ඉදිරි දිනවල දී විදුලි ගාස්තු සංශෝධනය කරන බවත් මේ හේතුවෙන් විදුලි බිල තුන් හතර ගුණයකින් වැඩි වනු ඇති බවත් විදුලි බල හා බලශක්ති අමාත්‍ය කංචන විජේසේකර පවසයි.
ඔහු මේ බව කියා සිටියේ කොළඹ පැවැති මාධ්‍ය හමුවක දී අදහස් දක්වමිනි.
විදුලි බිල වැඩිකිරීමේ දී කර්මාන්ත ශාලා සහ හෝටල් සඳහා කඩිනමින් විදුලි බිල වැඩිකිරීමට සිදුවන බවත් අඩු ආදායාම්ලාභීන් සහ විදුලිය භාවිතය අඩු නිවාස සඳහා සහනදායී ක්‍රමයක් අනුගමනය කිරීම කෙරෙහි අවධානය යොමු වී ඇති බවත් ඇමතිවරයා වැඩිදුරටත් කිවේය.
විදුලිබල මණ්ඩලය වාර්ෂිකව රුපියල් බිලියන 500ක පාඩුවක් ලබන බව ද අමාත්‍යවරයා එහි දී සඳහන් කළේය. විදුලිබල මණ්ඩලයේ ආදායම වාර්ෂිකව රුපියල් බිලියන 250ක් පමණ වන අතර විදුලි නිෂ්පාදනය සඳහා යොදන පිරිවැය රුපියල් බිලියන 750කි.
