පසුගිය දින තුන තුළ ඉන්දියාවේ ප්‍රදේශ රැසකට බලපා ඇති දරුණු රස්නය හේතුවෙන් පුද්ගලයන් 50කට වැඩි පිරිසක් මියගොස් තිබේ.
උණුසුම් කාලගුණය හේතුවෙන් සති අන්තයේ උත්තර් ප්‍රදේශ් ප්‍රාන්තයේ පමණක් 33දෙනකු මිය ගොස් තිබේ.
සෙනසුරාදා ඉන්දියාවේ ඡන්දය ප්‍රකාශ කිරීමේ අවසන් අදියර පැවැත්වුණු අතර ඡන්ද පොළ නිලධාරීන්, ආරක්‍ෂක නිලධාරීන් සහ සනීපාරක්ෂක කාර්ය මණ්ඩලය ඇතුළු මහ මැතිවරණයට සම්බන්ධ පුද්ගලයින් ද මියගිය සංඛ්‍යාවට ඇතුළත් විය.
ඔඩිෂා (ඔරිස්සා) ප්‍රාන්තයේ, අධික රස්නය හේතුවෙන් ආඝාත තත්ත්වයට පත්වී 20දෙනකු පමන මියගොස් ඇත.
සෑම වසර පහකට වරක්ම ඉන්දියාවේ මහ මැතිවරණය අප්‍රේල් සහ මැයි ගිම්හාන මාසවලදී පැවැත්වේ.
නමුත් මේ වසරේ, උෂ්ණත්වය වාර්තාගත ලෙස ඉහල ගොස් ඇති අතර, රට නිතර නිතර, දැඩි උණුසුම් තත්ත්වයන් වාර්තා විය.
ඉන්දීය සෞඛ්‍ය අමාත්‍යාංශය පවසන්නේ මාර්තු 1 සිට මැයි 30 දක්වා දැඩි උණුසුම් තත්ත්වයන් වාර්තා වී ඇති බවයි. එම කාලය තුළ රෝගීන් 24,849ක් පමණ වාර්තා වී ඇත.
කෙසේ වෙතත්, රාජ්‍ය සංඛ්‍යාලේඛන පවසන්නේ සැබෑ සංඛ්‍යාව මීට වඩා වැඩි විය හැකි බවයි.
උත්තර් ප්‍රදේශ්හි, ප්‍රාන්තයේ ප්‍රධාන මැතිවරණ නිලධාරී නව්දීප් රින්වා වාර්තාකරුවන්ට පැවසුවේ මියගිය මැතිවරණ නිලධාරීන්ගේ පවුල්වලට රුපියල් මිලියන 1.5 ක මුදල් වන්දියක් ලබා දෙන බවයි.
රින්වා මහතා කියා සිටියේ අධික උණුසුම නිසා ඡන්දය ප්‍රකාශ කිරීමට පෝලිමේ සිටි පුද්ගලයකු ක්ලාන්ත වූ බවයි.
“ඡන්දදායකයා සෞඛ්‍ය මධ්‍යස්ථානයකට ප්‍රවාහනය කර ඇති අතර, එහිදී ඔහු මිය ගොස් ඇති බව ප්‍රකාශ විය,” ඔහු පැවසීය.
බිහාර්, මධ්‍ය ප්‍රදේශ් සහ ජාර්කන්ඩ් යන ප්‍රාන්තවලින් ද තාප ආශ්‍රිත මරණ සිදුවී ඇති බවට සැක කෙරේ.
උතුරු සහ මධ්‍යම ඉන්දියාවේ සහ බටහිර ප්‍රදේශයේ උෂ්ණත්වය පසුගිය සති දෙක තුළ අඩුනොවී පැවතිණ, උපරිම උෂ්ණත්වය සෙල්සියස් අංශක 45-46 දක්වා එක දිගට දින කිහිපයක් පවතින අතර සමහර ප්‍රදේශවල සෙල්සියස් අංශක 50 දක්වා ඉහළ යයි.
කෙසේ වෙතත්, මෝසම් වැසි ආරම්භ වීම හේතුවෙන් ඉදිරි දිනවලදී උෂ්ණත්වය පහත වැටීමට ඉඩ ඇති බව ඉන්දීය කාලගුණ දෙපාර්තමේන්තුව පවසනවා.
විදුලි පරිභෝජනය ඉහළ යාම හේතුවෙන් ප්‍රදේශ කිහිපයක් දැඩි ජල හා විදුලි හිඟයකට මුහුණ දී සිටී.
දිල්ලි අගනුවර වීඩියෝ දර්ශණ වල දැක්වෙන්නේ මිනිසුන් ජල ටැංකිවලින් ජලය ලබාගැනීම සඳහා පොරකන ආකාරයයි. අගනුවර බොහෝ ප්‍රදේශවල නිතර විදුලිය ද විසන්ධි වේ.
