මෙක්සිකෝවේ දකුණු දිග චිපාස් ප්‍රාන්තයේ දී සංක්‍රමණිකයන් ප්‍රවාහනය කරමින් තිබූ ට්‍රක් රථයක් අනතුරට ලක්වීමෙන් 54 දෙනකු මියගොස් බොහෝ දෙනකු තුවාල ලබා ඇතැයි වාර්තා වේ. මධ්‍යම ඇමරිකාවේ සිට පැමිණ ඇති සංක්‍රමණිකයන් 100කට වැඩි පිරිසක් ට්‍රක් රථය අනතුරට ලක්වන විට එහි සිරවී සිටියහ.
එය මෙක්සිකෝවේ සිදු වූ දරුණුතම අනතුරු වලින් එකක් වන අතර අවම වශයෙන් පුද්ගලයින් 58 දෙනෙකු තුවාල ලබා ඇති අතර සමහරු බරපතල ලෙස තුවාල ලබා ඇති බව චිපාස් සිවිල් ආරක්ෂක ඒජන්සියේ ප්‍රධානී පැවසීය.
විපතට පත්වූවන් අතර පිරිමින්, කාන්තාවන් සහ ළමුන් ද සිටින බව ඔහු පැවසීය. ඔවුන්ගේ ජාතිකත්වය තහවුරු කර නොමැති නමුත් ප්‍රාදේශීය බලධාරීහු පැවසුවේ රථයේ සිටි බොහෝ දෙනා හොන්ඩුරාස් සහ ග්වාතමාලාවේ සිට පැමිණ ඇති බවයි.
වේගයෙන් ධාවනය වූ ට්‍රක් රථය තියුණු වංගුවකින් පෙරලී චිපාස් ප්‍රාන්ත අගනුවර වන ටුක්ස්ලා ගුටියරස් වෙත දිවෙන ප්‍රධාන මාර්ගයක පදික පාලමක ගැටී ඇත.
ග්වාතමාලාවේ අසල්වැසි චිපාස් ප්‍රාන්තය, ලේඛනගත නොකළ සංක්‍රමණිකයන් සඳහා ප්‍රධාන සංක්‍රාන්ති ස්ථානයකි.
මධ්‍යම ඇමරිකාවේ දරිද්‍රතාවයෙන් සහ ප්‍රචණ්ඩත්වයෙන් පලා යන ලක්ෂ සංඛ්‍යාත සංක්‍රමණිකයන් ඇමරිකාවට යෑම සඳහා සෑම වසරකම මෙක්සිකෝව හරහා ගමන් කිරීමට උත්සාහ කරති.
ඔවුන්ගෙන් බොහෝ දෙනෙක් ජාවාරම්කරුවන්ට මුදල් ගෙවන අතර, ඔවුන් මෙම දිගු ගමනේදී ජනාකීර්ණ හා අනතුරුදායක ට්‍රක් රථවල නීති විරෝධී ලෙස ප්‍රවාහනය කරති.
සංක්‍රමණ සඳහා වූ ජාත්‍යන්තර සංවිධානයේ (IOM) දත්ත වලට අනුව එක්සත් ජනපද-මෙක්සිකෝ දේශසීමා ලෝකයේ මාරාන්තික මාර්ගය වේ. මෙම වසරේ පමණක්, දේශසීමා තරණය කිරීමට උත්සාහ කිරීමේදී අවම වශයෙන් පුද්ගලයින් 650 දෙනෙකු මිය ගොස් ඇත. එය IOM හි වාර්තා ආරම්භ වූ දා සිට වෙනත් කිසිදු වසරකට වඩා වැඩි සංඛ්‍යාවකි.
