ගාල්ල නාගරික සෞඛ්‍ය වෛද්‍ය නිලධාරී කොට්ඨාසය ඇතුළු ගාල්ල දිස්ත්‍රික්කයේ පදිංචි කරුවන් කොරෝනා රෝගයෙන් බේරී සිටීම සඳහා ලබා දී ඇති සෞඛ්‍ය උපදෙස් තදුරටත් නොපිළිපදින්නේ නම් තත්ත්වය ඉතා භයානක විය හැකි බවට සෞඛ්‍ය අංශ අනතුරු අඟවයි.
මේ වනවිට ගාල්ල දිස්ත්‍රික්කයේ වැඩිම ආසාදිතයන් ප්‍රමාණය වාර්තා වී ඇත්තේ බලපිටිය සෞඛ්‍ය වෛද්‍ය නිලධාරි කොට්ඨාසයෙනි. ඒ ආසාදිතයන් 60 දෙනෙකි. ඉන් 51 දෙනෙකුම සුවය ලබා ආපසු සිය නිවෙස්වලට පැමිණ ඇති අතර රෝහල්ගතව ප්‍රතිකාර ලබමින් සිටින්නේ 09 දෙනෙකු පමණි.
ඉන් පසු වැඩිම ආසාදිතයන් ප්‍රමාණයක් වාර්තා වන්නේ ගාල්ල නාගරික සෞඛ්‍ය වෛද්‍ය නිලධාරී කොට්ඨාසයෙන් වන අතර එම සංඛ්‍යාව 37කි. සුවය ලබා ඇති සංඛ්‍යාව 13 දෙනෙක් පමණි.
සෞඛ්‍ය අංශ පෙන්වා දෙන්නේ ගාල්ල නාගරික සෞඛ්‍ය වෛද්‍ය නිලධාරී කොට්ඨාසයේ දිස්ත්‍රික්කයේ සහ පළාත් සභාවේ කාර්යාල වැඩි ප්‍රමාණයක් හා ව්‍යාපාරික ස්ථාන වැඩි ප්‍රමාණයක් පිහිටා තිබීමත් දෛනිකව නගරයට පැමිණෙන සංඛ්‍යාව ඉතා විශාල අගයක් ගැනීමත් යන හේතූන් නිසා කොරෝනා පැතිරයාමේ දැඩි අවදානමක් පවතින බවයි. මේ අතර එම කොට්ඨාස බල ප්‍රදේශයෙන් එක් කොරෝනා මරණයක් ද වාර්තා වී තිබේ.
මින් වඩාත්ම භයානක තත්ත්වය වන්නේ ගාල්ලෙන් හඳුනාගෙන ඇති කොරෝනා ආසාදිතයන් අතර තමන්ට කොරෝනා සෑදුණු ආකාරය පිළිබඳ නිශ්චිත වැටහීමක් හෙවත් මූලාශ්‍රයක් නොදන්න ආසාදිතයන් කිහිප දෙනෙකුම සිටීමයි. මේ නිසා කොරෝනා වෛරසය ගාල්ල සමාජය තුළට පැමිණ ඇතැයි යන්න සෞඛ්‍ය අංශ බිය පළකරන කරුණක් වී ඇත.
දෛනිකව හමුවන කොරෝනා ආසාදිතයන් සියලු දෙනාම මිනුවන්ගොඩ හා පෑලියගොඩ පොකුරට අයත් බවට රජය නිවේදනය කළ ද රජයේ ම සෞඛ්‍ය දෙපාර්තමේන්තුව විසින් නිකුත් කළ නිවේදනයකට අනුව ගාල්ල දිස්ත්‍රික්කයෙන් කොරෝනා දෙවැනි රැල්ලේ දී හමුවී ඇති ආසාදිතයන් 224 දෙනා අතර බ්‍රැන්ඩික්ස් පොකුරට අදාලව හමුවී ඇත්තේ ආසාදිතයන් 05 දෙනෙකු පමණි. පෑළියගොඩ මාළු වෙළෙඳ සැළේ පොකුරට අදාලව ගාල්ලෙන් ආසාදිතයන් 88 දෙනකු හමුවී ඇති අතර ඩොක්යාර්ඩ් පොකුරට අදාලව ද රෝගීන් 43 දෙනකු හමුවී තිබේ. අනෙක් ආසාදිතයන් 88 දෙනාටම නිශ්චිත පොකුරක් නොමැත. එසේ නම් සමාජය තුළ කොරෝනා නැතැයි කිසිවෙකුට තර්ක කළ නොහැක.
කෙසේ වෙතත් සෞඛ්‍ය අංශ පවසන්නේ දැන් ගාල්ලේ තත්ත්වය ඉතාමත් අවදානම් සහගත මට්ටමකට පැමිණ ඇති බවයි. මේ හේතුවෙන් ගාල්ල නගරයේ පිහිටි පාසල් 30ක් දින නියමයක් නැතිව වසා දැමුණු අතර අද (08) එය විවෘත කළ හැකි දිනය පිළිබඳ සමාලෝචනය කළ අවස්ථාවේ දී තීරණය කර තිබුණේ ලබන 11 වැනි දා එනම් සිකුරාදා දක්වාම පාසල් වසා දමන බවයි.
ගාල්ලේ පාසල් සිසුන් තිදෙනකුටම කොරෝනා ආසාදනය වී තිබූ අතර ඒ අතරින් බද්දේගම ක්‍රිස්තුදේව බාලිකා විද්‍යාලයේ සිසුවියට කොරෝනා ආසාදනය වූ ආකාරය මෙතෙක් අනාවරණය වී නැත.
මෙවැනි තත්ත්වයක් යටතේ ගාල්ලේ පදිංචි සියලුම දෙනා පිටත ප්‍රදේශවලින් අමුත්තන් ගෙන්වීමෙන් වළකින ලෙසත්, අනවශ්‍ය ගමන් බිමන්වලින් වැළකි සිටින ලෙසත් සෞඛ්‍ය අංශ ඉල්ලා සිටියි. එමෙන්ම සෑම අවස්ථාවක දී ම මුඛ ආවරණ පැළඳීම, දෑත් පිරිසිදුව තබාගැනීම, සමාජ දුරස්ථභාවය ආරක්ෂා කිරීම යන සෞඛ්‍ය පුරුදු පවත්වාගෙන යන ලෙස ද ඉල්ලා සිටියි.
