වැඩ වර්ජනයක් හේතුවෙන් දින හයක් වසා දැමීමෙන් පසු පැරිසියේ අයිෆල් කුළුණ ඉරිදා අමුත්තන් සඳහා නැවත විවෘත කිරීමට බලාපොරොත්තු වන බව වාර්තා වේ.
කුළුණ කළමනාකරණය කරන ආකාරය සම්බන්ධයෙන් ඇති වූ ආරවුලක් හේතුවෙන් කම්කරුවන් මුලින්ම වැඩ නවත්වා පිටව ගියේ පසුගිය සඳුදා (19) ය.
එහි ක්‍රියාකරු, Société d’Exploitation de la Tour Eiffel (SETE) පැවසුවේ, සෙනසුරාදා (24) කම්කරු වෘත්තීය සමිති සමඟ ගිවිසුමකට එළඹීමෙන් පසු නැවත සේවයට පැමිණීමට කම්කරුවන් එකඟ වූ බවයි.
2024 ඔලිම්පික් ක්‍රීඩා උළෙල මෙම ග්‍රීෂ්මයේදී පැවැත්වීමට පැරිස් අපේක්ෂාවෙන් සිටින අතර, පසුගිය මාස තුන තුළ අයිෆල් කුළුණේ සේවකයන් සිදු කළ දෙවන වර්ජනය මෙයයි.
SETE ප්‍රවේශපත්‍ර දරන්නන්ගෙන් සමාව අයැද සිටි අතර, ප්‍රවේශපත්‍ර ලබාගෙන නැරඹීමට නොහැකි වූ 100,000කගේ පමණ මුදල් ආපසු ගෙවන බව පැවසීය.
වෘත්තීය සමිති පැවසුවේ, අනාගත අමුත්තන්ගේ සංඛ්‍යාව පිළිබඳ පුම්බන ලද ඇස්තමේන්තුවක් සහ නඩත්තු කිරීමේ සහ ප්‍රතිසංස්කරණය කිරීමේ පිරිවැය අවතක්සේරු කිරීම මත පදනම්ව SETE හි ව්‍යාපාර ආකෘතියට එරෙහිව සේවකයින් වැඩ වර්ජනය කිරීමට තීරණය කර ඇති බවයි. කෙටි කාලීනව ලාභයක් අපේක්ෂා කරන බවට ද වෘත්තීය සමිති SETE වෙත චෝදනා කළේය.
වර්ජකයන් පවසන්නේ කුළුණ පසුගිය වසර 14 තිස්සේ පින්තාරුකර නොමැති බවයි. අනෙකුත් අළුත්වැඩියා කිරීම් ද නියමිත වේලාවට සිදුනොවන බවට ද ඔවුහු චෝදනා කරති.
