බේරුවල ධීවර වරායට නිතර පැමිණෙන පුද්ගලයන් 10 දෙනෙකු කොරෝනා ආසාදිත බව තහවුරුවීමත් සමඟ අද (23) සිට නැවත දැනුම්දෙන තුරු බේරුවල ධීවර වරාය තාවකාලිකව වසා දැමූ බව වරාය කළමනාකරවරයා පවසයි.
පෑලියගොඩ මත්ස්‍ය වෙළෙඳ පොළට මසුන් රැගෙන ගිය ලොරි රථ රියදුරන් හා සහායකයන් 10 දෙනකුට මෙලෙස කොරෝනා ආසාදිත වී ඇත. පෑලියගොඩ මත්ස්‍ය වෙළෙඳ පොළ ආශ්‍රිතව කොරෝනා පැතිරයාම හේතුවෙන් ඊයේ ධීවර වරාය කිහිපයක අහඹු ලෙස පීසීආර් පරීක්ෂණ සිදුකෙරිණි. ඒ අනුව බේරුවල ධීවර වරායේ පුද්ගයන් 100ක පිරිසකගේ ජෛව සාම්පල ලබාගෙන ඊයේ පීසීආර් පරීක්ෂණ සඳහා යොමුකර තිබූ බව බේරුවල සෞඛ්‍ය වෛද්‍ය නිලධාරී කාර්යාලය පවසයි.
වරාය කළමනාකරු එඩ්වඩ් දයාමාල් මහතා පවසන්නේ ධීවර වරායේ සෞඛ්‍ය ආරක්ෂිත ක්‍රම අනුගමනය කිරීම පිළිබඳ නිරන්තරව ම ධීවරයන් දැනුම්වත් කර තිබූ අතර පිටතින් පැමිණෙන පුද්ගලයන්ට ද ඒ සඳහා අවශ්‍ය පහසුකම් සපයා තිබූ බවයි.
