කොවිඩ් ආසාදිත මෘතදේහවල අවසන් කටයුතු සිදුකිරීම සම්බන්ධයෙන් විද්‍යාත්මක ක්‍රමවේදයට එහා ගිය පැති ගණනාවක් ඇති බව ශ්‍රී ජයවර්ධනපුර විශ්වවිද්‍යාලයේ ප්‍රතිශක්තිවේද සහ අණුක වෛද්‍ය විද්‍යා අධ්‍යයන අංශයේ මහාචාර්ය නීලිකා මලවිගේ මහත්මිය පැවසුවාය.
මේ අතර, කොවිඩ් ආසාදිත දේහයන් ආදාහනය කළ යුතු බවට නිර්දේශ කළ සෞඛ්‍ය අමාත්‍ය පවිත්‍රා වන්නිආරච්චි මහත්මිය පත්කළ විශේෂඥ කමිටුව සහ ඒ ගැන සොයාබැලීමට කොවිඩ් රෝග පාලන කටයුතු රාජ්‍ය ඇමතිනි සුදර්ශනී ප්‍රනාන්දුපුල්ලේ මහත්මිය පත්කළ නව විශේෂඥ කමිටුව ඊයේ (31) පස්වරුවේ සෞඛ්‍ය අමාත්‍යංශයේ දී රැස්වුවත් එම විශේෂඥ කමිටු නියෝජිතයින් විසිර ගියේ මෘතදේහ සම්බන්ධයෙන් අවසන් තීරණයක් නොගෙනය.
ඒ සම්බන්ධයෙන් අද (01) පැවැති මාධ්‍ය හමුවකදී එම විශේෂඥ කමිටුවක සාමාජිකාවක් වන මහාචාර්ය නීලිකා මලවිගේ මහත්මියගෙන් මාධ්‍යවේදීන් විමසා සිටියේය.
එහිදී වැඩිදුරටත් අදහස් දැක්වු මහාචාර්ය නීලිකා මලවිගේ මහත්මිය,
ප්‍රශ්නය 1 – මහාචාර්යවරියක් හැටියට ඔබතුමිය ප්‍රශ්නයක් වෙලා තියෙන භූමදානය පිළිබඳ විග්‍රහයක් කළොත් එහෙම ?
“දැන් ඒ ගැන කමිටුවක් දාලා තියෙන්නේ සෞඛ්‍ය අමාත්‍යාංශයෙන්. ඒ අදාළ කමිටුවලින් රජයට ඒ අදාළ තීරණය දුන්නහම තමයි ඒ අයගෙන් අහන එක වඩා සුදුසුයි.“
ප්‍රශ්නය 2 – එතකොට ඔබතුමිය මේ සම්බන්ධයෙන් මහාචාර්යවරියක් හින්දා අපේ රටේ ස්වභාවය සහ පරිසරය තියෙන ආකාරය සම්බන්ධයෙන් විශේෂයක් ?
“මේක ඇත්තටම මට පේනවිදියට විද්‍යාත්මක පැත්තක් විතරක් නෙමෙයි තියෙන්නේ. ඒකෙ තව ගොඩක් පැති මෙතෙන වෙලා තියෙනවා. ඒක නිසා මේක ගැන මම මේ වෙලාවේ කතා කරන්නේ නෑ.“
එම මාධ්‍ය හමුවට එක්ව සිටි සෞඛ්‍ය සේවා නියෝජ්‍ය අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතාගෙන් මාධ්‍යෙව්දීන් මෙලෙස ප්‍රශ්න කර සිටියේය.
ප්‍රශ්නය 3 – කොවිඩ් ආසාදිත මුස්ලිම් මළ සිරුරු ආදහනය කරනවද ? භූමදානය කරනවද ? කියන එක පිළිබඳ තීරණය කිරීමට පත්කළ විශේෂඥ කමිටු දෙකෙහි රැස්වීමක් ඊයේ පැවැත්වුණා. එහිදී එළැඹුනේ මොනවගේ තීරණවලටද ?
“ඒ තීරණය තවම අපිට ප්‍රකාශයට පත්කරලා නෑ. මොකද ඒක සෞඛ්‍ය සේවා අධ්‍යක්ෂ ජනරාල්තුමාගේ අත්සනින් චක්‍රලේඛයක් ලෙස ප්‍රකාශයට පත්වෙන්න ඕනේ. තාම නිකුත් කරලා නෑ. අවම හානියකින් යුතුව මේ කටයුත්ත කිරීම සඳහා අවශ්‍ය කරන මාර්ගෝපදේශ සකස් කිරීම අපේ වගකීමක්. ඒ කර්තව මේ වන විට අදාළ අංශවිසින් කෙරෙනවා.“
(මූලාශ්‍රය – දෙරණ)
