තම නාවික හමුදාවට අයත් යුද නෞකා දෙකක් තායිවාන සමුද්‍ර සන්ධියේ ජාත්‍යන්තර මුහුද හරහා යාත්‍රා කරන බව ඇමරිකානු හමුදාව නිවේදනය කර තිබේ.
ඇමරිකානු නාවික හමුදාව වැඩිදුරටත් කියා සිටියේ චාන්සලර්ස්විල් සහ ඇන්ටීටම් යන නෞකා දෙක අඛණ්ඩ මෙහෙයුම සිදු කරන බවයි. එවැනි මෙහෙයුමක් සාමාන්‍යයෙන් සම්පූර්ණ කිරීමට පැය 8 සිට 12 දක්වා ගත වෙයි.
චීනය පවසන්නේ මෙම අවස්ථාව තම හමුදාව විසින් සමීපව නිරීක්ෂණය කරන බවයි.
ඇමරිකා කථානායක නැන්සි පෙලෝසි තායිවානයේ සංචාරය කිරීමෙන් පසු ඇමරිකාව විසින් සිදුකළ පළමු මෙහෙයුම මෙයයි.
විචාරකයින් පවසන්නේ ඇමරිකාවේ මෙම ක්‍රියාව මගින් චීනය කෝපයට පත් කරනු ඇති බවයි.
අගෝස්තු මස මුල පෙලෝසිගේ තායිවාන සංචාරය චීනය කෝපයට පත් කළ අතර එය තායිවානයේ අභ්‍යන්තර කටයුතුවලට මැදිහත් වීමට ඇමරිකාව දරන ලද උත්සාහයක් ලෙස සැලකින. චීනය පසුව තායිවානය ආසන්නයේ හමුදා අභ්‍යාස දියත් කළ අතර එය දිගටම පැවතුනි.
“මෙම නැව් ඕනෑම වෙරළබඩ රාජ්‍යයක භෞමික මුහුදෙන් ඔබ්බට ඇති සමුද්‍ර සන්ධියේ කොරිඩෝවක් හරහා සංක්‍රමණය විය හැක,” එක්සත් ජනපද නාවික හමුදාව පැවසීය.
නිදහස් හා විවෘත ඉන්දු පැසිෆික් කලාපයක් සඳහා එක්සත් ජනපදයේ කැපවීම මෙම මෙහෙයුමෙන් පෙන්නුම් කරන අතර එක්සත් ජනපද හමුදාව ජාත්‍යන්තර නීතියට ඉඩ දෙන ඕනෑම තැනක පියාසර කරමින් සහ යාත්‍රා කරමින් ක්‍රියාත්මක වන බව නාවික හමුදාව පවසයි.
චීන හමුදාවේ නැගෙනහිර විධානය පැවසුවේ තමන් නැව් පසුපස හඹා යමින් ඔවුන්ට අනතුරු අඟවන බවයි.
අපගේ භට පිරිස් සීරුවෙන් සිටින අතර ඕනෑම අවස්ථාවක ඕනෑම ප්‍රකෝපකාරී ක්‍රියාවක් මැඩපැවැත්වීමට සූදානම්ව සිටියි,” එය නිවේදනයක් නිකුත් කරමින් කියා සිටියේය.
තායිවානයේ ආරක්ෂක අමාත්‍යාංශය පැවසුවේ නැව් දකුණු දිශාවට යාත්‍රා කරන බවයි. තම හමුදා නිරීක්ෂණය කරන නමුත් “තත්වය සාමාන්‍ය” බවත් ඔවුහු පැවසූහ.
මහජන චීන සමූහාණ්ඩුව පිහිටුවන ලද කොමියුනිස්ට්වාදීන් සමඟ ඇති වූ සිවිල් යුද්ධයකින් පරාජයට පත් වූ චීන සමූහාණ්ඩුවේ රජය 1949 දී තායිවානයට පලා ගිය දා සිට පටු තායිවාන සමුද්‍ර සන්ධිය නිරන්තර හමුදා ආතතියේ මූලාශ්‍රයක් විය.
එක්සත් ජනපද ජනාධිපති ජෝ බයිඩන්ගේ පරිපාලනය වොෂින්ටනය සහ බීජිං අතර ආතතිය ගැටුමක් බවට පත් නොවී තබා ගැනීමට උත්සාහ කර ඇති අතර, කොන්ග්‍රස් සංචාර සාමාන්‍ය දෙයක් බව ඔවුහු අවධාරනය කරති.
කෙසේවුවද ඇමරිකාවට තායිවානය සමඟ විධිමත් රාජ්‍ය තාන්ත්‍රික සබඳතා නොමැත.
චීනය පවසන්නේ තායිවානයේ පාලනය ඕනෑම අවස්ථාවක තමන් යටතට ගැනීමට හැකියාව ඇති බවයි.
කෙසේ වුවද තායිවානය පවසන්නේ මහජන චීන සමූහාණ්ඩුව කිසි දිනක තායිවානය පාලනය කර නොමැති බැවින් එයට කිසිදු හිමිකම් පෑමක් නොමැති බවයි. තම අනාගතය තීරණය කළ හැක්කේ තායිවානයේ මිලියන 23 ක ජනතාවට පමණක් බවත් තායිවානය සඳහන් කර සිටියි.
