ඌව වෙල්ලස්සේ සශ්‍රීක ඉඩම් අක්කර 62,500ක් නීති විරෝධී ලෙස පුද්ගලික සමාගම්වලට පවරාදීමට රජය ගන්නා උත්සාහය වහා නතර කරන ලෙස රජයට බලකිරීමේ යෝජනාවක් ලංකා සම සමාජ පක්ෂයේ මොණරාගල දිස්ත්‍රික් සම්මේලනයේ දී සම්මත කෙරිණි.
එම සම්මේලනය පසුගිය මාර්තු 27 වැනි දා මොණරාගල දී පැවැත්විණි.
ජනතාව චෝදනා කරන්නේ මෙම ඉඩම් පවරාදීමෙන් විශාල පාරිසරික හානියක් සිදුවන බවයි. එමෙන් ම පුරාවිද්‍යාත්මක උරුමයන් රැසක් විනාශ වන බවත්, එම ඉඩම් සිංගප්පූරු සමාගමක් ඇතුළු විදේශීය බහුජාතික සමාගම් සහ දේශීය කෘෂි ව්‍යාපාරික සමාගම්වලට ලබාදීමෙන් ප්‍රදේශවාසීන්ගේ අයිතිවාසිකම් කඩවන බවත් ජනතාවගෙන නැගෙන චෝදනාවකි.
රටේ ගොවි ජනතාවගේ ආර්ථිකය නංවා සෞභාග්‍යය උදාකිරීම සඳහාත්,රටේ මේ වනවිට උද්ගතව තිබෙන ආර්ථික අර්බුදය තුළ ජනතාව මුහුණ දෙන ඛේදවාචකයෙන් අත්මිදීම සඳහාත් මෙම ඉඩම් ගොවි ජනතාවගේ සාමූහික සමූපාකාර ගොවිපලවල් බවට පරිවර්තනය කිරීමට පියවර ගන්නා ලෙසත් සම සමාජ මොණරාගල දිස්ත්‍රික් සම්මේලනය මෙහිදී අවධාරණය කෙරිණි.
ලංකා සම සමාජ පක්ෂයේ මධ්‍යම කාරක සභික, මොණරාගල දිස්ත්‍රික් සංවිධායක චාමර නානායක්කාර සහ පක්ෂයේ බිබිල ආසන සංවිධායක තැරෑලේ ආනන්ද හිමියන්ගේ සංවිධායකත්වයෙන් පැවැත්වුණු සමසමාජ දිස්ත්‍රික් සම්මේලනයේ ප්‍රධාන දේශනය පක්ෂයේ ලේකම්,පාර්ලිමේන්තු මන්ත්‍රී මහාචාර්ය තිස්ස විතාරණ විසින් පවත්වන ලද අතර ආරාධිත දේශනය මහාචාර්ය සුමනසිරි ලියනගේ විසින් පවත්වනු ලැබීය.
