ගවයකුගේ ගෙල බැඳ තිබූ කඹයක පැටලීමෙන් තුවාල ලබා රෝහල්ගත කර සිටි පාසල් සිසුවකු මියගොස් ඇතැයි අනුරාධපුර ශික්ෂණ රෝහල් ආරංචිමාර්ග පවසයි.
මෙලෙස මියගොස් ඇත්තේ අනුරාධපුර, විහාරපාළුගම, විද්‍යාරාජ විද්‍යාලයේ 04 වැනි ශ්‍රේණියේ ඉගෙනුම ලබමින් සිටි සිසුවෙකි.
පසුගිය 13 වැනි දා ඔහු තම නිවස අසළ යහළුවන් සමඟ එක් වී අසල්වැසි නිවසක ඇතිකරන ගවයකු සමඟ සෙල්ලම් කරමින් සිට ඇත. එම අවස්ථාවේ දී කුලප්පු වූ ගවයා මාාර්ගය දිගේ දිවගොස් ඇති අතර ගවයාගේ ගෙල බැඳි කඹයේ පැටලුණු සිසුවා ද මීටර 900ක පමණ දුරක් ගවයා සමඟ ඇදී ගොස් තිබිණි.
බරපතල තුවාල ලැබූ දරුවා අනුරාධපුර ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් සිටිය දී ඊයේ (14) මියගිය බව පොලිසිය පවසයි.
