සම්භාවනාවට පාත්‍ර වූ දමිළ මාධ්‍ය කවියකු මෙන්ම දාර්ශනිකයකු ලෙස පිළිගන්නා තිරුවල්ලුවර් හට ගෞරවයක් වශයෙන් යාපනයේ සංස්කෘතික මධ්‍යස්ථානය “තුරුවල්ලුවර් සංස්කෘතික මධ්‍යස්ථානය” ලෙස නම්කිරීම පසුගිය දා සිදුකෙරිණි.
මෙම විවෘත කිරීමේ අවස්ථාවට ශ්‍රී ලංකාවේ ඉන්දීය මහකොමසාරිස් සන්තෝෂ් ජා මහතා සහ බුද්ධ ශාසන, ආගමික සහ සංස්කෘතික කටයුතු අමාත්‍ය හිනිදුම සුනිල් සෙනෙවි ඇතුළු පිරිසක් සහභාගී වූහ.
ඉන්දියාවෙන් ලැබුණු ඇමෙරිකානු ඩොලර් මිලියන 12ක ප්‍රදානයක් යටතේ මේ සංස්කෘතික මධ්‍යස්ථානය ඉදිකෙරිණි. උතුරේ සංස්කෘතිය, කලාව, සම්ප්‍රදායන් සහ අභිලාෂයන් සඳහා ඉඩ හසර ලබාදීමත් අධ්‍යයන කටයුතු කිරීමට අවස්ථාව ලබාදීමත් මේ සංස්කෘතික මධ්‍යස්ථානය ඉදිකිරීමේ අපේක්ෂාව වී තිබේ.
මහල් දෙකකින් සමන්විත මෙම සංස්කෘතික මධ්‍යස්ථානය කෞතුකාගාරයක්, ප්‍රේක්ෂකයන් 600කට වැඩි පිරිසකට අසුන් ගැනීමට හැකි රංග පීඨයක් ආකාරයේ නවීන ශ්‍රවණාගාරයකින් ද සමන්විතය. එමෙන් ම සත්මහල් ඉගෙනුම් කුළුණනක් සහ එළිමහන් රංග පීඨයක් ලෙස ද භාවිතා කළ හැකි මේ ස්ථානයේ මහජන චතුරශ්‍රයක් ද ස්ථාපිත කර තිබේ.
2015 වර්ෂයේ මාර්තු මාසයේ දී මෙම සංස්කෘතික මධ්‍යස්ථානය සඳහා මුල්ගල් තැබීම සිදුකරන ලද්දේ ඉන්දීය අග්‍රාමාත්‍යවරයා විසිනි.
2022 මාර්තු මාසයේදී විවෘත කරන ලද මෙම සංස්කෘතික මධ්‍යස්ථානය 2023 පෙබරවාරි මාසයේදී ශ්‍රී ලංකා ජනතා අයිතියට පත් කරන ලදී.
ඉන්දීය මහ කොමසාරිස් සන්තෝෂ් ජා මෙම අවස්ථාව අමතමින් ප්‍රකාශ කළේ මෙම මුලපිරීම ශ්‍රේෂ්ඨ තිරුවල්ලුවර්තුමාට උපහාරයක් පමණක් නොව ඉන්දියාව සහ ශ්‍රී ලංකාව අතර බෙදා හදා ගන්නා ඉතිහාසයක, සංස්කෘතියක සහ දෙරට අතර පවතින සුවිශේෂී සහ අවියෝජනීය සම්බන්ධයේ සැමරුමක් වන බවයි. මෙම අවස්ථාව තිරුවල්ලුවර්තුමාගේ ඥානයේ මඟපෙන්වීම ලබමින් සංස්කෘතිය, සහයෝගීතාවය සහ පොදු සෞභාග්‍යයෙන් පොහොසත් අනාගතයක් සඳහා වන ගමනක ඇරඹුමක් වන බව ඔහු සඳහන් කළේය. මෙම මධ්‍යස්ථානය තිරුවල්ලුවර්තුමාගේ ඉගැන්වීම්හි ජීවමාන ප්‍රතිමූර්තියක් බවට පත් කරන මෙන් ඔහු යාපනයේ සහ උතුරු පළාතේ ජනතාවගෙන් ඉල්ලා සිටියේය.
යාපනයේ සංස්කෘතික මධ්‍යස්ථානය සඳහා සුදුසු ම නමක් තෝරාගෙන ඇති බව බුද්ධ ශාසන, ආගමික සහ සංස්කෘතික කටයුතු අමාත්‍ය හිනිදුම සුනිල් සෙනෙවි ප්‍රකාශ කළේය. තිරුවල්ලුවර්තුමාගේ ඉගැන්වීම් අපගේ ක්‍රියාවන් සෑමවිටම දයාව සහ සාරධර්ම මත පදනම් විය යුතු බව අපට මතක් කර දෙන බව ද ශ්‍රේෂ්ඨ තිරුක්කුරල් ග්‍රන්ථය සාධාරණ සහ සමඟි සමාජයක් නිර්මාණය කිරීම සඳහා අපට මඟ පෙන්වන බව ද අමාත්‍යවරයා සඳහන් කළේය. ප්‍රථම වරට සිංහල භාෂාවට පරිවර්තනය කරන ලද තිරුක්කුරල් ග්‍රන්ථයේ සිංහල පිටපතක් ද අමාත්‍යවරයා විසින් මහ කොමසාරිස්තුමා වෙත භාර දෙන ලදී.
