මහ මැතිවරණයට තරඟ කිරීම සඳහා තමන් ස්වාධීන කණ්ඩායමකින් බාරදුන් නාමයෝජනා කොළඹ දිස්ත්‍රික් තේරීම් භාර නිලධාරීවරයා විසින් ප්‍රතික්ෂේප කිරීම බල රහිත කරන්න යැයි ඉල්ලා අෂේන් සේනාරත්න විසින් ගොනුකළ පෙත්සම ශ්‍රේෂ්ඨාධිකරණය විසින් අද (23) ප්‍රතික්ශේප කෙරිණි.
එම පෙත්සම සම්බන්ධයෙන් ඉදිරිපත් කළ කරුණු සළකා බැලීමෙන් අනතුරුව ප්‍රීති පද්මන් සූරසේන, අචල වෙංගප්පූලි සහ ප්‍රියන්ත ප්‍රනාන්දු යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් මෙම නියෝගය නිකුත් කර තිබේ.
පෙත්සම්කරු වෙනුවෙන් පෙනී සිටි නීතිඥ අස්ථික දේවේන්ද්‍ර අධිකරණය හමුවේ කරුණු දක්වමින් තම සේවාදායකයා මැතිවරණ නීතියට අනුකූලව සිය නාමයෝජනා පත්‍රය තේරීම්භාර නිලධාරියා වෙත ඉදිරිපත් කර තිබු බව සඳහන් කළේය.
එම නාමයෝජනා පත්‍රය භාරදෙන අවස්ථාවේ ඔහු එම ස්ථානයේ සිටි බවත් බලයලත් නියෝජිතයෙකු නාමයෝජනා පත්‍රය භාරනොදුන් බව සඳහන් කරමින් එය ප්‍රතික්ෂේප කිරීමට තේරීම්භාර නිලධාරියා ගත් තීරණය නීතියට පටහැනි බවත් නීතිඥවරයා පෙන්වා දුන්නේය.
මෙහිදී මැතිවරණ කොමිසමේ සාමාජිකයින් වෙනුවෙන් පෙනී සිටි නියෝජ්‍ය සොලිසිටර් ජනරාල් යුරේශා ද සිල්වා සඳහන් කළේ පෙත්සම්කරු මැතිවරණ නීතියට අනුකූලව සිය නාම යෝජනා පත්‍රය ඉදිරිපත් නොකිරීම හේතුවෙන් එය ප්‍රතික්ෂේප කිරීමට මැතිවරණ නිලධාරීන්ට සිදු වූ බවයි.
නාම යෝජනා භාරදීමට අදාළව තේරීම්භාර නිලධාරියා විසින් නිකුත්කළ උපදෙස් මාලාවන් පෙත්සම්කරු විසින් නිසි ආකාරව පිළිපැද නොතිබූ බවත් නියෝජ්‍ය සොලිසිටර් ජනරාල්වරිය පෙන්වා දුන්නාය.
දෙපාර්ශ්වය විසින් ඉදිරිපත් කළ කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල අදාළ පෙත්සමේ වගඋත්තරකරුවන්ට නොතිසි නිකුත් කිරීමකින් තොරව එය ප්‍රතික්ෂේප කිරීමට තීන්දු කළේය.
ඊට අමතරව කෑගල්ල දිස්ත්‍රික්ක සඳහා ප්‍රජාතන්ත්‍රවාදී ජනතා හඬ පක්ෂය ඉදිරිපත් කළ නාමයෝජනා ප්‍රතික්ෂේප කිරීමට සහ සිංහල දීප ජාතික පෙරමුණ පක්ෂය විසින් කුරුණෑගල පුත්තලම හා බදුල්ල දිස්ත්‍රික්ක වෙනුවෙන් භාරදුන් නාමයෝජනා ප්‍රතික්ෂේප කිරීමට එරෙහිව ගොනු කරන ලද පෙත්සම් ද ශ්‍රේෂ්ඨාධිකරණය විසින් විභාගයට නොගෙන ප්‍රතික්ෂේප කිරීමට තීන්දු කළේය.
