ජනවාරි පළමු වනදා ජපානයට බලපෑ ප්‍රබල භූමි කම්පාවෙන් මියගිය සංඛ්‍යාව 30 දක්වා ඉහල ගොස් ඇතැයි ජපාන මාධ්‍ය වාර්තා කරයි. බටහිර වෙරළබඩ ඉෂිකාවා ප්‍රාන්තයේ නෝටෝ අර්ධද්වීපයේ හටගත් මෙම භූ කම්පනය රිච්ටර් මාපාංක 7.6ක විශාලත්වයෙන් යුතු විය.
බටහිර වෙරළ තීරයේ ඇතිවූ සුනාමි තත්ත්වය හේතුවෙන් ජනතාව උස්බිම් වෙත පලාගිය අතර නිවාස සහ මෝටර් රථ වතුරේ ගසාගෙන ගිය බව පැවසේ.
රට පුරා සිටින හමුදා නිලධාරීන්, ගිනි නිවන භටයින් සහ පොලිස් නිලධාරීන්ගෙන් සමන්විත 3,000 ක ගලවා ගැනීමේ කාර්ය මණ්ඩලයක් ඉෂිකාවා ප්‍රාන්තයේ නෝටෝ අර්ධද්වීපයේ භූමිකම්පා ස්ථාන වෙත යවා ඇතැයි බලධාරීහු පවසති.
“භූකම්පනයෙන් විපතට පත් වූවන් සෙවීම සහ ගලවා ගැනීම කාලයට එරෙහි සටනක්” යැයි අගමැති ෆුමියෝ කිෂිඩා අඟහරුවාදා හදිසි රැස්වීමකදී පැවසුවේය.
නෝටෝ අර්ධද්වීපයේ උතුරු කෙළවරට ප්‍රවේශ වීම ගැලවුම්කරුවන්ට ඉතා අපහසු බව කිෂිඩා පැවසුවේය. හෙලිකොප්ටර් නිරීක්ෂණ මගින් පෙන්වා දෙන්නේ බොහෝ ස්ථාවන ගිනි ගැනීම් ඇතිවී ඇති අතර ගොඩනැගිලි සහ යටිතල පහසුකම්වලට පුලුල් ලෙස හානි සිදුවී ඇති බවයි. ගලවා ගැනීමේ අපේක්ෂාවෙන් පුද්ගලයින් 120 ක් පමණ සිටින බව රජයේ ප්‍රකාශක පසුව පැවසීය.
ප්‍රදේශයට පැමිණෙන බොහෝ දුම්රිය සේවා සහ ගුවන් ගමන් අත්හිටුවා ඇත. නෝටෝ ගුවන් තොටුපළ එහි ධාවන පථයට, පර්යන්තයට සහ ප්‍රවේශ මාර්ගවලට හානි වීම හේතුවෙන් වසා දමා ඇති අතර, එහි වාහන නැවැත්වීමේ ස්ථානයේ 500 දෙනෙකු වාහන තුළ සිරවී සිටින බව NHK රූපවාහිනිය වාර්තා කළේය.
එහි නගරාධිපති පවසන්නේ, භූමිකම්පාවේ කේන්ද්‍රය ආසන්නයේ පිහිටි වෙරළබඩ නගරයක් වන Suzu හි, නිවාස 1,000 ක් පමණ විනාශ වී තිබිය හැකි බවයි. “තත්වය විනාශකාරීයි,” ඔහු පැවසීය.
ගිනි නිවන භටයින් නගර කිහිපයක ලැව්ගිනි සමඟ සටන් කරමින් සිටින අතර කඩා වැටුණු ගොඩනැගිලිවල සිරවී සිටින පුද්ගලයින් මුදා ගැනීමට උත්සාහ කරමින් සිටින බව ජපානයේ ආපදා කළමනාකරණ ඒජන්සිය පවසයි.
