ඉන්දියාවේ ඊසානදිග ඇසෑම් ප්‍රාන්තයේ හදිසි ගංවතුර සහ නායයෑම් හේතුවෙන් පසුගිය දින 10 තුළ අවම වශයෙන් පුද්ගලයින් 25 දෙනෙකු මිය ගොස් 650,000 කට වැඩි පිරිසක් අවතැන්වී ඇතැයි බලධාරීහු පවසති.
අධික මෝසම් වර්ෂාව ඇසෑම් ප්‍රාන්තයේ වාර්ෂිකව සිදු වන අතර, එහි ප්‍රතිඵලයක් ලෙස ගංවතුර සහ නායයෑම් ඇති වන අතර එමඟින් පදිංචිකරුවන්ට තම නිවෙස් අතහැර පලා යාමට සිදුවෙයි.
ටිබෙටයේ සිට ඉන්දියාවට සහ අවසානයේ බංග්ලාදේශයට ගලා බසින ලොව විශාලතම ගංගාවන්ගෙන් එකක් වන බ්‍රහ්මපුත්‍ර ගඟ ඇසෑම් ප්‍රාන්තයේ දී ඉවුරු කැඩී පිටාර ගැලීම හේතුවෙන් දිස්ත්‍රික්ක 26 ක ගම්මාන 1,800 කට වැඩි ප්‍රමාණයක් මේ මාසයේ ජලයෙන් යට විය.
“පසුගිය දින 10 තුළ දියේ ගිලීමේ සිදුවීම් වලින් පුද්ගලයින් 20 දෙනෙකු මිය ගොස් ඇති අතර තවත් පස් දෙනෙකු නායයෑම් වලින් මිය ගොස් ඇත,” ඇසෑම් ජල සම්පත් අමාත්‍ය පිජුෂ් හසාරිකා පැවසුවේය. ඔහු වැඩිදුරටත් පවසා සිටියේ මේ වනවිට ජල මට්ටම අඩුවෙමින් පවතින බවයි.
බලධාරීන් විසින් දිස්ත්‍රික්ක 20 ක් පුරා සහන කඳවුරු 366 ක් පිහිටුවා ඇති අතර 95,000 කට වැඩි පිරිසකට තාවකාලික නවාතැන් ලබා දී ඇත. ප්‍රාන්තයේ සමහර ප්‍රදේශවල මාර්ග, නිවාස සහ ගොඩනැගිලි ජලයෙන් යටවී ඇත. ගංවතුර හේතුවෙන් ප්‍රාන්තයේ දුම්රිය මාර්ග පද්ධතියට ද අලාභ හානි සිදුවී ඇත.
https://www.reuters.com/world/india/floods-kill-25-indias-assam-displace-thousands-2022-05-24/
