ගාල්ල සෞඛ්‍ය වෛද්‍ය නිලධාරී කොට්ඨාසයේ සීමා සහිත සංචරණ සීමා පනවා ඇති ග්‍රාම නිලධාරී වසම් 06ක තදින් නීතිය ක්‍රියාත්මක කිරීමට අද (08) මේ මොහොතේ සිට කටයුතු කරන බව පොලිසිය පවසයි.
සීමා සහිත සංචරණ සීමා පනවන ලද ප්‍රදේශවල ජනතාවට අත්‍යාවශ්‍ය කටයුත්තකට හැර නිවෙස්වලින් පිටතට නොයන ලෙසත් එසේ යන්නේ නම් සෞඛ්‍ය අංශ හෝ ආරක්ෂක අංශ දැනුම්ත් කරන ලෙසත් මීට පෙර උපදෙස් දී තිබිණි. එමෙන් ම කිසිදු අමුත්තකු තම නිවෙස්වලට ගෙන්වාගැනීමෙන් වළකින ලෙස ද දන්වා ඇත.
එසේ උපදෙස් ලැබී තිබිය දී එම ප්‍රදේශවල ජනතාව සෞඛ්‍ය උපදෙස් නොතකා කටයුතු කරන බව පෙනෙන්නට තිබෙන බැවින් මෙවැනි ක්‍රියාමාර්ගයක් ගැනීමට සිදුව ඇති බව පොලිසිය පවසයි. ඒ අනුව ප්‍රදේශයේ මාර්ග බාධක කිහිපයක් යෙදීමටත් සංචරණයේ යෙදෙන පුද්ගලයන් අත්‍යාවශ්‍ය නොවන කටයුතු සඳහා යන්නේ නම් ඔවුන් වහාම අත්අඩංගුවට ගැනීමටත් පොලිසිය කටයුතු කරන බව පවසයි.
මේ වනවිට ගාල්ල සෞඛ්‍ය වෛද්‍ය නිලධාරී කොට්ඨාසයේ ඇත්තිලිගොඩ දකුණ, දෙද්දුගොඩ උතුර. තලාපිටිය, මකුළුව, මිලිද්දුව, කෝන්ගහ යන ග්‍රාම නිලධාරී වසම් බලප්‍රදේශවලට සීමාසහිත සංචාරක සීමා පනවා තිබේ.
