තමන් කෙරෙහි ද්වේශ සහගත, අපහාසාත්මක සහ සාවද්‍ය කරුණු ඇතුළත් කරමින් දකුණු පළාත් ආණ්ඩුකාරවරයා, පළාත් අමාත්‍යවරුන් ඇතුළු පාර්ශවයන් රාශියක් වෙත ලිපි යවමින් ඒ බව ප්‍රචාරය කර ප්‍රසිද්ධ කරන ලද වෛද්‍යවරුන් 56 දෙනෙකුට විරුද්ධව ඉඳුනිල් වීරසිංහ නමැති අයකු විසින් ගාල්ල අතිරේක දිසා අධිකරණයේ පනවා ඇති නඩුව ලබන වසරේ මාර්තු 02 වැනි දිනට කල් තබන ලදී.
ගාල්ල අතිරේක දිසා විනිසුරුවරයා අධ්‍යයන නිවාඩු ලබා තිබීම හේතුවෙන් නඩු විභාගය මෙලෙස කල් තැබිණි.
මෙම පැමිණිලිකරු වන්නේ මහජන සෞඛ්‍ය පරීක්ෂකවරයකු වූ වීරසිංහ පතිරණගේ ඉඳුනිල් තරංග වීරසිංහ නමැති අයෙකි.
එහි විත්තිකරුවන් ලෙස වෛද්‍ය සිංගරච්චි වේදිත වෙනුර කුමාර (වෙනුර කේ. සිංගාරච්චි), වෛද්‍ය කොඩිකාරගේ කමල් ප්‍රියන්ත කොඩිකාර ඇතුළු වෛද්‍ය නිලධාරී නිලධාරිනියන් 56 දෙනකු නම්කර තිබේ.
එම විත්තිකරුවන් රජයේ වෛද්‍ය නිලධාරීන්ගේ සංගමයේ සාමාජිකයන් බවත් පැමිණිලි පාර්ශවයේ නීතිඥයන් විසින් අධිකරණයට දැනුම් දී ඇත.
පැමිණිල්ලේ දැක්වෙන්නේ තමන් දැඩි මානසික ව්‍යාධියකින් පෙළෙන බැවින් පිළිගත් වෛද්‍ය මණ්ඩලක් ඉදිරියට යොමුකර වහාම වෛද්‍ය පරීක්ෂණයකට භාජනය කරන ලෙස දන්වමින් මෙම විත්තිකරුවන් 56 දෙනා විසින් අත්සන් කර දකුණු පළාත් ආණ්ඩුකරවරයා ඇතුළු ප්‍රදේශයේ දේශපාලන අධීකාරියටත්, රජයේ මාණ්ඩලික නිලධාරීන් විශාල පිරිසකටත් ලිපියක් යවා ඇති බවයි.
විත්තිකරුවන් විසින් අත්සන් කර 2017 මැයි මස 09 වැනි දිනැතිව බාහිර පාර්ශව වෙත බෙදාහරින ලද මෙම ලිපිය ද්වේශ සහගතව, අපහාසාත්මකව සහ අසත්‍ය තොරතුරු අඩංගු කරමින් යැවීම තුළින් තමන්ට අපහාසයක් සිදුවන අතරම තම දරුවන්ට, රාජ්‍ය සේවයේ නිරත බිරිඳට අපහාසයක් මෙන්ම අප්‍රසන්නතාවනට මුහුණ දීමට සිදුව ඇති බවයි. එමේනම රාජ්‍ය නිලධරීන්ගෙන් නිරන්තරව ම ප්‍රශ්න කිරීම්වලට ද මුහුණ දීමට සිදුවූ ඔහු සිය පැමිණිල්ලේ සටහන් කර තිබේ.
පැමිණිලි කරුට මේ හේතුවෙන් සිදුවී ඇති අපහාසය රුපියල් මිලියන 50ක් හෙවත් කෝටි 05ක් ලෙස මුදලින් තක්සේරු කර එකී සම්පූර්ණ අලාභය විත්තිකරුවන්ගෙන් එක්ව සහ වෙන් වෙන් වශයෙන් අයකරවා දෙන ලෙසත් පැමිණිල්ල මගින් අධිකරණයෙන් ඉල්ලා තිබේ.
පැමිණිල්ල වෙනුවෙන් නීතිඥ මියුපි රෙෂානි බද්දෙවත්තගේ උපදෙස් මත නීතිඥ රජින්ද්‍ර නාරංගොඩ පෙනී සිටින අතර විත්තියේ වෛද්‍යවරු සියලු දෙනා වෙනුවෙන් නීතිඥ රවීන්ද්‍රනාත් දාබරේ පෙනී සිටියි.
