මියගිය රුසියානු විපක්ෂ නායක ඇලෙක්සි නවාල්නිගේ දේහය සිකුරාදා මොස්කව්හි සුසාන භූමියක තැන්පත් කිරීමට නියමිත බව වාර්තා වේ.
මරිනෝ දිස්ත්‍රික්කයේ පවත්වන සමුගැනීමේ උත්සවයකින් පසුව බොරිසොවුස්කොයේ සුසාන භූමියේදී අවසන් කටයුතු පැවැත්වීම නියමිතව ඇත.
ඇලෙක්සි නවාල්නි මේ මස මුලදී ආක්ටික් බන්ධනාගාරයක දී හදිසියේ මිය ගියේය.
වසර ගණනාවක් තිස්සේ ඔහු රුසියානු නායක ව්ලැඩිමීර් පුටින්ගේ ඉහළම විවේචකයා විය. නවාල්නිගේ වැන්දඹු බිරිඳ වන යුලියා නවල්නායා මෙන්ම ලෝක නායකයන් කිහිප දෙනෙකු ද ඔහුගේ මරණය සම්බන්ධයෙන් රුසියානු ජනාධිපතිවරයාට දොස් පවරා ඇත.
ඔහුගේ මරණයට හේතුව පිළිබඳ තොරතුරු ස්වල්පයක් නිකුත් කර ඇති අතර රුසියානු බලධාරීන් මුලින් නවාල්නිගේ දේහය ඔහුගේ මව ලියුඩ්මිලාට භාර දීම ප්‍රතික්ෂේප කළේය. අවසානයේ ඔහුගේ මරණයෙන් දින අටකට පසු ඔවුහු දේහය මවට බාරදීමට කටයුතු කළහ.
අවමංගල්‍ය උත්සවය සාමකාමීව සිදුවේද යන්න පිළිබඳව තමාට තවමත් විශ්වාසයක් නොමැති බව යුලියා නවල්නායා මහත්මිය පැවසුවාය. ඇය පවසන්නේ ඇලෙක්සිගෙන් සමුගැනීමට පැමිණි අය පොලිසිය විසින් අත්අඩංගුවට ගනීවිදැයි සැකයක් ඇති බවයි.
අඟහරුවාදා, නවාල්නි ගේ ප්‍රකාශිකා කිරා යාමිෂ් පැවසුවේ අවමංගල උත්සවය පැවැත්වීම සඳහා ස්ථානයක් සොයා ගැනීමට වෙහෙසෙමින් සිටින බවයි. සමහර අවමංගල්‍ය නිවාස ඔවුන් සම්පුර්ණයෙන්ම වෙන් කර ඇති බවත් අනෙක් ස්ථාන, උත්සවය කවුරුන් සඳහා දැයි දැනගත් විට එය ලබාදීම ප්‍රතික්ෂේප කළ බවත් ඇය වැඩිදුරටත් පැවසුවාය.
“එක් ස්ථානයක් අපට පැවසුවේ අවමංගල්‍ය ආයතනවලට අප සමඟ වැඩ කිරීම තහනම් කර ඇති බවයි,” යර්මිෂ් මහත්මිය සමාජ මාධ්‍යවල පළ කළාය.
නවාල්නිගේ මරණයෙන් පසු, ඔහු වෙනුවෙන් රුසියාව පුරා මල් තැබූ පුද්ගලයින් 400 ක් පමණ අත්අඩංගුවට ගෙන ඇති බව මානව හිමිකම් සංවිධානය වන OVO-Info පවසයි.
සිකුරාදා ඔහුගේ අවමංගල්‍යය දැඩි පොලිස් ආරක්ෂාවකට යටත් වීමට ඉඩ ඇති අතර සමහර විට එවැනිම මර්දනයකට යටත් විය හැකි බව විචාරකයෝ පවසති.
