ලෝක ටෙස්ට් ශූරතාව දිනා ගැනීමට දකුණු අප්‍රිකානු කණ්ඩායම අද (14) සමත්විය. ඔවුන් හමුවේ ඕස්ට්‍රේලියාව කඩුලු 05ක පරාජයක් ලබමින් 2023-2025 ලෝක ටෙස්ට් අනුශූරයන් බවට පත්විය.
මෙම තරඟය පැවැතියේ එංගලන්තයේ ඓතිහාසික ලෝඩ්ස් ක්‍රීඩාංගණයේ ය.
දකුණු අප්‍රිකානු කණ්ඩායම් ක්‍රිකට් ක්‍රීඩාවෙන් කොතරම් දක්ෂතා දැක්වුව ද ඔවුන්ට මේ දක්වා ම කිසිම ලෝක කුසලානයක් දිනා ගැනීමට නොහැකි වූ බැවින් “ක්‍රිකට් ලෝක කුසලාන ශාපය” ලැබූ රටක් ලෙස දකුණු අප්‍රිකාව ප්‍රචලිතව තිබිණි.
පළමුව පන්දුවට පහරදුන් ඕස්ට්‍රේලියානු කණ්ඩායම සිය පළමු ඉනිම සඳහා සියල්ලන් දැවී ලකුණු 212ක් රැස්කළ අතර ඊට පිළිතුරු ඉනිම ක්‍රීඩාකළ දකුණු අප්‍රිකානු කණ්ඩායමේ සියලු දෙනා ම ලකුණු 138කට දැවී ගියේ ඕස්ට්‍රේලියානු බලාපොරොත්තු ඉහළ නංවමිනි.
පළමු ඉනිමේ ලකුණු 74ක වාසියත් සමඟ දෙවැනි ඉනිම ආරම්භ කළ ද ඕස්ට්‍රේලියාවට එම ඉනිමේ දී ලබාගැනීමට හැකිවූයේ ලකුණු 207ක් පමණි. ඒ අනුව දකුණු අප්‍රිකාවට ලකුණු 282ක ජයග්‍රාහී ඉලක්කයක් හිමිවිය.
තුන්වැනි දිනය වූ ඊයේ (12) තරඟය අවසන් කරනවිට දකුණු අප්‍රිකාව කඩුලු 02ක් පමණක් දැවී ලකුණු 213ක් ලබා සිටියේ පහසු ජයග්‍රහණයක් වෙත ගමන් කරමිනි.
අද සිව්වැනි දිනයේ දී තවත් ලකුණු 69ක් ලබාගැනීමට පිටියට පිවිසි දකුණු අප්‍රිකානු කණ්ඩායමේ ඒඩියන් මාක්‍රම් පන්දු 207කින් ලකුණු 136කි ලබාගනිමින් ජයග්‍රහණයේ නියමුවා වුව ද ජයග්‍රහණය පෙනි පෙනී ඔහු දැවී ගියේය. ඔහු දැවීයන විට තුන්වැනි කඩුල්ල සඳහා ටෙම්බා බවුමා සමඟ ලකුණු 147ක සම්බන්ධතාවක් පවත්වා තිබිණි.
ඉන් අනතුරුව මුම්බා ද ලකුණු 66කට පිටියෙන් ඉවත්කිරීමට ඕස්ට්‍රේලියානු පන්දු යවන්නන් සමත්වුව ද දකුණු අප්‍රිකාවේ ජයග්‍රහණය වැළැක්වීමට එය ප්‍රමාණවත් වූයේ නැත.
ටෙස්ට් ලෝක ශූරයන් සඳහා පිරිිනමන ඇමෙරිකානු ඩොලර් මිලියන 3.66ක් හෙවත් ශ්‍රී ලංකා රුපියල් කේටි 108කට ආසන්න මුදල දකුණු අප්‍රිකානු කණ්ඩායමට හිමිවිය.
දකුණු අප්‍රිකාව ක්‍රිකට් ආකෘති ත්‍රිත්වය යටතේම ලෝක කුසලාන අවසන් මහා තරගයක්, අවසන් පූර්ව තරග 12ක් හා අර්ධ අවසන් පූර්ව තරග 2ක් ක්‍රීඩාකර තිබුණි නමුත් ඔවුන්ට ලෝක කුසලානයක ජයග්‍රහණය හිමිවූයේ මෙම තරඟයෙනි.
