බදුල්ල පලාවත්තේ විහාරස්ථානයක හිමිනමකට පුද්ගලයකු විසින් පහරදීමෙන් ඇතිවූ උණුසුම් තත්ත්වයක් පාලනය කිරීමට දැඩි පරිශ්‍රමයක් දරමින් සිටින බව බදුල්ල පොලිසිය පවසයි.
මෙලෙස පහරදීමට ලක්ව ඇත්තේ පලාවත්ත බෝධිරාජාරාමයේ විහාරාධිපති ටිබෙට් ජාතික සිකින් අමරජෝති හිමියන්ටය. විහාරස්ථානය අසළ නිවාස කිහිපයකට කරදර වන ආකාරයෙන් අප ජලය බැසයන කාණුවක් කැපීමට හිමියන් විරුද්ධවීම හේතුවෙන් කාණුව කැපූ පුද්ගලයා විසින් හිමියන්ට පහරදී ඇතැයි ගම්වැසියෝ කියති.
හිමියන්ට පහරදීමේ සිද්ධියෙන් කුපිත වූ ගම්වැසියෝ එම පුද්ගලයාගේ නිවසට ගල් සහ මුගුරුවලින් පහර දී නිවැසියන් ද නිවස තුළම සිරකරගෙන සිටිති. පොලිසිය පවසන්නේ මේ නිවස වටා ගම්වැසියන් විශාල පිරිසක් රැස්ව විරෝධතා දක්වන බවයි.
තත්ත්වය පාලන කිරීම සඳහා පොලිසිය දැඩි පරිශ්‍රමයක් දරමින් සිටියි.
