ලංකා විදුලි පුද්ගලික සමාගමේ කඳාන කාර්යාලයේ සේවය කළ කොරෝනා ආසාදිත පුද්ගලයන් 12 දෙනා අතරින් එක් අයකු ගාල්ලේ නරාවල පෝද්දල පදිංචි කරුවකු බවත් ඔහුගේ සමීපතමයන් සොයා මේ වනවිට නිරෝධායන කටයුතු සඳහා යොමුකරමින් සිටින බවත් බෝපේ පෝද්දල සෞඛ්‍ය වෛද්‍ය නිලධාරී වෛද්‍ය ලසන්ත උබේසේකර මහතා පවසයි.
ඔහු පසුගිය සති අන්තයේ කඳානේ සිට නිවසට පැමිණ සිටි බැවින් ඔහුගේ පවුලේ සාමාජිකයන් සහ ඇසුරු කළ පිරිස් නිරෝධායනයට යොමු කර ඇත. එමෙන්ම ඔහු ගමන් කළ බස් රථවල තො‍රතුරු ද මේ වනවිට අනාවරණය කරගනිමින් සිටියි.
එසේ වුව ද ඔහු ගමන්ගත් බස් රථවල සිටි සියලු දෙනා සොයාගැනීම අපහසු වනු ඇතැයි සෞඛ්‍ය අංශවල මතයයි.
මිනුවන්ගොඩ කොරෝනා පොකුර ආශ්‍රයෙන් ආසාදිත වූ පුද්ගලයන් කිහිප දෙනකු ගාල්ලේ ප්‍රදේශ ගණාවකට පැමිණ තිබීමත් ඔවුන් ගමන්ගත් බස් රථවල සහ ඔවුන් ගැවසී ඇති ස්ථානවලට ආ ගිය පුද්ගලයන් සියලුම දෙනා මෙතෙක් අනාවරණය කරගැනීමට නොහැකිවීමත් හේතුවෙන් සෞඛ්‍ය ආරක්ෂිත ක්‍රමෝපායයන් හැකිතාක් පිළිපදින ලෙසත් අනවශ්‍ය ගමන් බිමන්වල නොයෙදෙන ලෙසත් සෞඛ්‍ය අංශ ඉල්ලා සිටියි.
