උතුරු කොරියාවේ කොරෝනා හේතුවෙන් මිලියනයකට වැඩි පිරිසක් මේ වන විට රෝගාතුර වී ඇති බව එරට රාජ්‍ය මාධ්‍ය පවසයි.
දැනට පුද්ගලයන් 50 ක් පමණ මියගොස් ඇති නමුත් නමුත් එම සැක සහිත රෝගීන්ගෙන් කොපමණ සංඛ්‍යාවක් කොවිඩ් සඳහා ධනාත්මක බව පරීක්‍ෂා කර ඇත්ද යන්න පැහැදිලි නැත.
උතුරු කොරියාවට ඇත්තේ සීමිත පරීක්ෂණ ධාරිතාවකි, එබැවින් කොරෝනා රෝගීන් තහවුරු වී ඇත්තේ ස්වල්පයකි.
එන්නත් නොමැතිකම සහ දුර්වල සෞඛ්‍ය සේවා පද්ධතිය හේතුවෙන් උතුරු කොරියානුවන් වෛරසයට විශේෂයෙන් ගොදුරු විය හැකිය. මේවනවිට හුදකලා කර ඇති රට තුළ, රටපුරා අගුලු දැමීමක් ක්‍රියාත්මක වේ.
රාජ්‍ය මාධ්‍ය පැවසුවේ ජනපති කිම් ඉල් සුන් සති අන්තයේ හදිසි දේශපාලන මණ්ඩල රැස්වීමක් කැඳවූ අතර එහිදී ඔහු ජාතික ඖෂධ සංචිත බෙදා හැරීම අවුල් කරන බවට නිලධාරීන්ට චෝදනා කළ බවයි. හමුදාවේ වෛද්‍ය බලකාය යොදවමින් “ප්යොංයැං නගරයේ ඖෂධ සැපයුම වහා ස්ථාවර කිරීමට” පියවර ගන්නා ලෙස කිම් නියෝග කර ඇත.
උතුරු කොරියාව සිය ප්‍රථම කොරෝනා රෝගියා පසුගිය සතියේ වාර්තා කළ නමුත් ප්‍රවීණයන් විශ්වාස කරන්නේ වෛරසය යම් කාලයක් තිස්සේ රට තුළ සංසරණය වී ඇති බවයි.
මේ වනවිට වෛරස පාලනය කිරීම සඳහා දැඩි සීමාවන් පනවා ඇති අතර, එයට අගුලු දැමීම් සහ සේවා ස්ථානවල රැස්වීමේ සීමාවන් ඇතුළත් වේ.
ජාත්‍යන්තර ප්‍රජාව පසුගිය වසරේ උතුරු කොරියාවට මිලියන ගණනක් AstraZeneca එන්නත සහ චීනයේ නිෂ්පාදිත කොරෝනා එන්නත් සැපයීමට ඉදිරිපත් වූ නමුත් උතුරු කො‍රියානු කියා සිටියේ 2020 ජනවාරි මස මුලදී එහි දේශසීමා වසා තැබීමෙන් තමන් කොවිඩ් පාලනය කළ බවයි.
උතුරු කොරියාව දකුණු කොරියාව සහ චීනය සමඟ ගොඩබිම් දේශසීමා බෙදාගෙන ඇති අතර, එම රටවල් දෙකෙහිම මේ වනවිට විශාල වශයෙන් රෝගය පැතිරෙමින් පවතී. චීනය දැන් එහි විශාලතම නගරවල අගුලු දැමීමත් සමඟ ඕමික්‍රෝන් රැල්ලක් පාලනය කිරීමට අරගල කරමින් සිටී.
එන්නත් මාත්‍රා, සෞඛ්‍ය සේවකයින් සහ වෛද්‍ය උපකරණ ඇතුළුව ඉල්ලීම් කළහොත් උතුරු කොරියාවට අසීමිත ආධාර යැවීමට දකුණු කොරියාව ඉදිරිපත් වී ඇත.
“මාරාන්තික වසංගතය පැතිරීම ආරම්භයේ සිටම අපේ රට තුළ මහත් ව්‍යසනයක් ඇතිවිය,” නිල KCNA ප්‍රවෘත්ති ඒජන්සිය කිම් ජනපති උපුටා දක්වමින් කියා සිටියේය.
සෘජු සෞඛ්‍ය බලපෑමට අමතරව උතුරු කොරියාවේ ආහාර නිෂ්පාදනය අඩුවීම කෙරෙහි බියක් මතු වී තිබේ. රට 1990 ගණන්වල කුරිරු සාගතයකට ගොදුරු වූ අතර අද වන විට ලෝක ආහාර වැඩසටහන ඇස්තමේන්තු කරන්නේ රටේ මිලියන 25 ක ජනතාවගෙන් මිලියන 11 ක් මන්දපෝෂණයෙන් පෙළෙන බවයි.
කෘෂිකාර්මික සේවකයන්ට කෙත්වතු නඩත්තු කිරීමට නොහැකි වුවහොත්, අතිශයින් බරපතල තත්ත්වයක් උදාවනු ඇති බව විශ්ලේෂකයෝ පවසති.
