ශ්‍රී ලංකාව සහ දකුණු අප්‍රිකාව දෙවැනි ටෙස්ට් තරගය හෙට (03 දා) ජොහැන්නස්බර්ග් නුවර වොන්ඩරස් ක්‍රීඩා පිටියේදී ආරම්භ වේ. තරගාවලිය ආරම්භ කරමින් පැවැති පළමු ටෙස්ට් තරගය ඉනිමකින් ජය ත් සමඟ තරගාවලියේ 1-0 ක් ලෙස පෙරමුණ ගෙන සිටින සත්කාරක පිල ශ්‍රී ලංකාවට එරෙහිව පූර්ණ තරගාවලි ජයග්‍රහණයක් අපේක්ෂාවෙන් තරගයට අවතීර්ණ වෙද්දී සංචාරක ශ්‍රී ලංකා පිල මෙම තරගය ජය ගනිමින් ජය පැරදුමෙන් තොරව තරගාවලිය අවසන් කිරීමේ අපේක්ෂාවෙන් තරග බිමට පිවිසෙයි.
පළමු තරගය ඉනිමකින් ජය ගැනීම, දේශීය තත්ත්වයන් යටතේ ක්‍රීඩා කිරීම, පිතිකරුවන් ලකුණු අතරට පැමිණීම, කණ්ඩායම සතු ප්‍රබලම වේග පන්දු යවන්නා වන කාගිසෝ රබඩා සංචිතයට පිවිසීම මෙන්ම වේග පන්දු යවන්නන් සියල්ලම රිද්මයට පැමිණීමට සමත්වීම ආදී තරගයක ජයග්‍රහණය සඳහා සෘජුවම බලපාන සාධක සියල්ලම දකුණු අප්‍රිකානු කණ්ඩායමේ වාසියට හේතු වී තිබේ. කෙසේ වෙතත් අවසන් වරට පැවැති තරගාවලිය 2-0 ක් ලෙස ජය ගැනීමට ශ්‍රී ලංකා පිල සමත්වීම මත ඕනෑම අවස්ථාවක තරගයක් ජය ගැනීමට ඇති හැකියාව ශ්‍රී ලංකා පිල සතුවීම කිසි විටෙකත් අමතක කළ නොහැක්කකි.
එබැවින් ශ්‍රී ලංකා කණ්ඩායම සිය උපරිම ශක්තියෙන් හෙට තරග වැදීම ඒකායන අපේක්ෂාව වී තිබුණත් ශ්‍රී ලංකාව හමුවේ ලද 2-0 ක තරගාවලි පරාජයේ වාඩුව ලබා ගැනීමේ උත්සාහයද දකුණු අප්‍රිකානුවන්ගේ සිත් තුළ තිබෙන බව ශ්‍රී ලංකා ක්‍රීඩකයින්ගේ අවධානයට ලක්විය යුත්තකි.
මෙම තරගයේදී ශ්‍රී ලංකා පිල මුහුණ දී සිටින දැවැන්තම ගැටළුව බවට පත්ව තිබෙන්නේ ක්‍රීඩකයින් රැසක් ආබාධිත තත්ත්වයට පත්ව සිටීමයි. එම තත්ත්වය මත කණ්ඩායම තුළ වෙනස් කම් ගණනාවක් සිදුවීම අනිවාර්යය බැවින් තරගය ජය ගැනීමට ආදේශ වන ක්‍රීඩකයින් දැඩි සටනක් දිය යුතු වේ.
පළමු ටෙස්ට් තරගයට ක්‍රීඩා කළ ධනංජය ද සිල්වාට තරගාවලියම අහිමිව තිබෙන අතර, කසුන් රාජිත, ළහිරු කුමාර සහ දිනේෂ් චන්දිමාල් ආබාධිත ලැයිස්තුවට එක්ව සිටිති. දෙවැනි ටෙස්ට් තරගය ඉලක්ක කර ගනිමින් සිදුකරන ලද පුහුණුවීම් අතරතුරදී තුන් ඉරියව් ක්‍රීඩක වනිඳු හසරංග සහ සුරංග ලක්මාල් තරගයට සහභාගිත්වය තවමත් වැට උඩය. එමෙන්ම එල්.පී.එල්. තරගාවලිය අතරතුරදී වළලු කර ආබාධයකට ගොදුරු වුණු ඕෂද ප්‍රනාන්දුගේ සහභාගිවීමේ අවස්ථාවද සුබදායී නොවේ.
මෙම තත්ත්වය මත දකුණු අප්‍රිකානු සංචාරය සඳහා සහභාගිවුණු ක්‍රීඩකයින් 21 දෙනාගෙන් සංචිතය 14 දෙනෙකු පමණක් මෙම තරගය සඳහා වන තේරීම් වලට සුදුසුකම් ලබා සිටිති. එම තත්ත්වය මත හෙට තරගයේදී බොහෝ විට මිනෝද් භානුක සහ අසිත ප්‍රනාන්දු ටෙස්ට් වරම් ලබනු ඇත. එහිදී සංචිතයේ පසුවන ළහිරු තිරිමාන්න, ලසිත් ඇඹුල්දෙණිය මෙන්ම දුෂ්මන්ත චමීරද අවසන් 11 දෙනා අතරට එක්වනු ඇත.
“කණ්ඩායමේ ක්‍රීඩකයින් කීප දෙනෙක්ම ආබාධ වලට ලක් වෙලා තියෙනවා. විශේෂයෙන් ධනංජ ද සිල්වා, ලහිරු කුමාර, කසුන් රජිත සහ දිනේෂ් චන්දිමාල්. ඔවුන්ට ක්‍රීඩා කරන්න කොහොමත් හැකියාවක් නෑ, අපි බලනවා සුරංග ලක්මාල්ව ක්‍රීඩා කරවන්න. නමුත් ඔහුට තිබ්බ යෝග්‍යතා පරීක්ෂණයෙන් ඔහු අසමත් වුණා. නමුත් අපි අදත් උත්සාහ කරනවා එයාව හෙට තරගයට ක්‍රීඩා කරවන්න පුලුවන්ද කියන එක. ඔහු වගේම වනිඳු හසරංගටත් අද පරීක්ෂණයක් තියෙනවා. සෙල්ලම් කරන්න පුලුවන් නම් අනිවාර්යයෙන්ම ඒ දෙන්නා ක්‍රීඩා කරනවා. එතැනදී වනිඳු ක්‍රීඩා නොකළොත් ලසිත් ඇඹුල්දෙණියට හෙට තරගයට ක්‍රීඩා කරන්න අවස්ථාව තියෙනවා” යි තරගය පිළිබඳව අදහස් දැක්වූ ශ්‍රී ලංකා නායක දිමුත් කරුණාරත්න සඳහන් කළේය.
“තරගය ගැන කතා කළොත් ඇත්තටම අපිට තරගයේදී අපේ උපරිම ශක්තිය නෑ. ක්‍රීඩකයින් ආබාධ වලට ලක් වෙලා තියෙන නිසා හොඳම ක්‍රීඩකයින් 11 දෙනා නෑ. නමුත් මම හිතනවා නවකයන් හොඳ දෙයක් කරයි කියලා. අපිට හොඳ අවස්ථාවක් ඔවුන්ගේ දක්ෂතා බලන්න වගේම ඔවුන්ටත් හොඳ අවස්ථාවක් ඔවුන්ගේ දක්ෂතා පෙන්වන්න” යැයි දිමුත් වැඩිදුරටත් අදහස් දැක්වීය.
