ඉන්දියානු අභ්‍යවකාශ ඒජන්සිය විසින් කළු කුහර වැනි තාරකා විද්‍යාත්මක වස්තූන් අධ්‍යයනය කිරීම සඳහා නිරීක්ෂණාගාරයක් රැගත් රොකට්ටුවක් සාර්ථකව අභ්‍යවකාශගත කර ඇත.
එක්ස්පොසැට් නම් මෙම එන්ද්‍රිකාව කළු කුහර පිළිබඳ ගැඹුරු පර්යේෂණ සිදු කිරීම සඳහා සඳුදා (01) ඉන්දියාවේ ශ්‍රීහරිකෝටා අභ්‍යවකාශ තොටුපළෙන් දියත් කරන ලදී.
මින්පෙර කළුකුහර අධ්‍යයනයට යානාවක් යවා ඇත්තේ නාසා ආයතනය මගින් පමණක් වන අතර එය 2021 දී දියත් කෙරිණ.
ඉන්දියානු අභ්‍යවකාශ ඒජන්සිය පැවසුවේ විද්‍යාඥයින්ට ඔවුන්ගේ “කළු කුහර පිළිබඳ දැනුම” වැඩිදියුණු කරගැනීමට අවශ්‍ය බවයි. “ඉදිරියේදී අපට උද්යෝගිමත් කාලයක් ලැබෙනු ඇත,” ඉන්දීය අභ්‍යවකාශ පර්යේෂණ සංවිධානයේ (ඉස්රෝ) සභාපති එස් සෝමනාත් පැවසීය.
කළු කුහරයක ගුරුත්වාකර්ෂණ බලය කොතරම් ප්‍රබලද යත් කිසිම දෙයකට, ආලෝකයට පවා ගැලවිය නොහැක. ඇතැම් විශාල තාරකාවල පුපුරන සුලු අභාවයෙන් පසු කළු කුහර මතු වන අතර සමහර ඒවා සැබවින්ම විශාල වේ – ඒවායේ විශාලත්වය අපගේ සූර්යයාගේ ස්කන්ධය මෙන් බිලියන ගුණයකින් වැඩි වේ.
රුපියල් මිලියන 250ක (ඩොලර් මිලියන 30ක්; පවුම් මිලියන 23.5ක්) වියදමින් ඉදිකරන ලද XPoSat චන්ද්‍රිකාවේ ආයු කාලය වසර පහක් ලෙස ගණන් බලා ඇත.
දියත් කිරීම සිදු වන්නේ ඉන්දියානු අභ්‍යවකාශ ඒජන්සියේ අති සාර්ථක වසරකට පසුවය. පසුගිය අගෝස්තු මාසයේදී, එහි චන්ද්‍ර මෙහෙයුම චන්ද්‍රයාන්-3 චන්ද්‍ර දක්ෂිණ ධ්‍රැව කලාපය ආසන්නයේ ස්පර්ශ වූ අතර, එය මීට පෙර කිසිවෙක් ළඟා නොවූ ප්‍රදේශයකි. දින කිහිපයකට පසු, ඉන්දියාව සූර්යයා වෙත එහි පළමු නිරීක්ෂණ මෙහෙයුම – Aditya-L1 දියත් කළේය.
සඳුදා දියත් කිරීම ඉස්රෝ විසින් මේ වසරේ සිදු කිරීමට සැලසුම් කර ඇති ව්‍යාපෘති කිහිපයකින් එකක් පමණි.
ඉන්දියානු අභ්‍යවකාශ ඒජන්සිය 2025 වන විට මිනිසුන් සහිත මෙහෙයුම් සඳහා සූදානම් වීමට අපේක්ෂා කරයි.
