හිටපු පොලිස්පති දේශබන්දු තෙන්නකොන් මේ වනවිට සැඟවී ඇතැයි මහජන ආරක්ෂක නියෝජ්‍ය අමාත්‍ය සුනිල් වටගල පවසයි. ඔහු අත්අඩංගුවට ගන්න යැයි පසුගිය දා අධිකරණය නියෝග කළේය.
නියෝජ්‍ය අමාත්‍යවරයා මේ බව ප්‍රකාශ කළේ අයවැය කාරක සභා අවස්ථා විවාදයේ දී මන්ත්‍රී චමින්ද විජේසිරි කළ විමසීමකට පිළිතුරු දෙමිනි.
මේ අතර දේශබන්දු තෙන්නකෝන විදේශ ගතවීම වළක්වාලමින් මාතර මහේස්ත්‍රාත් අධිකරණය විදෙස් ගමන් තහනමක් පනවා ඇත. එම තහනම පනවා ඇත්තේ අපරාධ පරීක්ෂණ දෙපාර්තමේන්තුව විසින් අධිකරණයෙන් කරන ලද ඉල්ලීමක් සළකා බලමිනි.
2023 දෙසැම්බර් මස 31 වැනිදා වැලිගම W15 හෝටලය ආසන්නයේ සිදු වූ වෙඩි තැබීමක් සම්බන්ධ නඩුවකට අදාළව හිටපු පොලිස්පති දේශබන්දු තෙන්නකෝන් ඇතුළු පරිසක් අත්අඩංගුවට ගන්නා ලෙස අධිිකරණය නියෝග කර තිබේ.
එදින එම හෝටලය අසළ වෙඩි තැබීමක් සිදුවන බවට වැලිගම පොලිස් ස්ථානයේ ජංගම මුර සංචාරක රථයට ලැබුණු තොරතුරක් අනුව එහි පැමිණි එම නිලධාරීන් වෙඩිතැබූ රථය හඹා ගොස් ප්‍රති ප්‍රහාර එල්ල කර තිබිණි. පොලිස් වෙඩි පහරින් තුවාල ලැබූ දෙදෙනකු කරාපිටිය රෝහලට යොමුකර තිබූ අතර උපුල් කුමාර නමැති පොලිස් සැරයන්වරයකු එහි දී මියගියේය. එයින් තහවරු වූයේ හෝටලයට වෙඩි තැබීමට සුදුස පැහැති වෑන් රථයකින් පැමිණ ඇත්තේ කොළඹ අපරාධ පරීක්ෂණ දෙපාර්තමේන්තුවේ නිලධාරීන් පිරිසක් බවයි.
එම මරණය සම්බන්ධ පරීක්ෂණ වාර්තා වසරකට පමණ පසු පසුගිය ජනවාරි 27 වැනි දින මාතර මහේස්ත්‍රාත් අධිකරණය හමුවේ ප්‍රකාශයට පත්කෙරිණි. ඒ අනුව පොලිස් සැරයන්වරයාගේ මරණය අපරාධයක් බව තීන්දු විය. එම වෙඩි තැබීම සිදු වූ අවස්ථාවේ දී කොළඹ අපරාධ කොට්ඨාසයේ නිලධාරීන් වැලිගම හෝටලයට යොමුකිරීම නීත්‍යානුකූල නොවන ලෙස සිදුකර ඇති බැවින් එවකට වැඩබලන පොලිස්පතිවරයා වූ දේශබන්දු තෙන්නකෝන් ඇතුළු නිලධාරීන් 08 දෙනකු අත්අඩංගුවට ගෙන අධිකරණයට ඉදිරිපත් කරන්න යැයි අධිකරණය විසින් වරෙන්තු නිකුත්කරනු ලැබීය.
පොලිසිය සඳහන් කරන්නේ ඔවුන් අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුවේ කණ්ඩායම් 04ක් යෙදවා ඇති බවයි. එම කණ්ඩායම් හිටපු පොලිස්පතිවරයාගේ හෝකන්දර නිවසක් සහ ගිරිඋල්ල නිවසක් පරීක්ෂා කර ඇතත් ඔහු එම නිවෙස්වල නොසිටි බව වාර්තා වේ.
