකි අතර, එයින් පෙන්නුම් කරන්නේ හිඟය ඇති වන්නේ බෙදා හැරීමට වඩා නිෂ්පාදනයෙන් බවයි.

“ගොවීන් නාඩු සහල් වැඩිපුර වගා කර ඇති අතර කීරි සම්බා අඩු වී ඇත. හිඟය නිසා ඔවුන් කීරි සම්බා අඩු මිලට විකිණීමට අකමැතියි. අපි නීතිය තුළ ක්‍රියා කළ යුතු අතර අපි අභියෝග කිහිපයකට මුහුණ දී සිටිමු. රජය සුදුසු විසඳුම් ලබා දෙන්නේ නම්, අපට බොහෝ ගැටලු විසඳා ගත හැකිය,” ඔහු පැවසීය.

වැසි සහ සුළං හේතුවෙන් රට පුරා විදුලි බිඳ වැටීම් 30,000ක් පමණ වාර්තාවන බව ලංකා විදුලි බල මණ්ඩලයේ මාධ්‍ය ප්‍රකාශක ධම්මික විමලරත්න පවසයි.

විදුලි බල වෘත්තීය සමිති මේ වන විට අකුරට වැඩ කිරීමේ වෘත්තීය සමිති ක්‍රියාමාර්ගයක නිරත වී සිටින බැවින් මෙම බිඳවැටීම් යථා තත්වයට පත්කිරීම තරමක් ප්‍රමාද විය හැකි බව විදුලි බල මණ්ඩල ශ්‍රී ලංකා නිදහස් සේවක සංගමය පවසා ඇත.

ලංකා විදුලි බල මණ්ඩලයේ සභාපති උදයංග හේමපාල පවසන්නේ බාධාවකින් තොරව එම නඩත්තු කටයුතු සිදු කෙරෙන බවයි.

හොරණ – මොරගහහේන මාර්ගයේ කනන්විල ප්‍රදේශයේ දී අද (04) දහවල් යතුරුපැදියක් සහ ලොරියක් ගැටීමෙන් සිදු වූ අනතුරකින්, තරුණ යුවළක් මියගොස් ඇතැයි පොලිසිය පවසයි.

මෙලෙස මියගොස් ඇත්තේ මොරගහහේන, බෙරුගැටිය ප්‍රදේශයේ පදිංචි වයස අවුරුදු 24ක තරුණයකු සහ වයස අවුරුදු 21ක තරුණියකි.

පොලිසිය පවසන්නේ ඔවුන් දෙදෙනා රෝහල්ගත කරන විටත් මියගොස් සිටි බවයි.

Photo – Accident 1st

2026 වර්ෂයේ දී 2025 වර්ෂයට සාපේක්ෂව ජනාධිපති වියදම් තුන් ගුණයකින් වැඩි වී ඇති බවට ඇතැම් මාධ්‍යවල පළවන තොරතුරු අසත්‍ය  බව මුදල් නියෝජ්‍ය අමාත්‍ය ආචාර්ය අනිල් ජයන්ත පවසයි.

මාධ්‍ය හමුවේ අදහස් දක්වමින් ඔහු සඳහන් කළේ රුපියල් බිලියන 2.9කින් ආරම්භ වූ 2025 වසිර්ජන පනත් කෙටුම්පතට ජාතික අයවැයෙන් දක්වා ඇති සම්පූර්ණ වියදම් ඇතුළත් නොවන බවයි. ක්ලීන් ශ්‍රී ලංකා ව්‍යාපෘති සඳහා රුපියල් බිලියන 5.05ක් වෙන වෙන ම වෙන් කර ඇති අතර නවෝත්පාදන හා වාණිජකරණයට අදාළ පර්යේෂණ සඳහා අමතර රුපියල් බිලියන 01ක් වෙන්කර ඇති බවත් ඔහු පෙන්වා දුන්නේ ය.

ඔහු වැඩිදුරටත් මෙසේ ද කීෆව්ය.

“2025 වර්ෂය සඳහා ජනාධිපති වියදම් සඳහා වෙන්කිරීම රුපියල් බිලියන 09යි. නමුත් මාධ්‍ය වාර්තා එය 2026 විසර්ජන කෙටුම්පත් වියදම් රුපියල් බිලියන 11.6ක් හැටියට සන්සන්දනය කරනවා. ක්ලීන් ශ්‍ර1ී ලංකා ව්‍යෘපෘතිය සහ පර්යේෂණ සඳහා වන වෙන් කිරීම් ද මේ කියන ගණනය කිරීම්වලට ඇතුළත් කරලා තමයි ඔවුන් පෙන්වා දෙන්නේ. මේ නිසා නොමඟ යවන සුළු තොරතුරු නිර්මාණය වී තිබෙනවා.”

අඩු වයස් ගැබ් ගැනීම් ශ්‍රී ලංකාව බරපතල සමාජ ප්‍රශ්නයක් බවට පත්ව තිබේ. සමාජ දැනුම්වත් කිරීම් සහ උපදේශන සේවාවන් හේතුවෙන් ක්‍රමයෙන් එවැනි ගැබ් ගැනීම්වල අඩුවීමක් දක්නට ලැබුණ ද තවමත් එය මෙරට සමාජ ප්‍රශ්නයක් බව පෙනෙන්නට තිබේ.

ශ්‍රී ලංකා පුවත්පත් ආයතනයේ FactSeeker 2016 අංක 12 දරණ තොරතුරු දැනගැනීමේ අයිතිවාසිකම පිළිබඳ පනත අනුව සෞඛ්‍ය අමාත්‍යාංශයෙන් කරන ලද විමසුමකට අනුව පවුල් සෞඛ්‍ය කාර්යාංශයෙන් ප්‍රජනක සෞඛ්‍ය කළමනාකරණ තොරතුරු පද්ධතිය මගින් ලබාගත් තොරතුරු අනුසාරයෙන් ලැබී ඇති තොරතුරු විශ්ලේෂණයේ දී අනාවරණය වන්නේ තවමත් අඩු වයස් ගැබ් ගැනීම් සඳහා ශ්‍රී ලංකාවේ නව යොවුන් වියේ තරුණියන් ගොදුරුවන බවයි.

අඩු වයස් ගැබ් ගැනීමක් ලෙස සලකනු ලබන්නේ වයස අවුරුදු 18ට අු ගැහැනු ළමයකු ගැබ් ගැනීමයි. මෙය ශ්‍රී ලංකාව ඇතුළු බොහෝ අඩු සහ මධ්‍යම ආදායම් ලබන රටවල් මුහුණ දෙන  සෞඛ්‍ය හා සමාජ-ආර්ථික ගැටලුවකි.

මේ හා සම්බන්ධව වර්තමානයේ ප්‍රවණතා සහ ව්‍යාප්තිය (Trends and Prevalence) පිළිබදව සලකා බැලීමේදී  ශ්‍රී ලංකාවේ නව යොවුන් වියේ ගැබ්ගැනීම්වල අනුපාතය පසුගිය වසර 05 තුළ ක්‍රමයෙන් අඩුවෙමින් පවතින බව පෙනී යයි.

2020 දී ශ්‍රී ලංකාවෙන් අඩු වයස් ගැබ් ගැනීම් 2657ක් වාර්තා වූ අතර, 2021 වර්ෂයේ දී අඩු වයස් ගැබ් ගැනීම් 2,349ක් වාර්තා විය. 2022 වර්ෂයේ දී අඩු වයස් ගැබ් ගැනීම් සංඛ්‍යාව 2,287ක් වාර්තා වී ඇතිඅ තර 2023 වර්ෂයේ දී එය 1,941ක් දක්වා පහත වැටී තිබිණි. 2024 වර්ෂයේ දී අඩු වයස් ගැබ් ගැනීම් වාර්තා වී ඇත්තේ 1872ක් පමණි. ඒ අනුව 2020 වර්ෂයට සාපේක්ෂව 2024 වර්ෂය වන විට වාර්ෂික අඩු වයස් ගැබ් ගැනීම් සංඛ්‍යාව 800කින් පමණ අඩු වී තිබීම හොඳ ප්‍රවාණතාවකි. එහෙත් එය සෑහීමකට පත්විය හැකි තත්වයක් නොවේ යැයි සෞඛ්‍ය අංශ පවසයි.

2024 වර්ෂයේ දී අඩු වයස් ගැබ් ගැනීම් වැඩිපුරම වාර්තා වී ඇත්තේ මඩකලපුව දිස්ත්‍රික්කයෙනි. එම සංඛ්‍යාව 158ක් වන අතර පුත්තලම දිස්ත්‍රික්කයෙන් ද 2024 වර්ෂයේ දී අඩු වයස් ගැබ් ගැනීම් 153ක් වාර්තා වී ඇත. ත්‍රිකුණාමලය දිස්ත්‍රික්කයෙන් 146ක්, ගම්පහ දිස්ත්‍රික්කයෙන් 140ක් සහ කල්මුණේ දිස්ත්‍රික්කයෙන් 95ක් වශයෙන් අඩු වයස් ගැබ් ගැනීම් වාර්තා වී තිබේ.

වෛද්‍යවරුන් පෙන්වා දෙන්නේ නව යොවුන් වියේ ගැබ්ගැනීම් මවට සහ දරුවාට යන දෙදෙනාටම බරපතල සෞඛ්‍ය හා සමාජ-ආර්ථික අවදානම් ගෙන එන බවයි.

එමෙන්ම නව යොවුන් වියේ මව්වරුන්ට පාසල් අධ්‍යාපනය අතරමග නැවැත්වීම, සීමිත රැකියා අවස්ථා සහ ආර්ථික දුෂ්කරතා වලට මුහුණ දීමට සිදුවීම බහුලව දක්නට ලැබෙන අතර, එමඟින් දරිද්‍රතාවයේ චක්‍රයක් ඇතිවිය හැකිය.

නව යොවුන් වියේ ගැබ්ගැනීම් සඳහා විවිධ සාධක බලපායි.අඩු අධ්‍යාපන මට්ටම, දිළිඳු පවුල් පසුබිම, සමහර ප්‍රජාවන් තුළ අඩු වයසින් විවාහ වීම හෝ විවාහයෙන් පසු ඉක්මනින් දරුවන් ලැබීම අපේක්ෂා කිරීම , ලිංගික හිංසනය, පවුල් ගැටුම් සහ නව යොවුන් වියේ යුවළ එකට ජීවත් වීමේ ප්‍රවණතාවයේ වැඩිවීමක් ද ඒ අතර ප්‍රධාන වේ.

නව යොවුන් වියේ ගැබ් ගැනීම් වැළැක්වීම මාතෘ මරණ අඩු කිරීමට, ස්ත්‍රී පුරුෂ සමානාත්මතාවය ප්‍රවර්ධනය කිරීමට සහ යෞවනයන්ගේ යහපැවැත්ම ඉහළ නැංවීමට ශ්‍රී ලංකාවේ ඉතා වැදගත් වන අතර  ඒ සඳහා සෞඛ්‍ය, අධ්‍යාපන සහ සමාජ අංශයන්ගෙන් ඉලක්කගත මැදිහත්වීම් අවශ්‍ය වේ.

හිටපු ජනාධිපතිවරුන්ගේ වරප්‍රසාද අහෝසි කිරීම සදහා වූ පනත සම්මත කිරීමත් සමඟ තමන් එතෙක් භාවිතා කළ විජේරාම නිල නිවසින් හිටපු ජනාධිපති මහින්ද රාජපක්ෂ ඉවත්ව තංගල්ලේ පිහිටි පුද්ගලික නිවසේ පදිංචියට ගිය ද එහි තිබූ භාණ්ඩ රැගෙන ගොස් නැත.

හිටපු ජනාධිපතිවරයා භාවිතා කළ නිල නිවස නැවත භාර ගැනීම සදහා ගිය රාජ්‍ය නිලධාරීන් පවසා සිටියේ එහි මහින්ද රාජපක්ෂ හිටපු ජනාධිපතිවරයාට අයත් බඩු භාණ්ඩ ඇති බවයි. ඒ අනුව එම භාණ්ඩ ඉවත්කරගන්නා ලෙස හිටිපු ජනාධිපතිවරයාට දැනුම් දී තිබේ.

එසේ දැනුම් දුන්න ද මහින්ද රාජපක්ෂ හිටපු ජනාධිපතිවරයාගේ පාර්ශවයෙන් පවසා ඇත්තේ නිල නිවසේ ඇති සියලු රජයේ භාණ්ඩ පළමුව ඉවත්කරගන්නා ලෙසයි. ඉන් පසු පුද්ගලික භාණ්ඩ ඉවත්කර ගැනීමට කටයුතු කරන බව ද දන්වා තිබේ.

හිිටපු ජනාධිපතිවරයා පුද්ගලික භාණ්ඩ කලින් ඉවත්කරගතහොත් රජයේ භාණ්ඩත් රැගෙන ගියා යැයි චෝදනාව එල්ල විය හැකි බැවින් ඔහු මෙම පියවර ගෙන ඇති බව දැනගන්නට ඇත.

විජේරාම මාවතේ නිවසේ ඇත්තේ හිටපු ජනාධිපතිවරයාගේ පුද්ගලික භාණ්ඩ, අග්‍රාමාත්‍ය කාර්යාලයට සහ රාජ්‍ය පරිපාලන ආමත්‍යාංශයට අයත් භාණ්ඩ බව ද පැවසේ.

රැකියාවල නිරත කාන්තාවන්ගේ මාතෘ නිවාඩු දීමනාවල බරපැන සියල්ල රජය විසින් දැරිය යුතු යැයි යෝජනාවක් මෙවර අයවැයට ඉදිරිපත් කිරීමට වෙරිටේ රිසර්ච් ආයතනය කටයුතු කර තිබේ.

වෙරිටේ රිසර්ච් ආයතනය මගින් පවත්වාගෙන යන Budget Proposal Hub වෙබ් අඩවියේ මේ යෝජනාව දක්නට ලැබෙන අතර එය දැනට ශ්‍රී ලාංකිකයන්ගේ ඉහළම මනාපය පළ වූ යෝජනාවක් බවට පත්ව ඇත.

රැකියාවල නියුතු කාන්තාවන්ගේ මාතෘ නිවාඩු දීමනාවල බරපැන මේ වනවිට දරනු ලබන්නේ ඔවුන් සේවය කරන ආයතන විසිනි. රාජ්‍ය ආයතනයක් නම් එය එම රාජ්‍ය ආයතනය විසසින් දරනු ලබන අතර පුද්ගලික ආයතනයක නම් එම බරපැන අදාළ ආයතනය හෝ සමාගම විසින් දැරිය යුතුය.  

නමුත්, මෙම තත්වය හේතුවෙන් කාන්තාවන්ට බලවත් අසාධාරණයක් වන බව ශ්‍රී ලංකාවේ සමාජ විද්‍යාත්ක, ආර්ථික සහ මාධ්‍ය ක්ෂේත්‍රයේ දීර්ඝ කාලයක් පර්යේෂණ සිදුකරන වෙරිටේ රිසර්ච් ආයතනය සිය පර්යේෂණ දත්ත මගින් පෙන්වා දෙයි.

වෙරිටේ රිසර්ච් පවසන්නේ ශ්‍රී ලංකාවේ පිරිමින්ට සාපේක්ෂව කාන්තාවන් වර්තමානයේ අධ්‍යාපනික සහ කුසලතා අතරින් ඉදිරියෙන් සිටිය ද දරුවන් ලැබිය හැකි වයසේ, එනම සාඵල්‍යතා වයසේ පසුවන කාන්තාවන්ට රැකියා අවස්ථා ලැබීමේ හැකියාව පිරිමින්ට වඩා සාපේක්ෂව 50%කින් පමණ අඩුවන බවයි. මෙයට හේතුව වන්නේ දරුවකු ලබන කාන්තාවකට ප්‍රසූත කාලයේ නිවාඩු, වැටුප් සහ දීමනා ලබාදීම අදාළ ආයතනය විසින් සිදුකිරීමට වීම බව වෙරිටේ රිසර්ච් පෙන්වා දෙයි.

මේ නිසා එම ආයතනය Budget Proposal Hub හි යෝජනාවක් ලෙස ශ්‍රී ලංකාවේ කාන්තාවන්ගේ මාතෘ නිවාඩුවල බරපැන සියල්ල රජය විසින් දැරිය යුතුය යන යෝජනාව ඉදිරිපත් කර ඇත. එයින් අපේක්ෂා කරන්නේ පුද්ගලික අංශයේ ආයතනවල දරුවන් ලැබීමේ වයසේ පසුවන කාන්තාවන් රැකියා සඳහා බඳවා ගැනීමට ඇති නොකැමැත්ත දුරු කර ඔවුන්ට වැඩි සේවා අවස්ථාවක් ලබාදීමයි.

ඔබට ද පහත සඳහන් සබැඳිය ඔස්සේ Budget Proposal Hub වෙත පිවිස මේ සඳහා ඔබේ කැමැත්ත ප්‍රකාශ කිරීමේ හැකියාව පවතී.

එංගලන්ත ආගමික ඉතිහාසයේ ප්‍රථම වතාවට කැන්ටබරි අගරදගුරු පදවියට කාන්තාවක නම්කර තිබේ.

බ්‍රිතාන්‍යයේ අගමැති කීර් ස්ටාර්මර් සිකුරාදා නිවේදනය කළේ එම අගරදගුරු තනතුර සඳහා ලන්ඩනියේ පිෂොප් සාරා මුල්ලලිගේ පත්කිරීමට කර ඇති යෝජනාවට චාල්ස් රජු විසින් අනුමැතිය ලබා දී ඇති බවයි. ඒ අනුව 2026 මාර්තු මාසයේ දී කැන්ටබරි ආසන දෙව්මැදුරේ පවත්වන දේව මෙහෙයක දී ඇය අගරදගුරු පදවියට පත්කෙරෙනු ඇත.

2014 දී කාන්තාවන්ට බිෂොප්වරුන් වීමට අවසර දීමෙන් පසු කැන්ටබරි හි අගරදගුරු පදවියට තේරී පත් වූ පළමු කාන්තා කාන්තාව මුල්ලලි ය.

එංගලන්ත පල්ලියේ අධ්‍යාත්මික නායකයා ලෙස, කැන්ටබරි අගරදගුරුතුමා රටවල් 165 ක් පුරා මිලියන 85 ක පමණ ජනතාවකින් යුත් ගෝලීය ඇන්ග්ලිකන් ප්‍රජාවකට නායකත්වය දෙයි.

ඇයගේ පත්වීමෙන් පසු ප්‍රකාශයක් නිකුත් කරමින් මුල්ලලි මෙසේ පැවසුවාය “මෙම නව දේවසේවයට ක්‍රිස්තුස් වහන්සේගේ කැඳවීමට මම ප්‍රතිචාර දක්වන විට, මම නව යොවුන් වියේදී ඇදහිල්ලට පැමිණි දා සිට මා පෙලඹවූ දෙවියන් වහන්සේට සහ අන් අයට සේවය කිරීමේ ආත්මයෙන්ම බැඳී සිටිිමි. ඒ ගමනේ සෑම අදියරකදී ම, මගේ හෙද වෘත්තිය සහ ක්‍රිස්තියානි දේවසේවය හරහා, මිනිසුන්ට ගැඹුරින් සවන් දීමට සහ දෙවියන් වහන්සේගේ මෘදු පෙළඹවීමට – බලාපොරොත්තුව සහ සුවය සොයා ගැනීමට මිනිසුන් එක්රැස් කිරීමට මම ඉගෙනගෙන තිබෙනවා.”

2001 වර්ෂයේ දී පළමු වරට පැවිදිබව ලබාගත් මුල්ලලි 2018 දී ලන්ඩනයේ පළමු කාන්තා බිෂොප්වරිය බවට පත්වූවා ය. පල්ලියට සම්බන්ධ වීමට පෙර විශේෂඥ පිළිකා හෙදියක් වූ ඇය, වයස අවුරුදු 37 දී එංගලන්තයේ, රජයේ ලාබාලතම ප්‍රධාන හෙද නිලධාරිනිය බවට පත්වීමට ද සමත්වූවා ය.

මුල්ලලිගේ පත්වීම සිදුවන්නේ, පල්ලිය හා සම්බන්ධ ළමා අපයෝජකයෙකුගේ නඩුව හැසිරවීම සම්බන්ධයෙන් එල්ල වූ අපකීර්තිමත් වාර්තාවකින් පසුව, හිටපු අගරදගුරු ජස්ටින් වෙල්බි ඉල්ලා අස්වී මාස 11 කට පසුවයි.

කොටස් වෙළෙඳ පොළ අද (02) දිනයේ ගනුදෙනු 38,899ක්  සිදුකරමින් සමස්ත පිරිවැටුම රුපියල් මිලියන 6,515ක් වාර්තා වූ අතර කොටස් මිල දර්ශකය ඒකක 100කින් ඉහළ යාම හේතුවෙන් දිනය අවසානයේ සමස්ත කොටස් මිල දර්ශකය වාර්තා වූයේ ඒකක 21,951ක්  ලෙසිනි. ඒ අනුව කොටස් වෙළෙඳ පොළ ඉතිහාසයේ වැඩිම සමස්ත කොටස් මිල දර්ශකය අද දිනයේ වාර්තා විය.

වැඩිම පිරිවැටුමකින් කොටස් ගනුදෙනු වූ සමාගම්

• කොමර්ෂල් බැංකුව රුපියල් මිලියන 892
• මෙල්ස්ටා කොප් සමාගම රුපියල් මිලියන 63
• ඇක්සස් ඉන්ජිනියරිං සමාගම රුපියල් මිලියන 346

වැඩිම කොටස් ප්‍රමාණයක් ගනුදෙනු වූ සමාගම්

• ලංකා වෙන්චර් එනර්ජි සමාගම කොටස් මිලියන 12
• කේබල් සොලියුෂන් සමාගම කොටස් මිලියන 11
• යූූබී ෆිනෑන්ස් සමාගම කොටස් මිලියන 06

වැඩිම ප්‍රතිශතයකින් කොටස් මිල ඉහළ ගිය සමාගම්

• ඩයලොග් ෆයිනෑන්ස් සමාගම 16 %
• යූබී ෆිනෑන්ස් සමාගම 10%
• සීටී ලෑන්ඩ් සමාගම 09%

අද දිනය අවසානයේ වටිනාම සමාගම

• ජෝන් කීල්ස් සමාගම සමස්ත වත්කම් රුපියල් බිලියන 390
• කොමර්ෂල් බැංකුව සමස්ත වත්කම් රුපියල් බිලියන 313
• සිලෝන් ටුබැකෝ සමාගම සමස්ත වත්කම් රුපියල් බිලියන 313

විදේශ ආයෝජකයන් අද දිනයේ රුපියල් මිලියන 191ක කොටස් මිල දී ගත් අතර රුපියල් මිලියන 145කකොටස් විකුණා තිබිණි. ඒ අනුව ඔවුන් රුපියල් මිලියන 46ක මුදලක් කොටස් වෙළෙඳ පොළ වෙත ආයෝජනය කර තිබිණි.

විදේශ ආයෝජකයන් විසින් කොටස් මිල දී ගත් සමාගම්

• ඩීඑෆ්සීසී බැංකුව රුපියල් මිලියන 82
• ලංකා මිල්ක් ෆුඩ් සමාගම් රුපියල් මිලියන 38
• කේබල් සොලියුෂන් සමාගම රුපියල් මිලියන 29

විදේශ ආයෝජකයන් විසින් කොටස් විකුණන ලද සමාගම්

• හේලීස් සමාගම රුපියල් මිලියන 73
• ජෝන් කීල්ස් සමාගම රුපියල් මිලියන 20
• සන්ෂයින් හෝල්ඩින්ස් සමාගම රුපියල් මිලියන 05

විශ්ලේෂණය – නීතිඥ රජින්ද්‍ර නාරංගොඩ

කොටස් වෙළෙඳ පොළ අද (01) දිනයේ ගනුදෙනු 40,714ක්  සිදුකරමින් සමස්ත පිරිවැටුම රුපියල් මිලියන 6,464ක් වාර්තා වූ අතර කොටස් මිල දර්ශකය ඒකක 722කින් ඉහළ යාම හේතුවෙන් දිනය අවසානයේ සමස්ත කොටස් මිල දර්ශකය වාර්තා වූයේ ඒකක 21,851ක්  ලෙසිනි. ඒ අනුව කොටස් වෙළෙඳ පොළ ඉතිහාසයේ වැඩිම සමස්ත කොටස් මිල දර්ශකය අද දිනයේ වාර්තා විය.

වැඩිම පිරිවැටුමකින් කොටස් ගනුදෙනු වූ සමාගම්

• අම්බන් කැපිටල් සමාගම  රුපියල් මිලියන 450
• කොමර්ෂල් බැංකුව රුපියල් මිලියන 364
• රිල් ප්‍රොපටීස් සමාගම රුපියල් මිලියන 347

වැඩිම කොටස් ප්‍රමාණයක් ගනුදෙනු වූ සමාගම්

• එල්සීඩී ෆයිනෑන්ස් සමාගම කොටස් මිලියන 18
• කොටගල වැවිලි සමාගම (R) කොටස් මිලියන 15
• ගලධාරී හෝටල් සමාගම කොටස් මිලියන 15

වැඩිම ප්‍රතිශතයකින් කොටස් මිල ඉහළ ගිය සමාගම්

• කොටගල සමාගම ( R )  සමාගම 112 %
• ඔටෝඩ්‍රෝම් සමාගම 19%
• කැන්ඩි හෝටල් සමාගම 16%

අද දිනය අවසානයේ වටිනාම සමාගම

• ජෝන් කීල්ස් සමාගම සමස්ත වත්කම් රුපියල් බිලියන 394
• කොමර්ෂල් බැංකුව සමස්ත වත්කම් රුපියල් බිලියන 314
• සිලෝන් ටුබැකෝ සමාගම සමස්ත වත්කම් රුපියල් බිලියන 312

විදේශ ආයෝජකයන් අද දිනයේ රුපියල් මිලියන 212ක කොටස් මිල දී ගත් අතර රුපියල් මිලියන 121කකොටස් විකුණා තිබිණි. ඒ අනුව ඔවුන් රුපියල් මිලියන 90ක මුදලක් කොටස් වෙළෙඳ පොළ වෙත ආයෝජනය කර තිබිණි.

විදේශ ආයෝජකයන් විසින් කොටස් මිල දී ගත් සමාගම්

• සෙන්ට්‍රල් ෆිනෑන්ස් සමාගම රුපියල් මිලියන 48
• පෑන් ඒෂියා බැංකුව රුපියල් මිලියන 32
• ලංකා ලුබ්රිකන්ට් සමාගම රුපියල් මිලියන 30

විදේශ ආයෝජකයන් විසින් කොටස් විකුණන ලද සමාගම්

• හේලීස් සමාගම රුපියල් මිලියන 37
• එයිට්කන්ට් ස්පෙන්ස් සමාගම රුපියල් මිලියන 24
• ජෝන් කීල්ස් සමාගම රුපියල් මිලියන 13

විශ්ලේෂණය – නීතිඥ රජින්ද්‍ර නාරංගොඩ