ඩෙන්මාර්කයේ “මින්ක්” මුගටියන් වළදැමූ ස්ථාන වලින් කොරෝනා ව්‍යාප්ත වීමේ අවදානමක් මතුව ඇතැයි ප්‍රදේශවාසීන් පැමිණිලි කර තිබේ.
කොරෝනා වයිරසය පැතිරීම වැළැක්වීම සඳහා ඩෙන්මාර්කයේ මින්ක් ගොවිපළවල සතුන් දහස් ගණනක් මෙම මස මුලදී මරා දැමුණු අතර ඔවුන් වළදැමූ සමූහ මිනී වළවල්වලින් සෞඛ්‍යයට තර්ජනයක් එල්ලවී ඇති බව ප්‍රදේශවාසීහු පවසති.
මිනී වළවල් සතුන් විසින් හෑරීම සිදුකර ඇති බව ද වර්ෂාවට වැලි සහිත පස් සේදී ගොස් සත්ත්ව මළකුණු මතුවී ඇති බවද ඔවුහු පෙන්වා දෙති.
ඩෙන්මාර්කයේ බටහිර ප්‍රදේශයේ හමුදාවට අයත් භූමියක මෙම සතුන් වළදමා තිබේ.
බලධාරීන් පවසන්නේ මීටර් 2.5ක් ගැඹුරු අගලක සතුන් දමා මීටර් 2ක් පමණ උසට පස් දැමූ බවයි.
පැය 24 පුරාම මෙම සමූහ මිනී වළවල් ආරක්ෂා කරන බවද සඳහන් වේ.
සතුන් වළදැමූ ස්ථානවලින් කොරෝනා පැතිරීමේ අවදානමක් නොමැති බව සෞඛ්‍ය අංශ පවසන නමුත් ආසන්න ජල මූලාශ්‍ර දූෂණය වීමේ අවදානමක් ඇති බවට නිවැසියන් පැමිණිලි කර ඇත.
සතුන් අපරික්ෂාකාරීව කඩිමුඩියේ වළදැමීම සම්බන්දව බොහෝ විවේචන ද එල්ලවී තිබේ.
මේ සම්බන්දව කඩිනමින් පියවරක් ගතයුතු බවත් මිනී වළවල් හාරා එම සිරුරු සතුන් දහනය කරන ස්ථානයකට ගෙනයන ලෙසත් ප්‍රදේශවාසීහු ඉල්ලා සිටිති.
