ලංකා බැංකුව පසුගිය මැයි 15 වැනිදා කොළඹ කොටස් හුවමාරුව තුළ විවෘත කළ රුපියල් බිලියන 15ක් වටිනා ණයකර නිකුතුව වෙත රුපියල් බිලියන 20.4ක අධි ඉල්ලුමක් හිමිව ඇතැයි එම බැංකුව පවසයි.
පසුගියදා කොළඹ කොටස් හුවමාරුව වෙත නිවේදනයක් නිකුත් කරමින් බැංකුව මේ බව සඳහන් කර තිබේ.
මෙහිදී පළමු නිකුතුව ලෙස බාසෙල් III අනුකූල, අදියර 2, ලැයිස්තුගත, වර්ගකෙරුණු, සුරක්ෂිත නොවූ, උපප්‍රධාන, පිරිමුදවාගත හැකි ණයකර ලෙස ණයකර කොටස් මිලියන 100ක් නිකුත් කළ අතර, ඊට හිමි වූ අධි දායකත්වයත් සමගින් තවත් ණයකර කොටස් මිලියන 50ක් නිකුත් කෙරිණි.
ඒ අනුව මෙම ණයකර කොටස් මිලදී ගැනීම සඳහා අවස්ථාව පැවති මැයි 15 වැනිදා පස්වරු 4.30 වන විට අයදුම්පත්‍ර 53ක් හරහා ණයකර කොටස් 204,348,000ක් මිලදී ගැනීමට ඉදිරිපත්ව තිබූ බව බැංකුව පවසයි.
එක් ණයකර කොටසක් රුපියල් 100ක් බැගින් මිල කර තිබූ මෙම නිකුතුවේදී දායකත්වය ලබාදී තිබූ සමස්ත වටිනාකම රුපියල් 20,434,800,000ක් බව බැංකුව සඳහන් කරයි.
මෙහිදී ලංකා බැංකුව A සහ B ලෙස වර්ග දෙකක් යටතේ මෙම නිකුතුව සිදු කළ අතර, සියලුම ඉල්ලුම්පත්‍ර A වර්ගය සඳහා පමණක් ඉදිරිපත්ව තිබීමද විශේෂත්වයකි. එසේම ඉදිරිපත් වූ සියලුම ඉල්ලුම්පත්‍ර මෙරට පදිංචිකරුවන්ගෙන් ඉදිරිපත් වූ බවත්, මෙරට පදිංචිකරුවෙකු නොවන කිසිදු අයෙකුගෙන් ඉල්ලුම්පත්‍රයක් ඉදිරිපත් නොවූ බවත් බැංකුව වැඩිදුරටත් සඳහන් කරයි.
