නිවසක ස්වයං නිරෝධායනයේ සිටි පුද්ගලයකු හදිසියේ ම මියගොස් ඇතැයි මොනරාගල රෝහල් පොලිසිය පවසයි.
මෙලෙස මියගොස් ඇත්තේ මොනරාගල බොල්ගල්ල වල්ගොල්ල පදිංචි එ්.එන්.ලොකු බණ්ඩා නමැති 70 හැවිරිදි පුද්ගලයෙකි.
පසුගිය ඉරිදා (04) කොළඹ සිට මොනරාගලට පුද්ගලික බසයකින් පැමිණි කාන්තාවක් කොරෝනා ආසාදිතයකු යැයි හඳුනාගෙන තිබිණි. මියගිය මෙම තැනැත්තාගේ දියණිය ද එම බසයේ පැමිණි බව අනාවරණය වීම හේතුවෙන් එම නිවසේ සිටි සියලු දෙනා ස්වයං නිරෝධායනයට යොමු කිරීමට සෞඛ්‍ය අංශ කටයුතු කර තිබිණි.
එසේ ස්වයං නිරෝධායනයේ සිටිය දී ඊයේ (08) රාත්‍රී හදිසියේ ම අසනීප වූ මෙම තැනැත්තා මොනරාගල දිස්ත්‍රික් මහ රෝහලට ඇතුලත් කිරීමෙන් පසු මියගිය බව වෛද්‍යවරු කියති.
ඔහුට කොරෝනා ආසාදනය වී ඇත්දැයි පරීක්ෂා කිරීම සඳහා සෙම් පටල සාම්පල කරාපිටිය ශික්ෂණ රෝහලට යැවීමට කටයුතු කර ඇති අතර එම වාර්තා ලැබෙනතුරු දේහය මුද්‍රා තබා රෝහල් මෘත ශරීරාගාරයේ තැන්පත් කර තිබේ.
