ඇමරිකාවේ දකුණු ටෙක්සාස් ප්‍රාන්තයේ පාසලක සිදුවූ වෙඩි තැබීමකින් කුඩා ළමුන් 19දෙනකු සහ වැඩිහිටියන් දෙදෙනකු මියගොස් තිබේ. පොලිසිය විසින් වහාම තුවක්කුකරු මරා දැමීය. උවල්ඩේ නගරයේ රොබ් ප්‍රාථමික පාසලේ මෙම දරුණු අපරාධය සිදුවූ බව බව නිලධාරීහු පවසති.
18 හැවිරිදි සැකකරු සතුව අත් තුවක්කුවක්, AR-15 අර්ධ ස්වයංක්‍රීය රයිෆලයක් සහ අධි ධාරිතා මැගසින් තිබු බව විමර්ශකයෝ පවසති. ඔහු එම ප්‍රදේශයේ උසස් පාසල් සිසුවෙකු වන්නට ඇතැයි ප්‍රාදේශීය මාධ්‍ය වාර්තා කරයි.
දිස්ත්‍රික් පොලිස් ප්‍රධානී පැවසුවේ වෙඩි තැබීම අඟහරුවාදා ප්‍රාදේශීය වේලාවෙන් රාත්‍රී 11:32 ට ආරම්භ වූ බවත්, ප්‍රහාරකයා “මෙම දරුණු අපරාධයේදී තනිවම ක්‍රියා කර ඇති” බව විමර්ශකයින් විශ්වාස කරන බවත්ය. ටෙක්සාස් ආණ්ඩුකාර ග්‍රෙග් ඇබට් පැවසුවේ වෙඩික්කරු, සැල්වදෝර් රමෝස් නම් පුද්ගලයෙකු ලෙස හඳුනාගෙන ඇති බවයි.
ඝාතනයට ලක්වූ වැඩිහිටියන්ගෙන් එක් අයෙක් ගුරුවරියකි. පාසල් වෙබ් අඩවියේ ඇගේ පිටුවේ සඳහන් වූයේ ඇයට විද්‍යාලයේ දියණියක් සිටින අතර දිවීමට සහ කඳු නැගීමට ප්‍රිය කරන බවයි.
66 හැවිරිදි කාන්තාවක් සහ 10 හැවිරිදි දැරියක් සැන් ඇන්ටෝනියෝ හි රෝහලක අසාධ්‍ය තත්ත්වයේ පසුවන බව රෝහල් බලධාරීහු පවසති.
ඇසෝසියේටඩ් ප්‍රෙස් ප්‍රවෘත්ති ඒජන්සිය වාර්තා කරන්නේ වෙඩි තැබීම ආරම්භ වන විට අසල සිටි එක්සත් ජනපද දේශසීමා මුර සංචාරයේ නිලධාරියෙකු පාසලට කඩා වැදී බාධකයක් පිටුපස සිටි තුවක්කුකරු වෙඩි තබා මරා දැමූ බවයි. තුවක්කුකරු සමඟ ඇති වූ වෙඩි හුවමාරුවේදී දේශසීමා නියෝජිතයන් දෙදෙනෙකුට ද වෙඩි වැදී ඇති බව වාර්තා වේ. එක් නියෝජිතයෙකුගේ හිසට වෙඩි වැදී ඇති අතර, ඔවුන් දෙදෙනාම මේ වන විට රෝහලේ ස්ථාවර තත්ත්වයේ පසුවන බව නිලධාරීහු පවසති.
තම දරුවන් මරා දමා ඇති බවට වූ විනාශකාරී ආරංචිය එහි රැස්ව සිටි පවුලේ සාමාජිකයන්ට ලැබීමත් සමඟ පිටතින් හඬා වැලපීමද ඇසෙන්නට විය. මියගිය අය හඳුනා ගැනීමට උපකාර කිරීම සඳහා DNA සාම්පල ලබා දෙන ලෙස සමහර දෙමාපියන්ගෙන් පොලිසිය ඉල්ලා තිබිණ.
පාසල් දිස්ත්‍රික් අධිකාරී හැල් හැරල් පැවසුවේ වෙඩි තැබීමෙන් පසු පාසල් වාරය කලින් අවසන් කළ බවයි.
CBS ප්‍රවෘත්ති වලට අනුව, ප්‍රහාරකයා ප්‍රහාරය සිදු කරන විට ශරීර සන්නාහයක් පැළඳ සිටියේය. මැයි 14 වන දින නිව් යෝර්ක් හි බෆලෝ හි සිල්ලර වෙළඳසැලකට පහර දුන් බවට සැක කරන තවත් 18 හැවිරිදි තරුණයෙක් ශරීර සන්නාහයක් පැළඳ අර්ධ ස්වයංක්‍රීය රයිෆලයක් ද රැගෙන සිටියේය. මේවා එක්සත් ජනපදයේ විකිණීමට ඇති ඒවාය.
මේ වසරේ පමණක් පාසල්වල වෙඩි තැබීම් 27ක් සිදුවී ඇත. තුවක්කුකරුවෙකු තම පන්ති කාමරයට ඇතුළු වුවහොත් කුමක් කළ යුතු දැයි ඇමරිකාවේ තරුණ පාසල් දරුවන්ට නිරතුරුවම පුරුදු පුහුණු කරති.
මීට දින 10 කට පෙර නිව් යෝර්ක් හි සමූහ වෙඩි තැබීමකින් පුද්ගලයන් දස දෙනෙකු මිය ගියේය.
2012 වසරේ කනෙක්ටිකට් හි සැන්ඩි හූක් ප්‍රාථමික පාසලේ සිදුවූ වෙඩි තැබීම ද මෙවැනි මාරාන්තික එකකි. එහිදී මියගිය 26 දෙනාගෙන් 20 දෙනෙකුම වයස අවුරුදු පහත් හයත් අතර පසුවන්නන් විය.
දේශපාලකයින් මෙය ඇමරිකාවට අනන්‍ය වූ ගැටලුවක් ලෙස හඳුනාගෙන ඇති අතර, වෙඩි තැබීම්, ළමුන් සහ නව යොවුන් වියේ දරුවන්ගේ මරණයට ප්‍රධානතම හේතුව ලෙස හඳුනාගෙන තිබේ. එය මෝටර් රථ අනතුරු අභිබවා ගොස් ඇත. නමුත් මෙය දේශපාලනඥයින්ට විසඳාගත නොහැකි ගැටලුවක් බව පෙනෙන්නට තිබේ.
“ඇයි අපි දිගටම මේක වෙන්න දෙන්නෙ? අප මේ සංහාරයන් සමග දිගටම ජීවත් වනවාදැයි තීරණය කළ යුතුයි” ජනාධිපති බයිඩන් පැවසීය. ධවල මන්දිරයේ සිට කළ මෙම කතාවේදී එක්සත් ජනපද ජනාධිපති ජෝ බයිඩන් කියා සිටියේ මෙම සිදුවීමෙන් තමා දැඩි කම්පනයට පත්ව සිටින බවයි. “සිදු වූ දේ ඇසින් දුටු කුඩා දරුවන්ට කුමක් සිතෙන්නට ඇත්ද?, ඔවුන්ගේ මිතුරන් මිය යනවා දැකීම කෙතරම් බිහිසුනු ද?,” ඔහු පැවසීය. “ඔවුන් ඔවුන්ගේ ජීවිත කාලය පුරාම මෙම බියකරු මතක සමඟ ජීවත් වනු ඇත.”
උවෙල්ඩේ හි විපතට පත් වූවන්ට ගෞරව දැක්වීම සඳහා ධවල මන්දිරයේ සහ අනෙකුත් එක්සත් ජනපද ෆෙඩරල් ගොඩනැගිලිවල ධජ අඩකුඹු කරන ලෙස ඔහු නියෝග කළේය.
එහෙත්, දැඩි තුවක්කු පාලන නීති සම්මත කිරීමට ඩිමොක්‍රටික් පාක්ෂිකයන් තවමත් ළං වන බවට ලකුණක් නැත. සමහර රිපබ්ලිකානුවන් දැනටමත් ඔවුන්ගේම දේශපාලන අරමුණු නරුම ලෙස ඉදිරියට ගෙන යාම සඳහා මෙම පාසලේ වෙඩි තැබීම භාවිතා කරන බවට චෝදනා එල්ලවී ඇත. අහිංසක පාසල් සිසුන් ඝාතනය කිරීමත් සමග ඇමරිකාවේ තුවක්කු පිළිබඳ විවාදය යළිත් ඇවිලී ඇතත් එය යෝජනාවකට සමීප කර නැත.
අඟහරුවාදා වොෂින්ටන් ඩීසී හි එක්සත් ජනපද සෙනෙට් සභාව අමතමින්, කනෙක්ටිකට් ඩිමොක්‍රටික් සෙනෙට් සභික ක්‍රිස් මර්ෆි තුවක්කු පාලන නීති සම්මත කරන ලෙස තම සගයන්ගෙන් අයැද සිටියේය. “මේක වෙන්නේ මේ රටේ විතරයි. වෙන කොහෙවත් නෙවෙයි, පොඩි ළමයි ඉස්කෝලේ යන්නේ අද වෙඩි තියයි කියලා බයෙන්.” හෙතෙම පැවසීය.
නමුත් රිපබ්ලිකානුවෙකු වන ටෙක්සාස් සෙනෙට් සභික ටෙඩ් කෲස් තුවක්කු පාලනය සඳහා වූ ඉල්ලීම් ප්‍රතික්ෂේප කළේය. ඔහු පැවසුවේ “නීති ගරුක පුරවැසියන්ගේ. අයිතීන් සීමා කිරීම නොකළ යුතු බවයි. එය ඵලදායී නොවේ. එමගින් අපරාධ වළක්වන්නේ නැත.”
FBI වාර්තාවක් තහවුරු කර ඇත්තේ 2020 දී කොරෝනා වෛරසය ආරම්භ වූ දා සිට මෙවැනි වෙඩි තැබීම් දෙගුණ වී ඇති බවයි.
